سیدنا عبادہ بن نسی فرماتے ہیں: میں سیدنا شداد بن اوس رضی اللہ عنہ کے پاس ان کی جائے نماز پر گیا، آپ وہاں رو رہے تھے، میں نے کہا: اے ابوعبدالرحمن! آپ رو کیوں رہے ہیں؟ انہوں نے فرمایا: مجھے رسول اللہ صلی اللہ علیہ وسلم کا ایک ارشاد یاد آ رہا ہے، میں نے پوچھا: وہ کیا؟ انہوں نے بتایا کہ ایک دفعہ میں رسول اللہ صلی اللہ علیہ وسلم کی بارگاہ میں موجود تھا، میں نے رسول اللہ صلی اللہ علیہ وسلم کے چہرے پر کچھ ناپسندیدگی کے آثار دیکھے، میں نے عرض کی: یا رسول اللہ صلی اللہ علیہ وسلم میرے ماں باپ آپ پر قربان ہو جائیں، میں آپ کے چہرہ انور پر کچھ پریشانی کے آثار دیکھ رہا ہوں، حضور صلی اللہ علیہ وسلم کیا وجہ ہے؟ نبی اکرم صلی اللہ علیہ وسلم نے فرمایا: میرے بعد میری امت پر ایک معاملہ ہو گا مجھے اس کا خدشہ ہو رہا ہے، میں نے پوچھا: یا رسول اللہ صلی اللہ علیہ وسلم وہ کیا ہے؟ آپ صلی اللہ علیہ وسلم نے فرمایا: شرک اور چھپی ہوئی شہوت۔ میں نے کہا: یا رسول اللہ صلی اللہ علیہ وسلم ! کیا آپ کے بعد آپ کی امت کے شرک میں مبتلا ہونے کے خدشات موجود ہیں؟ رسول اللہ صلی اللہ علیہ وسلم نے فرمایا: اے شداد! یہ لوگ چاند اور سورج کی عبادت نہیں کریں گے، کسی بت اور پتھر کی پوجا نہیں کریں گے، بلکہ یہ لوگ اپنے اعمال لوگوں کو دکھائیں گے۔ میں نے عرض کی: یا رسول اللہ صلی اللہ علیہ وسلم ریاکاری شرک ہے؟ حضور صلی اللہ علیہ وسلم نے فرمایا: جی ہاں۔ میں نے پوچھا: یا رسول اللہ صلی اللہ علیہ وسلم چھپی ہوئی شہوت کیا چیز ہے؟ آپ صلی اللہ علیہ وسلم نے فرمایا: لوگ صبح کے وقت روزہ تو رکھ لیں گے لیکن پھر ان پر دنیاوی شہوات کا غلبہ ہو جائے گا تو وہ روزہ توڑ لیں گے۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ [المستدرك على الصحيحين/كتاب الرقاق/حدیث: 8139]