مجاہد کہتے ہیں: مجھے عبداللہ بن عباس رضی اللہ عنہما نے کہا: اگر میں نے یہ نہ سن رکھا ہوتا کہ تم اہل بیت ہی کی طرح ہو تو میں یہ حدیث تمہیں نہ سناتا۔ مجاہد نے کہا: یہ بات صیغہ راز میں رہے گی، میں یہ بات ایسے کسی شخص کو نہیں بتاؤں گا، جس کو بتانا آپ کو پسند نہ ہو۔ تب سیدنا عبداللہ بن عباس رضی اللہ عنہما نے فرمایا: چار آدمی ایسے ہیں جو ہم اہل بیت میں ہی شمار ہوتے ہیں۔ سفاح، ہم میں سے ہے، منذر ہم میں سے ہے، منصور ہم میں سے ہے، اور مہدی ہم میں سے ہے۔ مجاہد نے کہا: آپ ان چاروں کی تفصیل بھی بیان فرما دیجئے، سیدنا عبداللہ بن عباس رضی اللہ عنہما نے فرمایا: سفاح کو اس کے ساتھی قتل کریں گے، اور وہ اپنے دشمن کو معاف بھی کر دیں گے، اور منذر بہت مال و دولت والا ہو گا، لیکن وہ خود کو بڑا نہیں سمجھے گا اور اپنا چھوٹے سے چھوٹا حق بھی نہیں چھوڑے گا، اور منصور کا دشمن ایک مہینے کی مسافت سے ہی اس سے ڈر رہا ہو گا، اور مہدی وہ ہو گا جو روئے زمین کو عدل و انصاف سے بھر دے گا، جیسا کہ اس سے پہلے وہ ظلم و ستم سے بھری ہوئی تھی، اور جانور اور درندے سبھی پرامن ہوں گے، اور زمین اپنے جگر کے ستون باہر پھینک دے گی، میں نے پوچھا: اس کے جگر کے ستونوں کا کیا مطلب؟ آپ نے فرمایا: سونے اور چاندی کے ستون اگل دے گی۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ [المستدرك على الصحيحين/كتاب الفتن والملاحم/حدیث: 8781]