اردو حاشہ:
(1) اس روایت سے حقیقت حال واضح ہو جاتی ہے کہ حضرت عمر رضی اللہ عنہ اسے شرعاً جائز سمجھتے تھے مگر مذکورہ علت کی وجہ سے حج تمتع کو بہتر نہ سمجھا جو کہ آپ کی ایک اجتہادی غلطی تھی، تاہم درست یہی ہے کہ حج تمتع افضل ہے۔ واللہ أعلم
(2) ”نبی اکرمﷺ نے یہ کیا ہے۔“ یعنی آپ نے یہ حکم دیا تھا ورنہ آپ حلال نہ ہوئے تھے۔ یا لغوی معنیٰ میں آپ نے تمتع کیا ہے۔ اور اس معنیٰ میں تو حضرت عمر بھی تمتع (قران) کو ناپسند نہیں فرماتے تھے۔
(3) ”پیلو کے درختوں کے نیچے“ ان دنوں وہاں یہ درخت عام ہوں گے، اس لیے اتفاقاً ان کا ذکر فرمایا۔

اردو حاشہ:
فوائد و مسائل:
(1)
اس روایت سے بھی ثابت ہوتا ہے کہ حضرت عمر رضی اللہ عنہ حج تمتع کو شرعاً ممنوع نہیں سمجھتے تھے۔

(2)
رسول اللہ ﷺ نے حج قران ادا کیا تھا۔
حضرت عمر رضی اللہ عنہ نے جو فرمایا کہ رسول اللہ ﷺ نے تمتع کیا ہے۔
اس سے تمتع کا لغوی معنی مراد ہے۔
یعنی ایک سفر میں حج اور عمرہ دونوں کا فائدہ حاصل کرنا۔
یا یہ مطلب ہے کہ صحابہ کرام رضی اللہ عنہم نے رسول اکرم ﷺ کے حکم سے تمتع کیا۔
آپ کے حکم کو عمل کے برابر قرار دیتے ہوئے یہ جملہ فرمایا۔

حدیث حاشیہ:
فوائد ومسائل:
1۔
حضرت ابو موسیٰ اشعری رضی اللہ تعالیٰ عنہ کے واقعہ سے ثابت ہوتا ہے کہ ضرورت کے تحت اپنا احرام کس دوسری محترم شخصیت جس کی اقتدا کرنی ہو کے احرام پر معلق کیا جا سکتا ہے اور اس ابہام کی تعیین بعد میں اس کے ساتھ مل کر ہو سکتی ہے۔
2۔
میقات سے احرام باندھنے کے بعد عمرہ کیے بغیر اس کو ختم نہیں کیا جا سکتا ہاں کسی ضرورت یا مانع کی صورت میں احرام کی کیفیت میں تبدیلی جائز ہے حضرت ابو موسیٰ رضی اللہ تعالیٰ عنہ نے اپنا احرام رسول اللہ صلی اللہ علیہ وسلم پر معلق کیا تھا آپ صلی اللہ علیہ وسلم قارن تھے کیونکہ ہدی ساتھ لانے کی وجہ سے آپ صلی اللہ علیہ وسلم حج سے فراغت سے پہلے احرام کھول نہیں سکتے تھے لیکن ابو موسیٰ رضی اللہ تعالیٰ عنہ کے پاس ہدی نہ تھی اس لی آپ صلی اللہ علیہ وسلم نے انہیں حج تمتع کرنے کا حکم دیا وہ عمرہ کر کے حلال ہو گئے۔
3۔
قرآن کی اصطلاح کی روسے حج تمتع اور حج قران دونوں (چونکہ ایک ہی سفر میں دونوں سرانجام دئیے جاتے ہیں)
حج تمتع کہلاتے ہیں اس لیے حضرت عمر رضی اللہ تعالیٰ عنہ نے فرمایا مجھے خوب معلوم ہے کہ آپ صلی اللہ علیہ وسلم نے اور آپ صلی اللہ علیہ وسلم کے ساتھیوں نے حج تمتع کیا تھا لیکن وہ حج تمتع سے ایک مصلحت اور حکمت کے تحت روکتے تھے وہ اس کے جواز کے منکرنہ تھے تفصیل حدیث نمبر145 کے تحت گزر چکی ہے۔