سیدنا ابو سعید خدری رضی اللہ عنہ بیان کرتے ہیں کہ میں نے عرض کیا: ”اے اللہ کے رسول! لوگوں میں سب سے سخت آزمائش کس پر آتی ہے؟“ آپ صلی اللہ علیہ وسلم نے فرمایا: ”انبیاء پر۔“ میں نے عرض کیا: ”پھر کس پر؟“ آپ صلی اللہ علیہ وسلم نے فرمایا: ”پھر نیک لوگوں پر۔ ان میں سے کوئی فقر کی آزمائش میں مبتلا کیا جاتا ہے یہاں تک کہ اسے ایک کھجور یا اسی جیسی کوئی چیز ہی ملتی ہے، اور ان میں سے کوئی جوؤں کی آزمائش میں ڈالا جاتا ہے یہاں تک کہ وہ جوئیں پھینکتا رہتا ہے، اور ان میں سے ہر ایک آزمائش پر اس سے زیادہ خوش ہوتا تھا جتنا وہ خوشحالی پر خوش ہوتا تھا۔“
امام طبرانی رحمہ اللہ فرماتے ہیں: ”اس حدیث کو زید بن اسلم سے صرف ہشام بن سعد نے روایت کیا ہے۔“ [المعجم الأوسط/بَابُ الْمِيمِ/حدیث: 9047]

سیدنا جابر رضی اللہ عنہما سے روایت ہے کہ قبیلہ ثقیف کے ایک آدمی نے شراب حرام ہو جانے کے بعد رسول اللہ صلی اللہ علیہ وسلم کو شراب کی ایک مشک تحفے میں دی، تو رسول اللہ صلی اللہ علیہ وسلم نے اس کے بارے میں حکم دیا اور اسے پھاڑ دیا گیا (اور شراب بہا دی گئی)۔ ایک آدمی نے عرض کیا: ”کاش آپ حکم دیتے تو اسے بیچ دیا جاتا۔“ تو رسول اللہ صلی اللہ علیہ وسلم نے فرمایا: ”جس ذات نے اس کا پینا حرام کیا ہے اسی نے اس کا بیچنا بھی حرام کیا ہے۔“
امام طبرانی رحمہ اللہ فرماتے ہیں: ”اس حدیث کو محمد بن زید سے صرف ابن لہیعہ نے روایت کیا ہے۔“ [المعجم الأوسط/بَابُ الْمِيمِ/حدیث: 9048]

سیدنا جابر رضی اللہ عنہما سے روایت ہے کہ رسول اللہ صلی اللہ علیہ وسلم نے فرمایا: ”یومِ عرفہ کو (عرفات سے) اس وقت تک روانہ نہ ہو جب تک امام روانہ نہ ہو۔“
امام طبرانی رحمہ اللہ فرماتے ہیں: ”اس حدیث کو محمد بن منکدر سے صرف ابن لہیعہ نے روایت کیا ہے۔“ [المعجم الأوسط/بَابُ الْمِيمِ/حدیث: 9049]

سیدنا جابر رضی اللہ عنہما سے روایت ہے کہ رسول اللہ صلی اللہ علیہ وسلم یہ دعا فرمایا کرتے تھے: «اللَّهُمَّ إِنِّي أَسْأَلُكَ عِلْمًا نَافِعًا، وَأَعُوذُ بِكَ مِنْ عِلْمٍ لَا يَنْفَعُ» ”اے اللہ! میں تجھ سے نفع بخش علم کا سوال کرتا ہوں، اور ایسے علم سے تیری پناہ مانگتا ہوں جو نفع نہ دے۔“ [المعجم الأوسط/بَابُ الْمِيمِ/حدیث: 9050]

سیدنا جابر رضی اللہ عنہما سے روایت ہے کہ ایک خاتون اور اس کے شوہر کے درمیان جھگڑا تھا، چنانچہ وہ دونوں رسول اللہ صلی اللہ علیہ وسلم کے پاس آئے۔ عورت نے کہا: ”اس ذات کی قسم جس نے آپ صلی اللہ علیہ وسلم کو حق کے ساتھ مبعوث فرمایا! یہ میرا شوہر ہے اور روئے زمین پر مجھے اس سے زیادہ ناپسندیدہ کوئی نہیں۔“ اور شوہر نے کہا: ”اس ذات کی قسم جس نے آپ صلی اللہ علیہ وسلم کو حق کے ساتھ مبعوث فرمایا! یہ میری بیوی ہے اور زمین پر مجھے اس سے زیادہ ناپسندیدہ کوئی چیز نہیں۔“ تو رسول اللہ صلی اللہ علیہ وسلم نے انہیں حکم دیا کہ وہ آپ صلی اللہ علیہ وسلم کے قریب آ جائیں، پھر آپ صلی اللہ علیہ وسلم نے ان دونوں کے لیے دعا فرمائی۔ پھر وہ دونوں آپ صلی اللہ علیہ وسلم کے پاس سے جدا نہیں ہوئے تھے کہ عورت کہنے لگی: ”اس ذات کی قسم جس نے آپ صلی اللہ علیہ وسلم کو حق کے ساتھ مبعوث فرمایا! اللہ نے میرے نزدیک اس (میرے شوہر) سے زیادہ محبوب کوئی چیز پیدا نہیں کی۔“ اور شوہر نے کہا: ”اس ذات کی قسم جس نے آپ صلی اللہ علیہ وسلم کو حق کے ساتھ مبعوث فرمایا! اللہ نے میرے نزدیک اس (میری بیوی) سے زیادہ محبوب کوئی چیز پیدا نہیں کی۔“
امام طبرانی رحمہ اللہ فرماتے ہیں: ”اس حدیث کو ابن المنکدر سے ابن لہیعہ کے سوا کسی نے روایت نہیں کیا۔“ [المعجم الأوسط/بَابُ الْمِيمِ/حدیث: 9051]

عاصم بن عمر بن قتادہ رحمہ اللہ بیان کرتے ہیں کہ سیدنا جابر بن عبد اللہ رضی اللہ عنہما ان کی عیادت کے لیے تشریف لائے، پھر فرمایا: ”میں اس وقت تک یہاں سے نہیں ہٹوں گا جب تک تم سینگی نہ لگوا لو، کیونکہ میں نے رسول اللہ صلی اللہ علیہ وسلم کو فرماتے ہوئے سنا ہے: ”سینگی لگوانا شفا ہے۔““ [المعجم الأوسط/بَابُ الْمِيمِ/حدیث: 9052]

سیدنا جابر بن عبد اللہ رضی اللہ عنہما بیان کرتے ہیں کہ میں نے فتحِ مکہ کے سال رسول اللہ صلی اللہ علیہ وسلم کو فرماتے ہوئے سنا: ”بے شک اللہ تعالیٰ نے شراب، مردار، خنزیر اور بتوں کی خرید و فروخت کو حرام قرار دیا ہے۔“ عرض کیا گیا: ”اے اللہ کے رسول! مردار کی چربیوں کے بارے میں آپ کا کیا ارشاد ہے؟ کیونکہ ان سے کشتیوں پر روغن کیا جاتا ہے، کھالوں کو چکنا کیا جاتا ہے اور لوگ ان سے چراغ جلاتے ہیں؟“ تو آپ صلی اللہ علیہ وسلم نے فرمایا: ”یہ حرام ہے۔“ پھر اسی موقع پر رسول اللہ صلی اللہ علیہ وسلم نے فرمایا: ”اللہ یہود کو تباہ کرے! اللہ نے ان پر چربی حرام کی تھی تو انہوں نے اسے پگھلایا، پھر اسے بیچا اور اس کی قیمت کھائی۔“ [المعجم الأوسط/بَابُ الْمِيمِ/حدیث: 9053]

سیدنا جابر بن عبد اللہ رضی اللہ عنہما بیان کرتے ہیں کہ رسول اللہ صلی اللہ علیہ وسلم نے بلی کی قیمت (کھانے) کو حرام قرار دیا۔ [المعجم الأوسط/بَابُ الْمِيمِ/حدیث: 9054]

سیدنا جابر رضی اللہ عنہما سے روایت ہے کہ نبی کریم صلی اللہ علیہ وسلم نے فرمایا: ”حکمران کو ملنے والے تحائف خیانت (کے مال) میں شمار ہیں۔“ [المعجم الأوسط/بَابُ الْمِيمِ/حدیث: 9055]

سیدنا جابر رضی اللہ عنہما سے روایت ہے کہ رسول اللہ صلی اللہ علیہ وسلم نے مخابرہ، مزابنہ اور محاقلہ سے منع فرمایا۔ مخابرہ یہ ہے کہ زمین کو (بغیر درختوں کے) خالی زمین کی بنیاد پر تہائی، چوتھائی یا آدھے حصے کی پیداوار کے عوض بٹائی پر دیا جائے۔ مزابنہ یہ ہے کہ تازہ کھجور کو خشک کھجور کے بدلے بیچا جائے اور درخت پر لگے انگور کو کشمش کے بدلے بیچا جائے۔ اور محاقلہ یہ ہے کہ کھڑی فصل کو اس کی جڑوں پر ہی اناج کے بدلے بیچا جائے۔ [المعجم الأوسط/بَابُ الْمِيمِ/حدیث: 9056]