سیدنا جابر رضی اللہ عنہ فرماتے ہیں کہ رسول اللہ صلی اللہ علیہ وسلم نے فرمایا: ”دو دانت والا قربانی کرو۔ اگر تمہیں تنگی ہو جائے تو پھر بھیڑ کا جذعہ ذبح کرو۔“ [السنن الكبرى للبيهقي/كتاب الحج/حدیث: 10164]

عاصم بن کلیب اپنے والد سے نقل فرماتے ہیں کہ ہمارے ساتھ غزوہ میں نبی صلی اللہ علیہ وسلم کے صحابی مجاشع بن مسعود رضی اللہ عنہما تھے، بکریاں کم یاب ہو گئیں تو انہوں نے فرمایا: میں نے رسول اللہ صلی اللہ علیہ وسلم سے سنا، آپ صلی اللہ علیہ وسلم فرماتے تھے: ” «الْجَذَعُ» ”جزعہ“ بھی کفایت کر جاتا ہے جیسے دو دانت والا یعنی «الثَّنِيُّ» ”مثنیٰ“ کفایت کر جاتا ہے۔“ [السنن الكبرى للبيهقي/كتاب الحج/حدیث: 10165]

اللہ عزوجل کے اس فرمان کی وجہ سے: ﴿ثُمَّ مَحِلُّهَا إِلَى الْبَيْتِ الْعَتِيقِ﴾ ”پھر ان (قربانی کے جانوروں) کے ذبح ہونے کی جگہ اسی قدیم گھر (بیت اللہ) کے پاس ہے۔“ [سورة الحج: 33] [السنن الكبرى للبيهقي/كتاب الحج/حدیث: Q10166]

اللہ عزوجل کے اس فرمان کی وجہ سے: ﴿ثُمَّ مَحِلُّهَا إِلَى الْبَيْتِ الْعَتِيقِ﴾ ”پھر ان (قربانی کے جانوروں) کے ذبح ہونے کی جگہ اسی قدیم گھر (بیت اللہ) کے پاس ہے۔“ [سورة الحج: 33] [السنن الكبرى للبيهقي/كتاب الحج/حدیث: 10166]

سیدنا عمرو بن عبداللہ انصاری رحمہ اللہ نے سیدنا سعید بن مسیب رحمہ اللہ سے اس قربانی کے متعلق سوال کیا جو ایک عورت نے اپنے اوپر لازم کر لی تھی، سیدنا سعید بن مسیب رحمہ اللہ فرماتے ہیں کہ اونٹ کی قربانی تو بیت اللہ لے جا کر کی جائے گی، اگر اس نے کسی جگہ کا نام لیا ہے کہ فلاں جگہ قربانی کرے گی تو پھر اس کو اسی جگہ ہی کرنی چاہیے، اگر اونٹ نہ پائے تو پھر گائے کی قربانی کرے، اگر گائے نہ مل سکے تو اس کی جگہ دس بکریاں قربان کرے، راوی کہتے ہیں: پھر میں سیدنا سالم بن عبداللہ رحمہ اللہ کے پاس آیا تو انہوں نے بھی سیدنا سعید بن مسیب رحمہ اللہ والی بات کہی، لیکن اتنا فرق تھا کہ اگر گائے نہ ملے تو اس کے عوض سات بکریاں ذبح کرے، راوی کہتے ہیں: پھر میں سیدنا خارجہ بن زید رحمہ اللہ کے پاس آیا تو انہوں نے بھی سیدنا سالم بن عبداللہ رحمہ اللہ والی بات کہہ دی، پھر میں سیدنا عبداللہ بن محمد بن علی بن ابی طالب رحمہ اللہ کے پاس آیا تو انہوں نے بھی سیدنا سالم رحمہ اللہ والی بات ہی کہی۔ [السنن الكبرى للبيهقي/كتاب الحج/حدیث: 10167]

سیدنا مسور بن مخرمہ رضی اللہ عنہ فرماتے ہیں کہ رسول اللہ صلی اللہ علیہ وسلم حدیبیہ والے سال اپنے ایک ہزار سے زائد صحابہ کے ساتھ نکلے، جب آپ صلی اللہ علیہ وسلم ذوالحلیفہ آئے تو قربانیوں کو قلادہ پہنایا، شعار کیا اور احرام باندھا۔
«قِلَادَہ»: یہ قربانی کی علامت ہے جو بیت اللہ کے لیے متعین کی جائے۔
«شِعَار»: اونٹ کی کوہان کے دائیں جانب سے خون نکال کر اس کے اوپر مل دینا۔ [السنن الكبرى للبيهقي/كتاب الحج/حدیث: 10168]

سیدنا ابن عباس رضی اللہ عنہما فرماتے ہیں کہ رسول اللہ صلی اللہ علیہ وسلم نے ذوالحلیفہ میں ظہر کی نماز پڑھی، پھر آپ صلی اللہ علیہ وسلم کی قربانی کا اونٹ لایا گیا تو آپ صلی اللہ علیہ وسلم نے کوہان کی دائیں جانب سے اشعار کیا، پھر اس سے خون پونچھ دیا، پھر دو جوتوں کا ہار پہنایا، پھر آپ صلی اللہ علیہ وسلم کی سواری لائی گئی، جب آپ صلی اللہ علیہ وسلم بیداء پہاڑی پر چڑھے تو حج کا تلبیہ کہا۔ [صحیح: مسلم: 1243] [السنن الكبرى للبيهقي/كتاب الحج/حدیث: 10169]

یحییٰ اس حدیث کو شعبہ سے نقل فرماتے ہیں کہ آپ صلی اللہ علیہ وسلم نے اپنے ہاتھ سے خون پونچھا۔
(ب) ابوداؤد کہتے ہیں کہ ہمام نے قتادہ سے بیان کیا کہ آپ صلی اللہ علیہ وسلم نے اپنی انگلی سے خون پونچھا۔ [السنن الكبرى للبيهقي/كتاب الحج/حدیث: 10170]

نافع رحمہ اللہ، سیدنا عبداللہ بن عمر رضی اللہ عنہما سے نقل فرماتے ہیں کہ جب وہ مدینہ سے قربانی ساتھ لاتے تو اس کو ذوالحلیفہ میں قلادہ پہناتے اور اشعار کرتے، اور قلادہ اشعار سے پہلے پہناتے اور یہ دونوں کام ایک ہی جگہ کرتے اور قبلہ رخ ہو کر کرتے تھے۔ قلادہ میں دو جوتے پہناتے اور اشعار کوہان کی بائیں جانب سے کرتے تھے۔ پھر ان کے ساتھ قربانیاں چلائی جاتیں، پھر لوگوں کے ساتھ وقوفِ عرفہ کرتے اور پھر لوگوں کے ساتھ وہاں سے واپس پلٹتے۔ جب وہ واپس ہوتے اور جب قربانی کے دن صبح منیٰ میں آتے تو سر مونڈنے اور بال اتارنے سے پہلے قربانی کرتے اور قربانی اپنے ہاتھ سے کرتے تھے۔ ان کو کھڑے کر کے صفیں بناتے اور قبلہ کی طرف رخ کرتے، پھر کھاتے اور دوسروں کو کھلاتے تھے۔ [السنن الكبرى للبيهقي/كتاب الحج/حدیث: 10171]

نافع، عبداللہ بن عمر رضی اللہ عنہما سے روایت کرتے ہیں کہ وہ قربانی کے جانور کا شعار کوہان کی بائیں جانب سے کرتے، سوائے اس کے کہ وہ سرکش ہوتے اور بدک جاتے، تو اگر ان کے درمیان داخل نہ ہو سکتے تو پھر دائیں جانب سے شعار کرتے، اور جب شعار کا ارادہ کرتے تو قبلہ رخ ہو جاتے۔ جب شعار کرتے تو پڑھتے: «بِسْمِ اللّٰهِ وَاللّٰهُ أَكْبَرُ» ”اللہ کے نام کے ساتھ اور اللہ سب سے بڑا ہے“۔ وہ شعار اپنے ہاتھ سے کرتے اور نحر بھی (اونٹ کو) کھڑا کر کے اپنے ہاتھ سے کرتے۔ [السنن الكبرى للبيهقي/كتاب الحج/حدیث: 10172]