حضرت ابن عمر رضی اللہ عنہما سے روایت ہے، انہوں نے کہا کہ نبی صلی اللہ علیہ وسلم ”اس بات سے منع کرتے تھے کہ غلہ جس وقت خریدا جائے اسی وقت وہیں فروخت کر دیا جائے، یہاں تک کہ اس پر پورا پورا قبضہ نہ کر لیا جائے۔“ [صحيح البخاري/كتاب البيوع/حدیث: 2124]

حضرت عبداللہ بن عمر رضی اللہ عنہما سے روایت ہے کہ رسول اللہ صلی اللہ علیہ وسلم نے فرمایا: ”جو شخص غلہ خریدے تو اس وقت تک اسے فروخت نہ کرے جب تک اس کو پوری طرح قبضے میں نہ لے لے۔“ [صحيح البخاري/كتاب البيوع/حدیث: 2126]

حضرت ابن عمر رضی اللہ عنہما سے روایت ہے، انہوں نے فرمایا کہ میں نے رسول اللہ صلی اللہ علیہ وسلم کے عہد مبارک میں اندازے سے غلہ خریدنے والوں کو اس بات پر پٹتے دیکھا ہے کہ وہ اس پر قبضہ کر کے اپنے گھروں میں لانے سے پہلے اسے (آگے) فروخت کریں۔ [صحيح البخاري/كتاب البيوع/حدیث: 2131]

حضرت ابن عباس رضی اللہ عنہما سے روایت ہے کہ رسول اللہ صلی اللہ علیہ وسلم نے اس بات سے منع فرمایا کہ ”کوئی آدمی قبضہ کرنے سے پہلے غلہ فروخت کرے۔“ (راویِ حدیث حضرت طاؤس رحمہ اللہ کہتے ہیں کہ) میں نے ابن عباس رضی اللہ عنہما سے کہا کہ ایسا کرنا کیوں منع ہے؟ فرمایا کہ یہ تو دراہم کے عوض دراہم فروخت کرنا ہے جبکہ غلہ بعد میں دیا جاتا ہے۔ ابو عبد اللہ (امام بخاری رحمہ اللہ) کہتے ہیں کہ قرآنی لفظ ﴿مُرْجَوْنَ﴾ [سورة التوبة: 106] کے معنی ہیں: ان کا معاملہ (اللہ کے حکم تک کے لیے) مؤخر کر دیا گیا ہے۔ [صحيح البخاري/كتاب البيوع/حدیث: 2132]

حضرت ابن عمر رضی اللہ عنہما سے روایت ہے، انہوں نے کہا کہ نبی صلی اللہ علیہ وسلم نے فرمایا: ”جو شخص غلہ خریدے تو اسے فروخت نہ کرے تاآنکہ اس پر قبضہ کر لے۔“ [صحيح البخاري/كتاب البيوع/حدیث: 2133]

حضرت عبداللہ بن عباس رضی اللہ عنہما سے روایت ہے، انہوں نے کہا کہ نبی صلی اللہ علیہ وسلم نے جس چیز سے منع فرمایا وہ ”غلہ ہے جسے قبضہ کرنے سے پہلے فروخت کیا جائے“۔ حضرت عبداللہ بن عباس رضی اللہ عنہما فرماتے ہیں کہ میرے خیال کے مطابق ہر چیز کا یہی حکم ہے (کہ اسے قبضے میں لینے سے پہلے فروخت نہیں کرنا چاہیے)۔ [صحيح البخاري/كتاب البيوع/حدیث: 2135]

حضرت عبداللہ بن عمر رضی اللہ عنہما سے روایت ہے کہ نبی صلی اللہ علیہ وسلم نے فرمایا: ”جو شخص غلہ خریدے تو جب تک اسے پورا وصول نہ کر لے اسے آگے فروخت نہ کرے۔“ (راویِ حدیث) اسماعیل بن ابی اویس نے یہ اضافہ کیا ہے: ”جو کوئی غلہ خریدے اسے آگے فروخت نہ کرے حتیٰ کہ اسے اپنے قبضے میں لے لے۔“ [صحيح البخاري/كتاب البيوع/حدیث: 2136]

حضرت عبداللہ بن عمر رضی اللہ عنہما سے روایت ہے، انہوں نے فرمایا کہ میں نے رسول اللہ صلی اللہ علیہ وسلم کے عہد مبارک میں ان لوگوں کو پٹتے دیکھا جو غلے کا ڈھیر اندازے سے خریدتے، پھر اسی جگہ فروخت کرتے تاآنکہ وہ غلہ اپنے ٹھکانوں میں لے جائیں۔ [صحيح البخاري/كتاب البيوع/حدیث: 2137]

حضرت عبداللہ بن عمر رضی اللہ عنہما سے روایت ہے، انہوں نے فرمایا کہ ہم باہر سے آنے والے قافلوں کو آگے جا کر ملتے اور ان سے غلہ خریدتے تھے۔ رسول اللہ صلی اللہ علیہ وسلم نے ہمیں ”اس غلے کو فروخت کرنے سے منع فرما دیا تاآنکہ اسے منڈی میں پہنچا دیا جائے“۔ ابو عبداللہ (امام بخاری رحمہ اللہ) بیان کرتے ہیں کہ ان کا قافلے والوں سے ملنا بازار کے اعلیٰ کنارے میں ہوتا تھا، جیسا کہ حضرت عبیداللہ رحمہ اللہ کی حدیث سے اس کی وضاحت ہوتی ہے (اور وہ حدیث آگے مذکور ہے)۔ [صحيح البخاري/كتاب البيوع/حدیث: 2166]

حضرت عبداللہ بن عمر رضی اللہ عنہما ہی سے روایت ہے، انہوں نے فرمایا کہ لوگ بازار کے بلند کنارے میں غلہ خریدتے اور اسی جگہ فروخت کر دیتے تھے، تو رسول اللہ صلی اللہ علیہ وسلم نے انہیں اسی جگہ فروخت کرنے سے منع فرما دیا: ”حتیٰ کہ اسے وہاں سے نقل کر لیں۔“ [صحيح البخاري/كتاب البيوع/حدیث: 2167]

حضرت عبداللہ بن عمر رضی اللہ عنہما سے روایت ہے کہ رسول اللہ صلی اللہ علیہ وسلم کے عہد مبارک میں ”ان لوگوں کو پیٹا جاتا تھا جو غلہ اندازے سے خریدتے اور دوسری جگہ منتقل کیے بغیر وہیں فروخت کر دیتے تھے۔ ہاں، اگر وہ غلہ اٹھا کر اپنے ٹھکانے پر لے جاتے، پھر فروخت کرتے تو کچھ سزا نہ ہوتی۔“ [صحيح البخاري/كتاب البيوع/حدیث: 6852]