جمیع بن عمیر رحمہ اللہ بیان کرتے ہیں کہ میں اپنی والدہ کے ہمراہ سیدہ عائشہ رضی اللہ عنہا کی خدمت میں حاضر ہوا تو میری والدہ نے ان سے سیدنا علی رضی اللہ عنہ کے بارے میں دریافت کیا، جس پر سیدہ عائشہ رضی اللہ عنہا نے فرمایا: ”میں نے رسول اللہ صلی اللہ علیہ وسلم کے نزدیک ان سے زیادہ محبوب کسی مرد کو نہیں دیکھا اور نہ ہی رسول اللہ صلی اللہ علیہ وسلم کے نزدیک ان کی اہلیہ (سیدہ فاطمہ رضی اللہ عنہا) سے زیادہ کسی عورت کو محبوب پایا۔“ [مسند أبي يعلى الموصلي/مُسْنَدُ عَائِشَةَ/حدیث: 4857]

سیدہ عائشہ رضی اللہ عنہا سے روایت ہے کہ انہوں نے بیان فرمایا: ”رسول اللہ صلی اللہ علیہ وسلم ایک صاع کی مقدارِ آب سے غسل فرماتے تھے اور ایک مد کی مقدار سے وضو فرمایا کرتے تھے۔“ [مسند أبي يعلى الموصلي/مُسْنَدُ عَائِشَةَ/حدیث: 4858]

سیدہ عائشہ رضی اللہ عنہا سے روایت ہے کہ انہوں نے (خواتین سے) فرمایا: ”تم اپنے شوہروں کو اس بات کا حکم دو کہ وہ (پانی کے ذریعے) اپنے سے پاخانے اور پیشاب کے اثرات کو دھو لیا کریں، کیونکہ میں انہیں (براہِ راست) یہ بات کہنے سے حیا محسوس کرتی ہوں، اور یقیناً رسول اللہ صلی اللہ علیہ وسلم ایسا ہی کیا کرتے تھے۔“ [مسند أبي يعلى الموصلي/مُسْنَدُ عَائِشَةَ/حدیث: 4859]

ابوسلمہ رحمہ اللہ سے روایت ہے کہ میں نے سیدہ عائشہ رضی اللہ عنہا کی خدمت میں حاضر ہو کر عرض کیا: ”اے امی جان! مجھے رسول اللہ صلی اللہ علیہ وسلم کی (تہجد کی) نماز کے متعلق بتائیے؟“ تو انہوں نے فرمایا: ”رسول اللہ صلی اللہ علیہ وسلم کی رات کی نماز، خواہ وہ رمضان میں ہو یا اس کے علاوہ دیگر مہینوں میں، تیرہ رکعت ہوا کرتی تھی جن میں فجر کی دو (سنت) رکعتیں بھی شامل تھیں۔“ میں نے عرض کیا: ”مجھے آپ صلی اللہ علیہ وسلم کے روزوں کے متعلق بتائیے؟“ تو انہوں نے فرمایا: ”آپ صلی اللہ علیہ وسلم (اتنے تسلسل سے) روزہ رکھتے کہ ہم کہتے کہ اب آپ صلی اللہ علیہ وسلم شاید روزے رکھنا نہیں چھوڑیں گے اور (کبھی اتنا) ناغہ فرماتے کہ ہم کہنے لگتے کہ اب آپ صلی اللہ علیہ وسلم شاید روزہ نہیں رکھیں گے، اور میں نے رسول اللہ صلی اللہ علیہ وسلم کو شعبان سے زیادہ کسی اور مہینے میں کثرت سے روزے رکھتے نہیں دیکھا، آپ صلی اللہ علیہ وسلم تقریبًا پورا شعبان ہی روزے رکھتے تھے، یعنی آپ صلی اللہ علیہ وسلم چند ایام کے علاوہ پورا مہینہ شعبان کے روزے رکھا کرتے تھے۔“ [مسند أبي يعلى الموصلي/مُسْنَدُ عَائِشَةَ/حدیث: 4860]

سفیان رحمہ اللہ سے روایت ہے کہ سیدہ عائشہ رضی اللہ عنہا نے فرمایا: ”مجھ پر رمضان کے (قضا) روزے واجب ہوتے تھے، مگر میں شعبان کا مہینہ آنے تک وہ روزے ادا نہ کر پاتی تھی۔“ امام سفیان رحمہ اللہ نے اس کی تشریح میں یہ بیان فرمایا کہ یہ سب اس وجہ سے تھا کہ سیدہ عائشہ رضی اللہ عنہا رسول اللہ صلی اللہ علیہ وسلم کی خدمت اور آپ صلی اللہ علیہ وسلم کے حقِ رفاقت کی موجودگی میں (پورا سال روزے رکھنے سے) حیا محسوس کرتی تھیں۔ [مسند أبي يعلى الموصلي/مُسْنَدُ عَائِشَةَ/حدیث: 4861]

سعد بن ہشام بن عامر رحمہ اللہ سے روایت ہے کہ میں (ابتداءً) حکمرانوں کے پیچھے رہنے والا شخص تھا، تو میرے والد نے مجھے پکڑ کر گھر میں محبوس کر دیا — مبارک رحمہ اللہ کہتے ہیں کہ میرے علم کے مطابق انہوں نے یہ بھی کہا کہ: مجھے بیڑیاں ڈال دیں — اور مجھ سے کہا: ”اللہ کی قسم! تم تب تک باہر نہیں نکلو گے جب تک کہ تم اللہ کی کتاب حفظ نہ کر لو“، چنانچہ میں نے اللہ کی کتاب حفظ کر لی اور اللہ نے مجھے اس سے نفع عطا فرمایا، پھر میرے دل سے دنیا کی رغبت ختم ہو گئی اور میں نے شادی کرنے اور دیگر دنیاوی کاموں کو ناپسند کرنا شروع کر دیا، پھر میں سیدہ عائشہ رضی اللہ عنہا کی خدمت میں حاضر ہوا اور عرض کی کہ میں سعد بن ہشام بن عامر ہوں، تو انہوں نے فرمایا: «رَحِمَ اللَّهُ عَامِرًا» ”اللہ تعالیٰ عامر پر رحم فرمائے، وہ غزوۂ احد کے دن جامِ شہادت نوش کر چکے ہیں“، وہ بیان کرتے ہیں کہ میں نے عرض کی: اے ام المومنین! میں نے دنیا سے کٹ کر تجرد (ترکِ نکاح) کی زندگی گزارنے کا ارادہ کیا ہے، اس لیے آپ سے اس کے بارے میں دریافت کرنے آیا ہوں، تو انہوں نے فرمایا: ”اے ہشام! رہبانیت اختیار نہ کرو کیونکہ اللہ عزوجل نے فرمایا ہے: ﴿لَقَدْ كَانَ لَكُمْ فِي رَسُولِ اللَّهِ أُسْوَةٌ حَسَنَةٌ﴾ اور بلاشبہ رسول اللہ صلی اللہ علیہ وسلم نے نکاح بھی فرمایا اور آپ کی اولاد بھی ہوئی“، وہ کہتے ہیں کہ میں نے عرض کی: اے ام المومنین! مجھے رسول اللہ صلی اللہ علیہ وسلم کے اخلاقِ مبارکہ کے بارے میں بتائیے، انہوں نے فرمایا: ”اے میرے پیارے بیٹے! کیا تم قرآن نہیں پڑھتے؟ اللہ تعالیٰ نے فرمایا ہے: ﴿وَإِنَّكَ لَعَلَى خُلُقٍ عَظِيمٍ﴾ تو محمد صلی اللہ علیہ وسلم کا اخلاق قرآن ہی تھا“، وہ کہتے ہیں کہ میں نے عرض کی: اے ام المومنین! مجھے رسول اللہ صلی اللہ علیہ وسلم کی (تہجد کی) نماز کے بارے میں بتائیے، انہوں نے فرمایا: ”اے میرے بیٹے! رسول اللہ صلی اللہ علیہ وسلم کی نماز کی طاقت بھلا کون رکھ سکتا ہے؟ رسول اللہ صلی اللہ علیہ وسلم جب نماز پڑھتے تو پہلے دو رکعتیں ادا فرماتے، پھر تھوڑی دیر آرام فرماتے، پھر بیدار ہو کر دو دو رکعتیں کر کے پانچ مرتبہ (دس رکعتیں) پڑھتے اور پھر ایک رکعت (وتر) پڑھتے“، یا انہوں نے فرمایا: ”عشاء کے بعد نو رکعتیں یا گیارہ رکعتیں ادا فرماتے (جس کی تفصیل یہ تھی کہ) دو دو رکعتیں کر کے چار مرتبہ پڑھتے اور پھر ایک رکعت (وتر) پڑھتے، پھر جب رسول اللہ صلی اللہ علیہ وسلم عمر رسیدہ ہو گئے اور بدنِ مبارک بھاری ہو گیا تو آپ صلی اللہ علیہ وسلم نے دو دو رکعتیں کر کے (چار) اور پھر ایک رکعت (وتر) پڑھی اور اس کے بعد بیٹھ کر دو رکعتیں ادا فرمائیں“۔ [مسند أبي يعلى الموصلي/مُسْنَدُ عَائِشَةَ/حدیث: 4862]

سیدہ عائشہ رضی اللہ عنہا سے روایت ہے کہ رسول اللہ صلی اللہ علیہ وسلم نے ارشاد فرمایا: ”جس شخص نے اللہ تعالیٰ کی نافرمانی کرنے کی نذر مانی ہو، اسے چاہیے کہ وہ (اسے پورا کر کے) اللہ تعالیٰ کی نافرمانی نہ کرے۔“ [مسند أبي يعلى الموصلي/مُسْنَدُ عَائِشَةَ/حدیث: 4863]

سیدہ عائشہ رضی اللہ عنہا سے روایت ہے کہ رسول اللہ صلی اللہ علیہ وسلم ”جب وضو کے لیے قیام فرماتے تو «يَقُومُ لِلْوُضُوءِ يَكْفَأُ الْإِنَاءَ فَيُسَمِّي، ثُمَّ يُسْبِغُ الْوُضُوءَ» ”وضو کی خاطر اٹھتے وقت برتن کو (پانی لینے کے لیے) ایک جانب جھکاتے، پھر اللہ کا نام لیتے اور اس کے بعد کامل و بھرپور طریقے سے وضو فرماتے تھے“۔“ [مسند أبي يعلى الموصلي/مُسْنَدُ عَائِشَةَ/حدیث: 4864]

جمیع بن عمیر رحمہ اللہ سے روایت ہے کہ ان کی والدہ اور خالہ سیدہ عائشہ رضی اللہ عنہا کی خدمت میں حاضر ہوئیں اور دریافت کیا: ”اے ام المؤمنین! جب آپ میں سے کسی کو حیض آتا تو وہ کیا کرتی تھی؟“ انہوں نے فرمایا: ”وہ اپنے اوپر مضبوطی سے تہبند باندھ لیتی، پھر نبی کریم صلی اللہ علیہ وسلم اس کے پیٹ اور اس سے اوپر کے حصے سے لپٹ جایا کرتے تھے۔“ ان دونوں نے پوچھا: ”آپ صلی اللہ علیہ وسلم غسل کیسے فرماتے تھے؟“ سیدہ عائشہ رضی اللہ عنہا نے فرمایا: ”آپ صلی اللہ علیہ وسلم اپنے دونوں ہاتھوں پر پانی بہاتے، پھر استنجا کرتے، پھر اپنا ہاتھ زمین پر مارتے (رگڑتے)، پھر اپنے سر مبارک پر تین بار پانی بہاتے تھے۔“ سیدہ رضی اللہ عنہا نے مزید فرمایا: ”رہی ہم خواتین، تو ہم مینڈھیوں (چوٹیوں) کی وجہ سے پانچ مرتبہ پانی بہاتی تھیں۔“ ان دونوں نے عرض کیا: ”ہمیں سیدنا علی رضی اللہ عنہ کے بارے میں بتائیے۔“ انہوں نے فرمایا: ”تم اس شخص کے بارے میں کیا پوچھتی ہو جس نے رسول اللہ صلی اللہ علیہ وسلم کے جسدِ مبارک کے اس مقام پر ہاتھ رکھا جہاں آپ صلی اللہ علیہ وسلم کی روحِ مبارک قبض ہوئی، تو آپ صلی اللہ علیہ وسلم کی روح ان کے ہاتھ میں نکلی، اور انہوں نے اس ہاتھ کو اپنے چہرے پر پھیر لیا؟ نیز جب لوگوں نے آپ صلی اللہ علیہ وسلم کی تدفین کے متعلق اختلاف کیا تو انہوں نے ہی فرمایا تھا: ”بے شک اللہ تعالیٰ کے نزدیک سب سے پسندیدہ جگہ وہ ہے جہاں اس کے نبی کی روح قبض کی جائے۔““ ان دونوں نے دریافت کیا: ”پھر آپ ان کے خلاف (میدانِ جنگ میں) کیوں نکلیں؟“ سیدہ رضی اللہ عنہا نے فرمایا: ”وہ ایک ایسا معاملہ تھا جو (تقدیر میں) طے ہو چکا تھا، میری تو یہ تمنا ہے کہ کاش میں اس کے بدلے روئے زمین کی ہر چیز فدیہ میں دے دیتی۔“ [مسند أبي يعلى الموصلي/مُسْنَدُ عَائِشَةَ/حدیث: 4865]

سیدہ عائشہ رضی اللہ عنہا سے روایت ہے کہ رسول اللہ صلی اللہ علیہ وسلم نے ارشاد فرمایا: ”میں اور یتیم کی کفالت کرنے والا جنت میں ان دو انگلیوں کی مانند ہوں گے“ - اور آپ صلی اللہ علیہ وسلم نے اپنی شہادت کی انگلی اور درمیان والی انگلی کو باہم ملا کر اشارہ فرمایا - ”اور یتیم، بیوہ اور مسکین کی ضروریات کی فراہمی کے لیے تگ و دو کرنے والا اللہ کی راہ میں جہاد کرنے والے اور اس روزے دار و شب بیدار کی مانند ہے جو (عبادت میں) کبھی سستی یا تھکن محسوس نہ کرے۔“ [مسند أبي يعلى الموصلي/مُسْنَدُ عَائِشَةَ/حدیث: 4866]