عمیر بن اسود بیان کرتے ہیں: میں سیدنا عبداللہ بن صامت رضی اللہ عنہ کے پاس گیا، وہ اپنے گھر میں تشریف فرما تھے، ان کے ہمراہ ان کی بیوی ” ام حرام “ بھی موجود تھیں، سیدنا ام حرام نے ہمیں بتایا کہ انہوں نے رسول اللہ صلی اللہ علیہ وسلم کو یہ فرماتے ہوئے سنا ہے کہ میری امت کا سب سے پہلا لشکر جو کہ سمندر میں جہاد کرے گا، وہ جنتی ہے، آپ فرماتی ہیں: میں نے پوچھا: یا رسول اللہ صلی اللہ علیہ وسلم کیا میں بھی ان میں شریک ہوں گی؟ حضور صلی اللہ علیہ وسلم نے فرمایا: تو ان میں ہو گی۔ پھر رسول اللہ صلی اللہ علیہ وسلم نے ارشاد فرمایا: میری امت میں جو لوگ قیصر کے شہر میں جنگ کریں گے، وہ بخش دیئے گئے ہیں۔ میں نے کہا: یا رسول اللہ صلی اللہ علیہ وسلم کیا میں ان میں ہوں گی؟ آپ صلی اللہ علیہ وسلم نے فرمایا: نہیں۔ ٭٭ یہ حدیث امام بخاری رحمۃ اللہ علیہ کے معیار کے مطابق صحیح ہے لیکن انہوں نے اس کو نقل نہیں کیا۔ [المستدرك على الصحيحين/كتاب الفتن والملاحم/حدیث: 8881]