سیدنا ابوذر رضی اللہ عنہ فرماتے ہیں کہ رسول اللہ صلی اللہ علیہ وسلم نے ارشاد فرمایا: اللہ تعالیٰ ارشاد فرماتا ہے: اے ابن آدم! اگر تو ایک بالشت میرے قریب آئے گا، میں ایک ذراع تیرے قریب آؤں گا۔ اور اگر تو ایک ذراع میرے قریب آئے گا تو میں ایک باع (دونوں بازوؤں کے پھیلانے کی مقدار جو کہ تقریباً 6 فٹ ہوتی ہے) تیرے قریب آؤں گا۔ اے ابن آدم! اگر تیرے دل میں نیکی کا ارادہ آئے، میں تیرے نامہ اعمال میں ایک نیکی لکھ دوں گا اگرچہ تو اس ارادے پر عمل نہ کر سکے۔ اور اگر تو عمل بھی کر لے تو میں تیرے لیے دس نیکیوں کا ثواب لکھوں گا۔ اور اگر تو گناہ کا ارادہ کرے، لیکن میرے خوف کی وجہ سے تو اس پر عمل نہ کر سکے تو میں اس کے بدلے میں بھی تیرے لیے نیکی لکھوں گا اور اگر تو اس گناہ کے ارادے پر عمل بھی کر لے تو میں صرف ایک گناہ لکھوں گا۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ [المستدرك على الصحيحين/كتاب التوبة والإنابة/حدیث: 7816]