ہنیدہ خزاعی اپنی والدہ سے بیان کرتے ہیں، ان کا کہنا ہے کہ ”میں ام المؤمنین سیدہ ام سلمہ رضی اللہ عنہا کی خدمت میں حاضر ہوئی اور ان سے روزوں کے متعلق دریافت کیا تو انہوں نے کہا: ”رسول اللہ صلی اللہ علیہ وسلم مجھے ارشاد فرمایا کرتے تھے کہ میں ہر مہینے میں تین روزے رکھ لیا کروں۔ ان میں پہلا سوموار کا ہو اور (دوسرا) جمعرات کا۔““ [سنن ابي داود/كتاب الصيام /حدیث: 2452]

ابن ملحان قیسی (عبدالملک بن قتادہ) اپنے والد (قتادہ بن ملحان رضی اللہ عنہ) سے بیان کرتے ہیں، وہ کہتے ہیں کہ رسول اللہ صلی اللہ علیہ وسلم ہم سے فرمایا کرتے تھے کہ ”ہم «أَيَّام الْبِيضِ» ”ایامِ بیض“ یعنی تیرہ، چودہ اور پندرہ تاریخ کے روزے رکھا کریں۔“ آپ صلی اللہ علیہ وسلم نے فرمایا: ”یہ روزے ایسے ہیں گویا سارے زمانے کے روزے ہیں۔“ [سنن ابي داود/كتاب الصيام /حدیث: 2449]

سیدنا عبداللہ بن مسعود رضی اللہ عنہ بیان کرتے ہیں کہ ”رسول اللہ صلی اللہ علیہ وسلم ہر مہینے کی ابتداء میں تین دن روزے رکھا کرتے تھے۔“ [سنن ابي داود/كتاب الصيام /حدیث: 2450]

ام المؤمنین سیدہ حفصہ رضی اللہ عنہا بیان کرتی ہیں کہ ”رسول اللہ صلی اللہ علیہ وسلم مہینے میں تین روزے رکھا کرتے تھے۔ (پہلے) سوموار اور جمعرات کو اور اگلے ہفتے میں (دوسرے) سوموار کو۔ (اس طرح کل تین روزے ہو جاتے ہیں۔)“ [سنن ابي داود/كتاب الصيام /حدیث: 2451]

معاذہ (العدویہ) کہتی ہیں کہ میں نے ام المؤمنین سیدہ عائشہ رضی اللہ عنہا سے پوچھا: ”کیا رسول اللہ صلی اللہ علیہ وسلم ہر مہینے میں تین روزے رکھا کرتے تھے؟“ انہوں نے کہا: ”ہاں!“ میں نے کہا: ”مہینے کی کن تاریخوں یا دنوں میں روزے رکھا کرتے تھے؟“ انہوں نے کہا: ”آپ صلی اللہ علیہ وسلم تاریخوں یا دنوں کی پروا نہ کرتے تھے۔“ (کوئی خاص ایام مقرر نہ تھے جب چاہتے روزہ رکھ لیا کرتے۔) [سنن ابي داود/كتاب الصيام /حدیث: 2453]