ابوامیہ شعبانی کہتے ہیں: میں نے ابوثعلبہ سے آیت کے بارے میں پوچھا: يَا أَيُّهَا الَّذِينَ آمَنُوا عَلَيْكُمْ أَنْفُسَكُمْ لَا يَضُرُّكُمْ مَنْ ضَلَّ إِذَا اهْتَدَيْتُمْ [ المائدة: 105 ] ” اے ایمان والوں تم اپنی فکر رکھو تمہارا کچھ نہ بگاڑے گا جو گمراہ ہوا جب کہ تم راہ پر ہو تم سب کی رجوع اللہ ہی کی طرف ہے پھر وہ تمہیں بتا دے گا جو تم کرتے تھے “ ابوثعلبہ نے کہا: نیکی کا حکم دو اور برائی سے منع کرو، جب تم دیکھو کہ بخل کی اطاعت کی جاتی ہے، خواہشات کی پیروی کی جاتی ہے، دنیا کو ترجیح دی جاتی ہے اور تو ایسا معاملہ دیکھے جس کی طلب کرنا تیرے لیے ضروری ہو تو تم اپنی فکر کرنا اور لوگوں کو ان کے حال پر چھوڑ دینا، اس لیے کہ تمہارے پیچھے صبر کے ایام ہیں، ان ایام میں صبر کرنا ایسے ہی ہے جیسے انگارہ ہاتھ میں لینا، ان ایام میں جو نیک عمل کرے گا اس پچاس عاملین کے برابر ثواب ملے گا۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ [المستدرك على الصحيحين/كتاب الرقاق/حدیث: 8110]