سیدنا ابوسعید خدری رضی اللہ عنہ فرماتے ہیں: ایک دفعہ ایک چرواہا، حرہ میں بکریاں چرا رہا تھا، ایک بھیٹریے نے اس کی بکریوں پر حملہ کر دیا اور ایک بکری دبوچ لی، راعی نے اس سے بکری چھین لی، وہ بھیٹریا اپنی سرین پر بیٹھ گیا اور کہنے لگا: اے اللہ کے بندے! اللہ تعالیٰ نے میرے لئے جو رزق رکھا تھا تو نے میرا وہ رزق مجھ سے چھین لیا ہے، اس آدمی نے کہا: بڑے تعجب کی بات ہے، ایک بھیٹریا انسانوں کی طرح باتیں کر رہا ہے، بھیٹریے نے کہا: میں تجھے اس سے بھی زیادہ تعجب کی بات نہ بتاؤں؟ ان دو پہاڑوں کے درمیان اللہ کا رسول پیدا ہوا ہے، وہ لوگوں کو گزرے ہوئے زمانے کی باتیں بتاتا ہے۔ اس چرواہے نے شہر کے ایک کونے میں اپنی بکریوں کو سمیٹا اور نبی اکرم صلی اللہ علیہ وسلم کی بارگاہ میں حاضر ہو گیا اور آپ صلی اللہ علیہ وسلم کو واقعہ بتایا، اس کے بعد رسول اللہ صلی اللہ علیہ وسلم لوگوں کی طرف نکلے اور فرمایا: اس ذات کی قسم جس کے قبضہ قدرت میں میری جان ہے، اس نے سچ کہا ہے۔ ٭٭ یہ حدیث امام سلم رحمۃ اللہ علیہ کے معیار کے مطابق صحیح ہے لیکن شیخین نے اس کو نقل نہیں کیا۔ [المستدرك على الصحيحين/كتاب الفتن والملاحم/حدیث: 8650]