ابو مجیبہ باہلی رحمہ اللہ اپنے والد یا چچا رضی اللہ عنہ سے روایت کرتے ہیں، انہوں نے فرمایا: میں نبی صلی اللہ علیہ وسلم کی خدمت میں حاضر ہوا اور عرض کیا: ”اے اللہ کے نبی! میں وہی شخص ہوں جو پچھلے سال آپ کی خدمت میں حاضر ہوا تھا۔“ آپ صلی اللہ علیہ وسلم نے فرمایا: ”کیا وجہ ہے کہ میں تمہارے جسم کو کمزور دیکھتا ہوں؟“ میں نے کہا: ”اللہ کے رسول! میں نے کبھی دن کے وقت کھانا نہیں کھایا (ہمیشہ روزہ رکھتا ہوں) صرف رات کو کھانا کھاتا ہوں۔“ آپ صلی اللہ علیہ وسلم نے فرمایا: ”تجھے کس نے اپنی جان کو عذاب میں ڈالنے کا حکم دیا ہے؟“ میں نے عرض کیا: ”اے اللہ کے رسول! میں طاقت رکھتا ہوں۔“ نبی صلی اللہ علیہ وسلم نے فرمایا: ”صبر کے مہینے (رمضان) کے روزے رکھ اور اس کے بعد ایک دن روزہ رکھ لے۔“ میں نے کہا: ”اللہ کے رسول! میں زیادہ طاقت رکھتا ہوں۔“ آپ صلی اللہ علیہ وسلم نے فرمایا: ”ماہ صبر کے روزے رکھ اور اس کے بعد دو روزے (نفلی) رکھ لے۔“ میں نے کہا: ”میں زیادہ طاقت رکھتا ہوں۔“ آپ صلی اللہ علیہ وسلم نے فرمایا: ”ماہ صبر کے روزے رکھ اور اس کے بعد تین دن (اور روزے رکھ لے) اور حرمت والے مہینوں میں روزے رکھ۔“ [سنن ابن ماجه/كتاب الصيام/حدیث: 1741]