سیدنا سعد بن مالک رضی اللہ عنہ اور سیدنا ابوہریرہ رضی اللہ عنہما فرماتے ہیں کہ رسول اللہ صلی اللہ علیہ وسلم نے یوں دعا مانگی ” اے اللہ اہل مدینہ کے ” مد “ اور ان کے ” صاع “ میں برکت عطا فرما، اور ان کے شہر میں برکت عطا فرما، اے اللہ بے شک سیدنا ابراہیم علیہ السلام تیرے بندے اور خلیل ہیں اور میں تیرا بندہ اور رسول ہوں، سیدنا ابراہیم علیہ السلام نے تجھ سے مکہ کے لئے دعا مانگی تھی، اور میں اسی طرح کی دعا تجھ سے مدینہ کے لئے مانگتا ہوں “۔ خبردار! مدینہ منورہ فرشتوں سے بھرا ہوا ہے اس کے ہر دروازے پر دو فرشتے مقرر ہیں جو کہ اس کی حفاظت کرتے ہیں، اس شہر میں دجال اور طاعون داخل نہیں ہو سکتا، جو شخص وہاں کے رہنے والوں کو نقصان دینا چاہے گا، اللہ تعالیٰ اس کو اس طرح پگھلا دے گا جیسے پانی میں نمک پگھل جاتا ہے۔ ٭٭ یہ حدیث امام مسلم رحمۃ اللہ علیہ کے معیار کے مطابق صحیح ہے لیکن شیخین نے اس کو نقل نہیں کیا۔ [المستدرك على الصحيحين/كتاب الفتن والملاحم/حدیث: 8842]