سیدنا انس رضی اللہ عنہ سے روایت ہے کہ نبی کریم صلی اللہ علیہ وسلم نے ارشاد فرمایا: ”جنت میں داخل ہونے والا کوئی بھی شخص یہ تمنا نہیں کرے گا کہ وہ وہاں سے (نکل کر دنیا کی طرف) واپس جائے خواہ اسے روئے زمین کی ہر چیز ہی کیوں نہ مل جائے، سوائے شہید کے؛ وہ (شہادت کی بدولت ملنے والی) عزت و منزلت کا مشاہدہ کر کے یہ تمنا کرے گا کہ اسے دنیا میں واپس بھیج دیا جائے تاکہ وہ دس مرتبہ (اللہ کی راہ میں) شہید کیا جائے۔“ [مسند أبي يعلى الموصلي/مُسْنَدُ أَنَسِ بْنِ مَالِكٍ/حدیث: 3056]

سیدنا انس رضی اللہ عنہ سے روایت ہے کہ ”رسول اللہ صلی اللہ علیہ وسلم نے رکوع کے بعد ایک ماہ تک (نماز میں) دعائے قنوت فرمائی۔“ [مسند أبي يعلى الموصلي/مُسْنَدُ أَنَسِ بْنِ مَالِكٍ/حدیث: 3057]

سیدنا انس رضی اللہ عنہ سے روایت ہے کہ لوگوں کے راستے میں ایک درخت تھا جو انہیں تکلیف دیتا تھا، پس ایک شخص اس کے پاس آیا اور اسے لوگوں کی گزرگاہ سے ہٹا دیا، تو رسول اللہ صلی اللہ علیہ وسلم نے ارشاد فرمایا: ”یقیناً میں نے اسے دیکھا ہے کہ وہ جنت میں اسی درخت کے سائے تلے عیش و راحت کے ساتھ کروٹیں بدل رہا تھا۔“ [مسند أبي يعلى الموصلي/مُسْنَدُ أَنَسِ بْنِ مَالِكٍ/حدیث: 3058]

سیدنا انس رضی اللہ عنہ سے روایت ہے کہ انہوں نے بیان فرمایا: ”ایک مرتبہ رسول اللہ صلی اللہ علیہ وسلم کو جو کی روٹی اور بو باس میں بدلی ہوئی پرانی پگھلی ہوئی چربی کے کھانے کی دعوت دی گئی۔“ [مسند أبي يعلى الموصلي/مُسْنَدُ أَنَسِ بْنِ مَالِكٍ/حدیث: 3059]

سیدنا انس رضی اللہ عنہ سے روایت ہے کہ انہوں نے فرمایا: میں نے ایک روز رسول اللہ صلی اللہ علیہ وسلم کو یہ فرماتے ہوئے سنا: ”اس ذات کی قسم جس کے ہاتھ میں محمد کی جان ہے! آج صبح محمد کے پاس نہ ایک صاع غلہ ہے اور نہ ایک صاع کھجور۔“ حالانکہ اس وقت آپ صلی اللہ علیہ وسلم کی نو ازواج تھیں۔ [مسند أبي يعلى الموصلي/مُسْنَدُ أَنَسِ بْنِ مَالِكٍ/حدیث: 3060]

سیدنا انس رضی اللہ عنہ سے روایت ہے کہ رسول اللہ صلی اللہ علیہ وسلم نے مدینہ میں ایک یہودی کے پاس اپنی زرہ گروی رکھ کر اس سے غلہ لیا تھا، پھر آپ صلی اللہ علیہ وسلم کو اسے چھڑانے کے لیے مال میسر نہ آیا۔ [مسند أبي يعلى الموصلي/مُسْنَدُ أَنَسِ بْنِ مَالِكٍ/حدیث: 3061]

سیدنا انس رضی اللہ عنہ سے روایت ہے کہ انہوں نے فرمایا: ”کیا میں تمہیں ایسی حدیث نہ سناؤں جو میرے بعد تمہیں کوئی نہیں سنائے گا جسے میں نے اللہ کے نبی صلی اللہ علیہ وسلم سے خود سنا ہے؟“ انہوں نے بیان کیا کہ میں نے رسول اللہ صلی اللہ علیہ وسلم کو یہ فرماتے ہوئے سنا: ”بے شک قیامت کی نشانیوں میں سے یہ ہے کہ علم اٹھا لیا جائے گا، جہالت غالب آ جائے گی، شراب پی جائے گی، زنا عام ہو جائے گا، مردوں کی تعداد کم ہو جائے گی اور عورتوں کی کثرت ہو جائے گی، یہاں تک کہ پچاس عورتوں کا نگران و خبرگیر صرف ایک مرد ہو گا۔“ [مسند أبي يعلى الموصلي/مُسْنَدُ أَنَسِ بْنِ مَالِكٍ/حدیث: 3062]

سیدنا انس رضی اللہ عنہ سے روایت ہے کہ میں نے رسول اللہ صلی اللہ علیہ وسلم کو یہ فرماتے ہوئے سنا کہ ”اگر ابنِ آدم کے پاس مال کی دو وادیاں ہوں تو وہ یقیناً تیسری وادی کی طلب کرے گا، اور ابنِ آدم کے پیٹ کو مٹی کے سوا کوئی چیز نہیں بھر سکتی، اور جو شخص اللہ کے حضور توبہ کرتا ہے اللہ اس کی توبہ قبول فرما لیتا ہے۔“ [مسند أبي يعلى الموصلي/مُسْنَدُ أَنَسِ بْنِ مَالِكٍ/حدیث: 3063]

سیدنا انس بن مالک رضی اللہ عنہ سے روایت ہے کہ رسول اللہ صلی اللہ علیہ وسلم نے ارشاد فرمایا: ”قیامت کے دن مومنین کو جمع کیا جائے گا تو وہ اس حوالے سے فکر مند ہوں گے اور کہیں گے: کاش ہم اپنے رب کے حضور کسی کی سفارش لے جائیں تاکہ وہ ہمیں اس موجودہ مقام کی تکلیف سے راحت عطا فرما دے، چنانچہ وہ سیدنا آدم علیہ السلام کے پاس آئیں گے اور کہیں گے: اے آدم! آپ تمام انسانوں کے باپ ہیں، اللہ تعالیٰ نے آپ کو اپنے دستِ قدرت سے پیدا کیا، اپنے فرشتوں سے آپ کو سجدہ کروایا اور آپ کو تمام اشیاء کے نام سکھائے، لہٰذا آپ اپنے رب کے حضور ہماری سفارش فرمائیں تاکہ وہ ہمیں اس جگہ سے راحت عطا فرمائے، وہ فرمائیں گے: میں اس منصب پر فائز نہیں ہوں، اور وہ اپنی اس لغزش کو یاد کریں گے جو درخت کا پھل کھانے کی صورت میں ان سے سرزد ہوئی تھی، وہ فرمائیں گے: تم سیدنا نوح علیہ السلام کے پاس جاؤ جو پہلے رسول ہیں جنہیں اللہ نے مبعوث فرمایا، چنانچہ وہ سیدنا نوح علیہ السلام کے پاس آئیں گے تو وہ فرمائیں گے: میں اس بلند مقام پر نہیں ہوں، اور وہ اپنی اس لغزش کو یاد کریں گے جو انہوں نے اپنے رب سے ایسی بات کا سوال کر کے کی تھی جس کا انہیں علم نہ تھا، وہ فرمائیں گے: تم رحمن کے خلیل سیدنا ابراہیم علیہ السلام کے پاس جاؤ، پس وہ سیدنا ابراہیم علیہ السلام کے پاس آئیں گے تو وہ فرمائیں گے: میں اس لائق نہیں ہوں، اور وہ اپنی ان تین باتوں کو یاد کریں گے جن میں انہوں نے مصلحت کے تحت ظاہری خلافِ واقعہ کلام کیا تھا: ایک ان کا یہ قول ﴿بَلْ فَعَلَهُ كَبِيرُهُمْ هَذَا﴾ ”بلکہ یہ ان کے اس بڑے نے کیا ہے“، دوسرا ان کا یہ قول ﴿إِنِّي سَقِيمٌ﴾ ”میں بیمار ہوں“، اور تیسرا ان کا وہ قول جو انہوں نے ایک جابر بادشاہ کے پاس اپنی زوجہ کے متعلق فرمایا تھا کہ انہیں بتا دینا کہ میں تمہارا بھائی ہوں، کیونکہ میں بھی یہی خبر دوں گا کہ تم میری بہن ہو، اور اللہ کی کتاب کی رو سے ہم آپس میں بھائی بہن ہیں کیونکہ زمین پر ہمارے سوا کوئی دوسرا مومن موجود نہیں، پھر وہ فرمائیں گے: تم سیدنا موسیٰ علیہ السلام کے پاس جاؤ جن سے اللہ نے کلام کیا اور جنہیں تورات عطا فرمائی، چنانچہ وہ سیدنا موسیٰ علیہ السلام کے پاس آئیں گے تو وہ بھی فرمائیں گے: میں اس منصب کے لیے نہیں ہوں، اور وہ اپنی اس لغزش کو یاد کریں گے جو ان سے پہلے سرزد ہوئی تھی، وہ فرمائیں گے: تم اللہ کے بندے، اس کے رسول اور اس کے کلمہ و روح سیدنا عیسیٰ علیہ السلام کے پاس جاؤ، پس وہ سیدنا عیسیٰ علیہ السلام کے پاس آئیں گے تو وہ بھی فرمائیں گے: میں اس کے لیے نہیں ہوں، البتہ تم محمد صلی اللہ علیہ وسلم کے پاس جاؤ جن کے صدقے اللہ نے ان کے اگلے اور پچھلے تمام گناہ معاف فرما دیے ہیں، رسول اللہ صلی اللہ علیہ وسلم نے فرمایا: پس وہ میرے پاس آئیں گے تو میں اپنے رب سے اجازت طلب کروں گا اور مجھے اجازت دے دی جائے گی، جب میں اسے دیکھوں گا تو سجدے میں گر جاؤں گا، اللہ تعالیٰ جب تک چاہے گا مجھے سجدے ہی میں رہنے دے گا، پھر مجھ سے کہا جائے گا: اے محمد! اپنا سر اٹھائیں، کہیے! آپ کی بات سنی جائے گی، سفارش کیجیے! آپ کی سفارش قبول کی جائے گی اور مانگیے! آپ کو عطا کیا جائے گا، چنانچہ میں اپنا سر اٹھاؤں گا اور اپنے رب کی ایسی حمد بیان کروں گا جو وہ مجھے سکھائے گا، پھر میں سفارش کروں گا تو میرے لیے ایک حد مقرر کر دی جائے گی، میں انہیں آگ سے نکال کر جنت میں داخل کروں گا، پھر میں دوسری مرتبہ اپنے رب کی طرف پلٹوں گا اور جب اپنے رب کو دیکھوں گا تو سجدے میں گر پڑوں گا، اللہ جب تک چاہے گا مجھے اسی حال میں رہنے دے گا، پھر مجھ سے کہا جائے گا: محمد! اپنا سر اٹھائیں، کہیے! آپ کی بات سنی جائے گی، سفارش کیجیے! آپ کی سفارش قبول کی جائے گی اور مانگیے! آپ کو عطا کیا جائے گا، چنانچہ میں اپنا سر اٹھاؤں گا اور اپنے رب کی وہ حمد بیان کروں گا جو وہ مجھے سکھائے گا، پھر میں سفارش کروں گا تو میرے لیے ایک حد مقرر کر دی جائے گی، پھر میں انہیں آگ سے نکال کر جنت میں داخل کروں گا، پھر میں تیسری مرتبہ اپنے رب کی طرف رجوع کروں گا اور جب اسے دیکھوں گا تو سجدے میں گر جاؤں گا، اللہ جب تک چاہے گا مجھے اسی حالت میں چھوڑے رکھے گا، پھر مجھ سے کہا جائے گا: محمد! سر اٹھائیں، کہیے! آپ کی بات سنی جائے گی، سفارش کیجیے! آپ کی سفارش مانی جائے گی اور مانگیے! آپ کو دیا جائے گا، پس میں اپنا سر اٹھاؤں گا اور اپنے رب کی وہ حمد کروں گا جو وہ مجھے سکھائے گا، پھر میں سفارش کروں گا تو میرے لیے ایک حد مقرر کر دی جائے گی، چنانچہ میں انہیں آگ سے نکال کر جنت میں داخل کر دوں گا، یہاں تک کہ میں دوبارہ چوتھی مرتبہ اپنے رب کی طرف رجوع کروں گا اور عرض کروں گا: اے میرے رب! اب آگ میں صرف وہی لوگ باقی رہ گئے ہیں جنہیں قرآن نے روک لیا ہے (یعنی جن پر قرآن کے فیصلے کے مطابق ہمیشگی واجب ہو چکی ہے)“، قتادہ رحمہ اللہ نے آیت ﴿عَسَى أَنْ يَبْعَثَكَ رَبُّكَ مَقَامًا مَحْمُودًا﴾ کے متعلق کہا کہ یہی وہ مقامِ محمود ہے جس کا اللہ تبارک و تعالیٰ نے اپنے نبی علیہ السلام سے وعدہ فرمایا ہے۔ [مسند أبي يعلى الموصلي/مُسْنَدُ أَنَسِ بْنِ مَالِكٍ/حدیث: 3064]

سیدنا انس رضی اللہ عنہ سے روایت ہے کہ رسول اللہ صلی اللہ علیہ وسلم سے اس شخص کے متعلق سوال کیا گیا جو نماز کے وقت سویا رہ جائے یا اس سے غافل ہو جائے، تو آپ صلی اللہ علیہ وسلم نے ارشاد فرمایا: ”اس کا کفارہ یہی ہے کہ جب اسے یاد آئے تو وہ اسے ادا کر لے۔“ [مسند أبي يعلى الموصلي/مُسْنَدُ أَنَسِ بْنِ مَالِكٍ/حدیث: 3065]