سیدنا عبداللہ بن عباس رضی اللہ عنہما سے روایت ہے کہ سیدنا سلیمان بن داود علیہما السلام جب نماز ادا کرتے تو ان کے سامنے ایک درخت نمودار ہو جاتا، وہ اس سے دریافت فرماتے: ”تم کیا ہو اور کس مقصد کے لیے اگی ہو؟“ وہ جواب دیتا: ”میں فلاں درخت ہوں اور فلاں بیماری کے علاج کے لیے اگی ہوں“، پھر ایک روز جب انہوں نے صبح کی نماز ادا کی تو ان کے سامنے ایک درخت نمودار ہوا، انہوں نے اس سے دریافت فرمایا: ”تم کیا ہو اور کس غرض سے اگی ہو؟“ اس نے جواب دیا: ”میں «الخُرْنوب» (خرنوب) ہوں اور اس مسجد کی ویرانی کے لیے اگی ہوں“، تب سیدنا سلیمان علیہ السلام جان گئے کہ ان کی وفات کا وقت قریب آ چکا ہے اور بیت المقدس ان کی زندگی میں ویران نہیں ہو گا، چنانچہ انہوں نے اللہ تعالیٰ سے دعا کی کہ ان کی موت کا حال شیاطین پر پوشیدہ رہے، جب کہ جنات کا یہ گمان تھا کہ شیاطین غیب کا علم رکھتے ہیں، پھر آپ علیہ السلام اپنے عصا کے سہارے وفات پا گئے، پس اللہ تعالیٰ نے «الأَرضَة» (دیمک) کو ان کے عصا پر مسلط کر دیا جس نے اسے کھا لیا اور آپ (کا جسدِ مبارک) زمین پر آ رہا، اس پر شیاطین نے دیمک کا شکریہ ادا کرنے کے لیے یہ لازم کر لیا کہ وہ جہاں کہیں بھی ہو اسے پانی پہنچائیں کیونکہ اس نے سلیمان علیہ السلام کے عصا کو کھا کر (ان کی موت ظاہر کرنے کا) جو کام کیا تھا وہ اس پر اس کی تعریف اور شکریہ ادا کرتے تھے۔ [المستدرك على الصحيحين/كتاب الطب/حدیث: 7617]