حضرت ابو سعید خدری رضی اللہ عنہ سے روایت ہے کہ وہ ایک مرتبہ سفر میں تھے، جب واپس آئے تو ان کے سامنے گوشت پیش کیا گیا اور اہل خانہ نے کہا: ”یہ ہماری قربانیوں کا گوشت ہے۔“ حضرت ابو سعید خدری رضی اللہ عنہ نے کہا: ”اسے اٹھا لو، میں اسے نہیں کھاؤں گا۔“ پھر میں اٹھا اور گھر سے باہر چلا گیا، مادری بھائی حضرت ابو قتادہ رضی اللہ عنہ کے پاس آیا، وہ ان کے مادری بھائی تھے اور جنگ بدر میں شریک تھے، جب میں نے ان سے یہ معاملہ ذکر کیا تو انہوں نے کہا کہ ”تمہارے بعد نیا حکم ظاہر ہوا ہے۔“ [صحيح البخاري/كتاب الأضاحي/حدیث: 5568]

حضرت ابوسعید خدری رضی اللہ عنہ سے روایت ہے کہ وہ ایک سفر سے واپس آئے تو ان کے اہل خانہ نے قربانی کا گوشت انہیں پیش کیا، حضرت ابوسعید خدری رضی اللہ عنہ نے کہا: ”یہ گوشت میں نہیں کھاؤں گا یہاں تک کہ میں اس کے متعلق پوچھ لوں (تسلی کر لوں)“، چنانچہ وہ اپنے مادری بھائی حضرت قتادہ بن نعمان رضی اللہ عنہ کے پاس گئے جو بدری تھے اور ان سے دریافت کیا تو انہوں نے بتایا کہ ”تمہارے جانے کے بعد حکم منسوخ ہو گیا جس میں قربانی کا گوشت تین دن کے بعد کھانا منع کیا گیا تھا“۔ [صحيح البخاري/كتاب الأضاحي/حدیث: 3997]