اللہ عزوجل کے اس ارشاد کے بیان میں کہ ”بھلا کیا آپ نے اس شخص کے حال پر غور کیا جس نے اپنی خواہشِ نفس کو اپنا معبود بنا رکھا ہے، اور اللہ نے اسے (اس کی حالت کے) علم کے باوجود گمراہی میں چھوڑ دیا، اور اس کے کان اور اس کے دل پر مہر لگا دی، اور اس کی آنکھ پر پردہ ڈال دیا، پھر اللہ (کے چھوڑ دینے) کے بعد اسے کون ہدایت دے سکتا ہے؟ کیا تم پھر بھی نصیحت حاصل نہیں کرتے؟“

اللہ تعالیٰ کے اس ارشاد کے بیان میں کہ ”اور ان منکرینِ آخرت نے کہا کہ ہماری زندگی تو بس یہی دنیاوی زندگی ہے، ہم مرتے ہیں اور جیتے ہیں اور ہمیں زمانے کی گردش کے سوا کوئی ہلاک نہیں کرتا، حالانکہ انہیں اس حقیقت کا قطعاً کوئی علم نہیں ہے، وہ تو محض ظن و تخمین سے کام لے رہے ہیں۔“

اللہ عزوجل کے اس ارشادِ گرامی کا بیان کہ ”بہر کیف وہ لوگ جو ایمان لائے اور انہوں نے نیک اعمال کیے، تو ان کا رب انہیں اپنی رحمت کے سایے میں داخل فرمائے گا، یہی وہ صریح اور واضح کامیابی ہے“۔

اللہ تعالیٰ کے اس فرمان کے بیان میں کہ ”اور کہہ دیا جائے گا کہ آج ہم تمہیں اسی طرح (اپنی رحمت سے) فراموش کر دیں گے جیسے تم نے اپنے اس دن کی پیشی کو فراموش کر دیا تھا، اور تمہارا ٹھکانا آگ ہے اور تمہارا کوئی بھی مددگار نہیں ہے“۔

اللہ تعالیٰ کے اس ارشادِ گرامی کے بیان میں ہے کہ ”اور آسمانوں اور زمین میں تمام تر عظمت و کبریائی اسی کے لیے خاص ہے، اور وہی نہایت غالب اور بڑی حکمت والا ہے“ (۳۷)۔