حضرت عائشہ رضی اللہ عنہا سے روایت ہے، انہوں نے کہا کہ نبی صلی اللہ علیہ وسلم کو ایک رات نیند نہ آئی تو آپ صلی اللہ علیہ وسلم نے فرمایا: ”کاش! میرے صحابہ میں سے کوئی نیک آدمی آج رات میرے ہاں پہرہ دے۔“ اس دوران میں اچانک ہم نے ہتھیاروں کی چھنکار سنی۔ آپ صلی اللہ علیہ وسلم نے پوچھا: ”کون صاحب ہیں؟“ کہا گیا: ”اللہ کے رسول! میں سعد بن ابی وقاص رضی اللہ عنہ ہوں۔ آپ کی حفاظت کے لیے حاضر ہوا ہوں“، پھر نبی صلی اللہ علیہ وسلم سو گئے حتیٰ کہ ہم نے آپ صلی اللہ علیہ وسلم کے خراٹے بھرنے کی آواز سنی۔ ابوعبداللہ (امام بخاری رحمہ اللہ) کہتے ہیں کہ حضرت عائشہ رضی اللہ عنہا نے فرمایا: حضرت بلال رضی اللہ عنہ (جب نئے نئے مدینہ طیبہ آئے تو بخار کی حالت میں انہوں) نے کہا: ”کاش! میں ایسے میدان میں رات گزاروں جہاں میرے ارد گرد «إِذْخِرٌ» (اذخر) اور «جَلِيلٌ» (جلیل) نامی گھاس ہو۔“ حضرت عائشہ رضی اللہ عنہا کہتی ہیں میں نے نبی صلی اللہ علیہ وسلم کو اس امر کی خبر دی۔ [صحيح البخاري/كتاب التمني/حدیث: 7231]

حضرت ابن عمر رضی اللہ عنہما سے روایت ہے کہ حضرت عمر رضی اللہ عنہ نے کسی کو فی سبیل اللہ سواری کے لیے گھوڑا دیا جو انہیں رسول اللہ صلی اللہ علیہ وسلم نے عطا فرمایا تھا تاکہ وہ کسی مجاہد کو اس پر سوار کریں، حضرت عمر رضی اللہ عنہ کو خبر ملی کہ جس کے لیے گھوڑا وقف کیا تھا وہ اسے فروخت کر رہا ہے، انہوں نے رسول اللہ صلی اللہ علیہ وسلم سے اس کے متعلق دریافت کیا کہ کیا وہ اس گھوڑے کو خرید سکتے ہیں؟ آپ صلی اللہ علیہ وسلم نے فرمایا: ”اسے مت خریدو اور اپنے صدقے میں کبھی رجوع نہ کرو۔“ [صحيح البخاري/كتاب التمني/حدیث: 2775]

حضرت عائشہ رضی اللہ عنہا سے روایت ہے، انہوں نے فرمایا کہ نبی کریم صلی اللہ علیہ وسلم ایک رات بیدار رہے، جب مدینہ طیبہ پہنچے تو فرمایا: ”کاش! میرے صحابہ میں سے کوئی نیک مرد آج رات ہماری پاسبانی کرے۔“ پھر ہم نے ہتھیاروں کی آواز سنی تو آپ صلی اللہ علیہ وسلم نے فرمایا: ”یہ کون ہے؟“ انہوں نے کہا: میں سعد بن ابی وقاص رضی اللہ عنہ ہوں اور آپ صلی اللہ علیہ وسلم کی پاسبانی کے لیے آیا ہوں۔ اس کے بعد نبی کریم صلی اللہ علیہ وسلم محو استراحت ہو گئے۔ [صحيح البخاري/كتاب التمني/حدیث: 2885]