(نبی کریم صلی اللہ علیہ وسلم نے فرمایا:)
”جب تم میں سے کسی کے پاس دو کپڑے ہوں تو وہ ان دونوں (ازار اور چادر) کو پہن کر نماز پڑھے، پس اگر اس کے پاس ایک ہی کپڑا ہو تو اسے تہبند کی طرح باندھ لے اور اسے یہودیوں کی طرح نہ لپیٹے (کہ کندھے ننگے رہیں)۔“ [صحيح الجامع الصغير وزيادته/[حرف الألف] -- أد/حدیث: 768]

(نبی کریم صلی اللہ علیہ وسلم نے فرمایا:)
”جب تم میں سے کسی کا خادم اس کے لیے (کھانا پکانے کی) مشقت اٹھا کر لائے، تو اسے چاہیے کہ وہ اسے بھی اس میں سے کھلائے، پس اگر وہ (اسے ساتھ بٹھا کر) ایسا نہ کر سکے تو اسے (اس میں سے) ایک دو لقمے ہی پکڑا دے۔“ [صحيح الجامع الصغير وزيادته/[حرف الألف] -- أد/حدیث: 769]

(نبی کریم صلی اللہ علیہ وسلم نے فرمایا:)
”جب تم میں سے کسی کے (سر پر) بال ہوں تو اسے چاہیے کہ وہ ان کی عزت و دیکھ بھال کرے (یعنی انہیں دھوئے، تیل لگائے اور سنوار کر رکھے)۔“ [صحيح الجامع الصغير وزيادته/[حرف الألف] -- أد/حدیث: 770]

(نبی کریم صلی اللہ علیہ وسلم نے فرمایا:)
”جب شعبان کی نصف (پندرہویں) رات ہوتی ہے تو اللہ تعالیٰ اپنی مخلوق پر خاص تجلی فرماتا ہے، پس وہ مومنوں کی مغفرت فرما دیتا ہے، کافروں کو ڈھیل دیتا ہے، اور کینہ رکھنے والوں کو ان کے کینے کی وجہ سے اسی حال پر چھوڑ دیتا ہے یہاں تک کہ وہ اسے (کینہ پروری کو) ترک کر دیں۔“ [صحيح الجامع الصغير وزيادته/[حرف الألف] -- أد/حدیث: 771]

(نبی کریم صلی اللہ علیہ وسلم نے فرمایا:)
”جب تین شخص (اکٹھے) ہوں تو دو شخص تیسرے کو چھوڑ کر آپس میں سرگوشی نہ کریں۔“ [صحيح الجامع الصغير وزيادته/[حرف الألف] -- أد/حدیث: 772]

(نبی کریم صلی اللہ علیہ وسلم نے فرمایا:)
”جب تین شخص ہوں تو ان میں سے کوئی ایک ان کی امامت کرائے، اور امامت کا سب سے زیادہ حق دار وہ ہے جو ان میں قرآن مجید کا سب سے زیادہ علم رکھنے والا ہو۔“ [صحيح الجامع الصغير وزيادته/[حرف الألف] -- أد/حدیث: 773]

(نبی کریم صلی اللہ علیہ وسلم نے فرمایا:)
”جب جمعہ کا دن ہوتا ہے تو فرشتے مسجد کے دروازوں پر بیٹھ جاتے ہیں اور وہ آنے والے لوگوں کو ان کے مراتب (یعنی آنے کے وقت) کے حساب سے لکھتے ہیں۔ پس کوئی شخص وہ ہوتا ہے جس نے (گویا) ایک اونٹ کی قربانی پیش کی، کوئی وہ جس نے گائے کی قربانی پیش کی، کوئی وہ جس نے بکری کی قربانی پیش کی، کوئی وہ جس نے مرغی پیش کی، کوئی وہ جس نے چڑیا پیش کی اور کوئی وہ جس نے ایک انڈا پیش کیا۔ پھر جب مؤذن اذان دے دیتا ہے اور امام منبر پر بیٹھ جاتا ہے تو وہ (فرشتے) اپنے رجسٹر لپیٹ لیتے ہیں اور مسجد میں داخل ہو کر ذکر (خطبہ) سننے لگتے ہیں۔“ [صحيح الجامع الصغير وزيادته/[حرف الألف] -- أد/حدیث: 774]

(نبی کریم صلی اللہ علیہ وسلم نے فرمایا:)
”جب جمعہ کا دن ہوتا ہے تو مسجد کے ہر دروازے پر فرشتے تعینات ہوتے ہیں جو لوگوں کو ان کے درجات کے مطابق لکھتے ہیں، یعنی پہلے آنے والا پھر اس کے بعد آنے والا۔ پس جب امام (منبر پر) بیٹھ جاتا ہے تو وہ اپنے رجسٹر لپیٹ لیتے ہیں اور آ کر ذکر (خطبہ) سننے لگتے ہیں۔ اور (نمازِ جمعہ کے لیے) سویرے آنے والے کی مثال اس شخص جیسی ہے جو (صدقے میں) ایک اونٹ پیش کرے، پھر اس شخص جیسی جو گائے پیش کرے، پھر اس شخص جیسی جو مینڈھا پیش کرے، پھر اس شخص جیسی جو مرغی پیش کرے اور پھر اس شخص جیسی جو ایک انڈا پیش کرے۔“ [صحيح الجامع الصغير وزيادته/[حرف الألف] -- أد/حدیث: 775]

(نبی کریم صلی اللہ علیہ وسلم نے فرمایا:)
”جب جمعہ کا دن اور جمعہ کی رات ہو تو مجھ پر کثرت سے درود بھیجا کرو۔“ [صحيح الجامع الصغير وزيادته/[حرف الألف] -- أد/حدیث: 776]

(نبی کریم صلی اللہ علیہ وسلم نے فرمایا:)
”جب قیامت کا دن ہوگا تو سورج کو بندوں کے اس قدر قریب کر دیا جائے گا کہ وہ ایک یا دو میل کے فاصلے پر رہ جائے گا، پس سورج انہیں تپا دے گا اور لوگ اپنے اعمال کے بقدر پسینے میں ڈوبے ہوں گے؛ ان میں سے کوئی ایسا ہوگا جس کا پسینہ ٹخنوں تک ہوگا، کوئی ایسا ہوگا جس کا پسینہ گھٹنوں تک ہوگا، کوئی ایسا ہوگا جس کا پسینہ کمر تک ہوگا، اور کسی کو تو پسینے نے لگام دے رکھی ہوگی (یعنی اس کے منہ تک آ رہا ہوگا)۔“ [صحيح الجامع الصغير وزيادته/[حرف الألف] -- أد/حدیث: 777]