اردو حاشہ:
(1)
غزوہ خیبر ہجرت کے ساتویں برس ہوا تھا۔
اللہ تعالیٰ نے اہل اسلام کو یہود خیبر پر فتح و کامیابی عطا فرمائی، تو رسول اللہ صلی اللہ علیہ وسلم نے یہود سے پیداوار کی نصف کجھوروں پر مزارعت کا معاہدہ کر لیا۔
واضح رہے مقام خیبر مدینہ سے شام کی طرف ہے جو قلعوں اور کجھوروں کی سر زمین ہے۔

(2)
تابعین حضرات صحابہ کرام رضی اللہ عنھم کا اس قدر احترام کرتے تھے کہ ایسے سوالات کرنے کی جرأت نہیں کرتے تھے جن کا تعلق براہ راست علم سے نہ ہو، اس لیے انہوں نے جب یہ معلوم کرنا چاہا کہ حضرت علی رضی اللہ عنہ لباس میں موسم کا لحاظ کیوں نہیں رکھتے تو اپنے اس ساتھی کے ذریعے سے پوچھا جو ان سے نسبتاً بے تکلفی رکھتے تھے۔

(3)
یہ حضرت علی رضی اللہ عنہ کا خاص شرف ہے کہ فوج کی قیادت کے لیے انہیں خاص طور پر طلب کیا گیا۔

(4)
لعاب دہن سے حضرت علی رضی اللہ عنہ کی آنکھوں کی بیماری کا دور ہو جانا نبی اکرم صلی اللہ علیہ وسلم کا ایک معجزہ ہے جو آپ صلی اللہ علیہ وسلم کی نبوت کی دلیل ہے۔

(5)
رسول اللہ صلی اللہ علیہ وسلم کا یہ ارشاد مبارک حضرت علی رضی اللہ عنہ کے کامل مومن ہونے کی دلیل ہے جس سے خوارج کی تردید ہو جاتی ہے۔

(6)
یہ واقعہ صحیحین کی روایات سے ثابت ہے۔ دیکھیے: (صحيح البخاري، المغازي، حديث: 4310، وصحيح مسلم، الجهاد، حديث: 120)
تاہم ان میں سردی اور گرمی سے متاثر نہ ہونے کا ذکر نہیں۔
اس کا ذکر صرف زیر بحث روایت میں ہے جس کی سند میں ایک راوی ”محمد بن ابی لیلیٰ“ ضعیف ہے۔
اور امام بوصیری وغیرہ نے صراحت کی ہے کہ جس روایت کے بیان کرنے میں وہ متفرد ہو، وہ قابل حجت نہیں۔
اور گرمی سردی والی بات بیان کرنے میں یہ متفرد ہے، اس لیے روایت کا یہ حصہ صحیح نہیں۔
واللہ أعلم.
(7)
گزشتہ حدیث میں جو مولیٰ کا لفظ آیا تھا اس روایت سے واضح ہوا کہ وہاں محب اور دوست مراد ہے۔