سیدنا دحیہ بن خلیفہ کلبی رضی اللہ عنہ نے بیان کیا کہ رسول اللہ صلی اللہ علیہ وسلم کے پاس مصر کے سفید باریک کپڑے لائے گئے تو آپ صلی اللہ علیہ وسلم نے ان میں سے ایک کپڑا مجھے بھی عنایت فرمایا اور کہا: ”اس کے دو ٹکڑے کر لو، ایک کی تم قمیص بنا لو اور دوسرا اپنی اہلیہ کو دے دو، وہ اس کو اپنی اوڑھنی بنا لے۔“ پھر جب میں نے پشت پھیری تو آپ صلی اللہ علیہ وسلم نے فرمایا: ”اپنی بیوی کو کہنا کہ اس کے نیچے کوئی اور کپڑا لگا لے کہ اس کے جسم کو ظاہر نہ کرے۔“ امام ابوداؤد رحمہ اللہ فرماتے ہیں کہ اس حدیث کو یحییٰ بن ایوب نے روایت کیا تو (موسیٰ بن جبیر کے استاذ کا نام) عباس بن عبیداللہ بن عباس بیان کیا۔ [سنن ابي داود/كتاب اللباس /حدیث: 4116]

ام المؤمنین سیدہ ام سلمہ رضی اللہ عنہا کا بیان ہے کہ نبی کریم صلی اللہ علیہ وسلم ان کے ہاں آئے اور وہ سر پر اوڑھنی لپیٹ رہی تھیں۔ تو آپ صلی اللہ علیہ وسلم نے فرمایا: ”ایک بل دو، دو نہیں۔“ امام ابوداؤد رحمہ اللہ فرماتے ہیں: ”اس کا مفہوم یہ ہے کہ اوڑھنی کو اس طرح مت لپیٹے کہ مردوں کی پگڑی محسوس ہو۔ کپڑے کو دو بل مت دے۔“ [سنن ابي داود/كتاب اللباس /حدیث: 4115]