اُم المؤمنین حضرت عائشہ رضی اللہ عنہا اور اُم المؤمنین حضرت ام سلمہ رضی اللہ عنہا سے روایت ہے، ان دونوں نے فرمایا: ”رسول اللہ صلی اللہ علیہ وسلم نے ہمیں حکم دیا کہ ”حضرت فاطمہ رضی اللہ عنہا کو تیار کریں تاکہ انہیں حضرت علی رضی اللہ عنہ کے ہاں رخصت کریں۔“ ہم نے گھر کی طرف توجہ کی اور اس میں بطحاء کے میدان کی نرم مٹی بچھا دی (اس طرح کمرے کے ناہموار فرش میں جو کنکر پتھر تھے، چھپ گئے)، پھر ہم نے دو تکیوں میں کھجور کے درخت کا چھلکا بھرا جسے ہم نے خود اپنے ہاتھوں سے دھنا تھا، پھر ہم نے کھانے کو کھجوریں اور کشمش پیش کیں اور پینے کو میٹھا پانی پیش کیا، اور ہم نے ایک لکڑی لے کر کمرے کے ایک کونے میں لگا دی تاکہ اس پر مشکیزے اور کپڑے لٹکائے جا سکیں، ہم نے حضرت فاطمہ رضی اللہ عنہا کی شادی سے اچھی کوئی شادی نہیں دیکھی۔” [سنن ابن ماجه/كتاب النكاح/حدیث: 1911]