سیدہ عائشہ رضی اللہ عنہا سے روایت ہے کہ رسول اللہ صلی اللہ علیہ وسلم نے فرمایا: ”تم اپنی نمازوں کا کچھ حصہ اپنے گھروں میں بھی (ادا) کیا کرو۔“ [مسند أبي يعلى الموصلي/مُسْنَدُ عَائِشَةَ/حدیث: 4867]

قیس بن ابی حازم رحمہ اللہ سے روایت ہے کہ سیدہ عائشہ رضی اللہ عنہا بنو عامر کے ایک چشمے کے پاس سے گزریں جسے 'حوأب' کہا جاتا تھا، وہاں کتوں نے ان پر بھونکنا شروع کر دیا، تو آپ رضی اللہ عنہا نے دریافت فرمایا کہ ”یہ کون سا مقام ہے؟“ لوگوں نے عرض کیا کہ یہ بنو عامر کا چشمہ ہے۔ یہ سن کر آپ رضی اللہ عنہا نے فرمایا کہ ”مجھے واپس لے چلو، مجھے واپس لے چلو! کیونکہ میں نے رسول اللہ صلی اللہ علیہ وسلم کو یہ فرماتے ہوئے سنا تھا کہ: «كَيْفَ بِإِحْدَاكُنَّ إِذَا نَبَحَتْ عَلَيْهَا كِلَابُ الْحَوْأَبِ؟» ”تم میں سے کسی ایک کا اس وقت کیا حال ہوگا جب اس پر حوأب کے کتے بھونکیں گے؟““ [مسند أبي يعلى الموصلي/مُسْنَدُ عَائِشَةَ/حدیث: 4868]

سیدہ عائشہ رضی اللہ عنہا سے روایت ہے کہ میں نے نبی کریم صلی اللہ علیہ وسلم سے اس شخص کے بارے میں دریافت کیا جو اپنے جوتوں کے ساتھ کسی گندگی یا ناپاکی کو روند دیتا ہے، تو آپ صلی اللہ علیہ وسلم نے ارشاد فرمایا: «التُّرَابُ لَهُمَا طُهُورٌ» ”مٹی ان دونوں (جوتوں) کے لیے پاکیزگی کا ذریعہ ہے“۔ [مسند أبي يعلى الموصلي/مُسْنَدُ عَائِشَةَ/حدیث: 4869]

سیدہ عائشہ رضی اللہ عنہا سے روایت ہے کہ میں نے عرض کی: ”اے اللہ کے رسول صلی اللہ علیہ وسلم ! مجھے ابن جدعان کے متعلق بتائیے؟“ نبی کریم صلی اللہ علیہ وسلم نے دریافت فرمایا: ”اس کا کیا معاملہ تھا؟“ میں نے عرض کی: ”وہ فربہ کوہان والے قیمتی اونٹ ذبح کرتا (تاکہ لوگوں کو کھلائے)، پڑوسی کی عزت و تکریم کرتا، مہمان نوازی کرتا، سچ بولتا، عہد و پیمان کو پورا کرتا، صلہ رحمی کرتا، قیدیوں کو آزاد کرواتا، کھانا کھلاتا اور امانتیں ادا کرتا تھا۔“ آپ صلی اللہ علیہ وسلم نے دریافت فرمایا: ”کیا اس نے کبھی ایک دن بھی یہ کہا تھا: «اللَّهُمَّ إِنِّي أَعُوذُ بِكَ مِنْ نَارِ جَهَنَّمَ» ”اے اللہ! میں جہنم کی آگ سے تیری پناہ مانگتا ہوں“؟“ میں نے عرض کی: ”نہیں۔ اور اسے تو یہ بھی معلوم نہیں تھا کہ جہنم کیا ہے؟“ آپ صلی اللہ علیہ وسلم نے فرمایا: ”تب اسے ان اعمال کا کوئی فائدہ نہیں ہوگا۔“ [مسند أبي يعلى الموصلي/مُسْنَدُ عَائِشَةَ/حدیث: 4870]

ابن ابی ملیکہ رحمہ اللہ سے روایت ہے کہ سیدہ عائشہ رضی اللہ عنہا ایک دن قبرستان سے واپس آ رہی تھیں تو میں نے ان سے عرض کیا کہ اے ام المؤمنین! آپ کہاں سے تشریف لا رہی ہیں؟ انہوں نے فرمایا: ”میں اپنے بھائی سیدنا عبد الرحمن رضی اللہ عنہ کی قبر سے آ رہی ہوں۔“ میں نے ان سے پوچھا کہ اے ام المؤمنین! ”کیا رسول اللہ صلی اللہ علیہ وسلم نے قبروں کی زیارت سے منع نہیں فرمایا تھا؟“ انہوں نے جواب دیا: ”جی ہاں! آپ صلی اللہ علیہ وسلم نے پہلے اس سے منع فرمایا تھا، (لیکن بعد میں اجازت دے دی تھی) جس طرح آپ صلی اللہ علیہ وسلم نے قربانی کا گوشت تین دن سے زیادہ کھانے سے منع فرمایا تھا، پھر بعد میں اس کے کھانے کا حکم دے دیا تھا، اور آپ صلی اللہ علیہ وسلم نے مٹی کے سبز گھڑے کی نبیذ پینے سے بھی منع فرمایا تھا۔“ [مسند أبي يعلى الموصلي/مُسْنَدُ عَائِشَةَ/حدیث: 4871]

سیدہ عائشہ رضی اللہ عنہا سے روایت ہے کہ انہوں نے فرمایا: ”میں اور نبی اکرم صلی اللہ علیہ وسلم ایک ہی برتن سے غسل کیا کرتے تھے اور آپ صلی اللہ علیہ وسلم (پانی لینا) مجھ سے پہلے شروع فرماتے تھے۔“ [مسند أبي يعلى الموصلي/مُسْنَدُ عَائِشَةَ/حدیث: 4872]

عمرہ رحمہ اللہ سے روایت ہے کہ سیدہ عائشہ رضی اللہ عنہا سے دریافت کیا گیا کہ رسول اللہ صلی اللہ علیہ وسلم اپنے گھر میں کیا کام کاج کیا کرتے تھے؟ تو انہوں نے جواب دیا کہ ”آپ صلی اللہ علیہ وسلم بھی عام انسانوں کی طرح ایک انسان تھے، اپنے کپڑے خود صاف کر لیتے، اپنی بکری کا دودھ دوہ لیتے اور اپنے ذاتی کام خود ہی انجام دیا کرتے تھے“۔ [مسند أبي يعلى الموصلي/مُسْنَدُ عَائِشَةَ/حدیث: 4873]

سیدہ عائشہ رضی اللہ عنہا سے روایت ہے کہ نبی کریم صلی اللہ علیہ وسلم نے ارشاد فرمایا: ”مسلمانوں میں سے جو شخص بھی وفات پا جائے اور اس کی نمازِ جنازہ مسلمانوں کی ایسی جماعت ادا کرے جس کی تعداد سو افراد تک پہنچتی ہو اور وہ سب اس کے حق میں اللہ سے سفارش کریں، تو اس کے حق میں ان کی سفارش لازمی طور پر قبول کی جاتی ہے۔“ [مسند أبي يعلى الموصلي/مُسْنَدُ عَائِشَةَ/حدیث: 4874]

سیف بن عبد اللہ الحمیری رحمہ اللہ سے روایت ہے کہ وہ بیان کرتے ہیں کہ میں اور میرے ساتھ چند دیگر افراد سیدہ عائشہ رضی اللہ عنہا کی خدمت میں حاضر ہوئے، پھر ہم نے ان سے اس شخص کے متعلق سوال کیا جو (وضو کے بعد) اپنی شرمگاہ کو چھو لیتا ہے، تو انہوں نے جواب دیا کہ میں نے رسول اللہ صلی اللہ علیہ وسلم کو یہ فرماتے ہوئے سنا ہے: «مَا أُبَالِي إِيَّاهُ مَسَسْتُ أَوْ أَنْفِي» ”مجھے اس کی کوئی پرواہ نہیں (یعنی وضو نہیں ٹوٹتا) کہ میں نے اسے چھوا ہے یا اپنی ناک کو۔“ [مسند أبي يعلى الموصلي/مُسْنَدُ عَائِشَةَ/حدیث: 4875]

سیدہ عائشہ رضی اللہ عنہا سے روایت ہے کہ ان سے دریافت کیا گیا کہ نبی کریم صلی اللہ علیہ وسلم اپنے گھر میں کیا کام کاج کیا کرتے تھے؟ تو انہوں نے جواباً ارشاد فرمایا: ”آپ صلی اللہ علیہ وسلم اپنا کپڑا خود سی لیتے تھے، اپنے جوتے کی مرمت کر لیا کرتے تھے اور وہ تمام کام کاج کرتے تھے جو ایک عام مرد اپنے گھر میں انجام دیتا ہے۔“ [مسند أبي يعلى الموصلي/مُسْنَدُ عَائِشَةَ/حدیث: 4876]