سیدہ ام سلمہ رضی اللہ عنہا سے روایت ہے کہ اللہ کے نبی صلی اللہ علیہ وسلم ہر صبح اپنی ازواجِ مطہرات کے پاس تشریف لاتے اور انہیں سلام کرتے تھے، ان میں سے ایک زوجہ مطہرہ کے پاس شہد ہوتا تھا، چنانچہ جب آپ صلی اللہ علیہ وسلم ان کے پاس تشریف لے جاتے تو وہ آپ صلی اللہ علیہ وسلم کی خدمت میں کچھ شہد پیش کر دیتیں جس کی وجہ سے آپ صلی اللہ علیہ وسلم ان کے پاس کچھ دیر قیام فرماتے، سیدہ عائشہ رضی اللہ عنہا اور سیدہ حفصہ رضی اللہ عنہا کو یہ بات گراں گزری، چنانچہ جب آپ صلی اللہ علیہ وسلم ان دونوں کے پاس تشریف لائے تو انہوں نے عرض کیا: ”اے اللہ کے رسول صلی اللہ علیہ وسلم ! ہمیں آپ سے مغافیر (ایک بدبودار گوند) کی بو آتی ہے“، راوی کہتے ہیں کہ اس بات کے نتیجے میں آپ صلی اللہ علیہ وسلم نے وہ شہد نوش فرمانا چھوڑ دیا۔ [مسند أبي يعلى الموصلي/مُسْنَدُ أُمِّ سَلَمَةَ زَوْجِ النَّبِيِّ صَلَّى اللهُ عَلَيْهِ وَسَلَّمَ/حدیث: 6929]

سیدہ ام سلمہ رضی اللہ عنہا سے روایت ہے کہ رسول اللہ صلی اللہ علیہ وسلم جب صبح کی نماز ادا فرما کر سلام پھیرتے تو یہ دعا مانگتے: «اللَّهُمَّ إِنِّي أَسْأَلُكَ عِلْمًا نَافِعًا، وَرِزْقًا طَيِّبًا، وَعَمَلًا مُتَقَبَّلًا» ”اے اللہ! میں تجھ سے نفع بخش علم، پاکیزہ رزق اور (بارگاہِ الٰہی میں) مقبول ہونے والے عمل کا سوال کرتا ہوں۔“ [مسند أبي يعلى الموصلي/مُسْنَدُ أُمِّ سَلَمَةَ زَوْجِ النَّبِيِّ صَلَّى اللهُ عَلَيْهِ وَسَلَّمَ/حدیث: 6930]

سیدہ ام سلمہ رضی اللہ عنہا سے روایت ہے کہ میں نے رسول اللہ صلی اللہ علیہ وسلم کو یہ فرماتے ہوئے سنا: ”سیدنا علی رضی اللہ عنہ سے کوئی منافق محبت نہیں رکھے گا اور نہ ہی کوئی حقیقی مومن ان سے بغض و عداوت رکھے گا۔“ [مسند أبي يعلى الموصلي/مُسْنَدُ أُمِّ سَلَمَةَ زَوْجِ النَّبِيِّ صَلَّى اللهُ عَلَيْهِ وَسَلَّمَ/حدیث: 6931]

سیدہ ام سلمہ رضی اللہ عنہا (زوجہ نبی صلی اللہ علیہ وسلم ) سے مروی ہے کہ انہوں نے ام کلثوم بنت عبد اللہ بن زمعہ رحمہا اللہ کو پیتل کا ایک لگن (برتن) دیا اور فرمایا کہ ”رسول اللہ صلی اللہ علیہ وسلم اس برتن کے پانی سے غسل فرمایا کرتے تھے“، طلحہ رحمہ اللہ بیان کرتے ہیں کہ ”پھر ام کلثوم رحمہا اللہ نے وہ برتن مجھے دکھایا، وہ تقریباً ایک صاع کے برابر یا اس سے تھوڑا بڑا تھا۔“ [مسند أبي يعلى الموصلي/مُسْنَدُ أُمِّ سَلَمَةَ زَوْجِ النَّبِيِّ صَلَّى اللهُ عَلَيْهِ وَسَلَّمَ/حدیث: 6932]

سیدہ ام سلمہ رضی اللہ عنہا سے روایت ہے کہ انہوں نے فرمایا: ”رسول اللہ صلی اللہ علیہ وسلم کی وفات اس حال میں ہوئی کہ فرض نماز کے علاوہ آپ صلی اللہ علیہ وسلم کی اکثر نمازیں بیٹھ کر ہوا کرتی تھیں، اور آپ صلی اللہ علیہ وسلم کے نزدیک سب سے پسندیدہ عمل وہ تھا جس پر مداومت اختیار کی جائے اگرچہ وہ مقدار میں تھوڑا ہی کیوں نہ ہو۔“ [مسند أبي يعلى الموصلي/مُسْنَدُ أُمِّ سَلَمَةَ زَوْجِ النَّبِيِّ صَلَّى اللهُ عَلَيْهِ وَسَلَّمَ/حدیث: 6933]

سیدہ ام سلمہ رضی اللہ عنہا سے روایت ہے کہ انہوں نے (ام موسیٰ رحمہ اللہ کے سامنے) فرمایا: ”اس ذات کی قسم جس کی قسم کھائی جاتی ہے! سیدنا علی رضی اللہ عنہ رسول اللہ صلی اللہ علیہ وسلم سے آخری ملاقات اور قربت کے اعتبار سے تمام لوگوں میں سب سے زیادہ قریب تھے،“ وہ بیان کرتی ہیں کہ جس روز رسول اللہ صلی اللہ علیہ وسلم کی روح قبض کی گئی آپ صلی اللہ علیہ وسلم سیدہ عائشہ رضی اللہ عنہا کے گھر میں تشریف فرما تھے، تو رسول اللہ صلی اللہ علیہ وسلم اس صبح بار بار یہ دریافت فرماتے رہے: ”کیا علی آ گئے ہیں؟“ سیدہ ام سلمہ رضی اللہ عنہا کہتی ہیں کہ میرا گمان ہے کہ آپ صلی اللہ علیہ وسلم نے انہیں کسی ضرورت سے کہیں بھیجا ہوا تھا، چنانچہ وہ کچھ دیر بعد تشریف لے آئے تو ہم نے محسوس کیا کہ آپ صلی اللہ علیہ وسلم کو ان سے کوئی نجی بات کرنی ہے، اس لیے ہم سب کمرے سے باہر نکل گئیں اور دروازے کے پاس بیٹھ گئیں، میں ان سب میں دروازے کے سب سے زیادہ قریب تھی، پھر سیدنا علی رضی اللہ عنہ آپ صلی اللہ علیہ وسلم پر جھک گئے اور آپ صلی اللہ علیہ وسلم ان سے سرگوشی اور راز و نیاز کی باتیں کرنے لگے، پھر آپ صلی اللہ علیہ وسلم کی اسی دن وفات ہو گئی۔ [مسند أبي يعلى الموصلي/مُسْنَدُ أُمِّ سَلَمَةَ زَوْجِ النَّبِيِّ صَلَّى اللهُ عَلَيْهِ وَسَلَّمَ/حدیث: 6934]

سیدہ ام سلمہ رضی اللہ عنہا سے روایت ہے کہ رسول اللہ صلی اللہ علیہ وسلم ہمارے ہاں تشریف لائے اور میرے پاس ایک بچہ موجود تھا جو تکلیف میں مبتلا تھا، آپ صلی اللہ علیہ وسلم نے دریافت فرمایا: ”اسے کیا ہوا ہے؟“ ہم نے عرض کی: ہمیں اندیشہ ہے کہ اسے نظرِ بد لگ گئی ہے، تو آپ صلی اللہ علیہ وسلم نے ارشاد فرمایا: ”تم اسے نظرِ بد کے اثرات زائل کرنے کے لیے دم کیوں نہیں کرواتے؟“ [مسند أبي يعلى الموصلي/مُسْنَدُ أُمِّ سَلَمَةَ زَوْجِ النَّبِيِّ صَلَّى اللهُ عَلَيْهِ وَسَلَّمَ/حدیث: 6935]

سیدہ ام سلمہ رضی اللہ عنہا سے روایت ہے کہ رسول اللہ صلی اللہ علیہ وسلم نے اپنے مرضِ الوفات میں عمومی طور پر یہی وصیت فرمائی تھی کہ: «الصَّلَاةُ وَمَا مَلَكَتْ أَيْمَانُكُمْ» ”نماز کی پابندی کرنا اور اپنے زیرِ دستوں (غلاموں اور لونڈیوں) کے حقوق کا خیال رکھنا“، یہاں تک کہ نقاہت کی وجہ سے آپ صلی اللہ علیہ وسلم یہ کلمات اپنے سینہ مبارک میں دہرانے لگے اور زبانِ مبارک سے ان کا واضح اظہار ممکن نہ رہا تھا۔ [مسند أبي يعلى الموصلي/مُسْنَدُ أُمِّ سَلَمَةَ زَوْجِ النَّبِيِّ صَلَّى اللهُ عَلَيْهِ وَسَلَّمَ/حدیث: 6936]

سیدہ ام سلمہ رضی اللہ عنہا سے روایت ہے کہ ایک مرتبہ رسول اللہ صلی اللہ علیہ وسلم میرے گھر میں لیٹے ہوئے تھے کہ اچانک آپ صلی اللہ علیہ وسلم سمٹ کر (چونک کر) بیٹھ گئے جبکہ آپ صلی اللہ علیہ وسلم «إِنَّا لِلَّهِ وَإِنَّا إِلَيْهِ رَاجِعُونَ» ”بے شک ہم اللہ ہی کے ہیں اور ہمیں اسی کی طرف لوٹ کر جانا ہے“ پڑھ رہے تھے، میں نے عرض کیا: میرے ماں باپ آپ پر فدا ہوں، کیا بات ہے کہ آپ کلمہ استرجاع پڑھ رہے ہیں؟ آپ صلی اللہ علیہ وسلم نے ارشاد فرمایا: ”میری امت کے ایک ایسے لشکر کے سبب (پریشان ہوں) جو شام کی سمت سے آئے گا اور بیت اللہ (میں پناہ لینے والے) ایک شخص کا قصد کرے گا، اللہ تعالیٰ اس شخص کو ان سے محفوظ رکھے گا، یہاں تک کہ جب وہ لشکر ذوالحلیفہ کے مقام بیداء پر پہنچے گا تو ان سب کو زمین میں دھنسا دیا جائے گا حالانکہ ان کے (نکلنے کے) مقاصد و احوال جداگانہ ہوں گے“، میں نے عرض کیا: میرے باپ آپ پر فدا ہوں، ان سب کو ایک ساتھ کیسے دھنسا دیا جائے گا جبکہ ان کی نیتیں اور اسباب مختلف ہوں گے؟ آپ صلی اللہ علیہ وسلم نے (تین مرتبہ) ارشاد فرمایا: ”ان میں کچھ وہ بھی ہوں گے جنہیں (ساتھ چلنے پر) مجبور کیا گیا ہوگا، ان میں سے کچھ وہ ہوں گے جنہیں مجبور کیا گیا ہوگا، ان میں سے کچھ وہ ہوں گے جنہیں مجبور کیا گیا ہوگا“۔ [مسند أبي يعلى الموصلي/مُسْنَدُ أُمِّ سَلَمَةَ زَوْجِ النَّبِيِّ صَلَّى اللهُ عَلَيْهِ وَسَلَّمَ/حدیث: 6937]

سیدہ عائشہ رضی اللہ عنہا سے روایت ہے کہ نبی کریم صلی اللہ علیہ وسلم سے اسی کے مثل (سابقہ حدیث کی طرح) مروی ہے۔ [مسند أبي يعلى الموصلي/مُسْنَدُ أُمِّ سَلَمَةَ زَوْجِ النَّبِيِّ صَلَّى اللهُ عَلَيْهِ وَسَلَّمَ/حدیث: 6938]