(نبی کریم صلی اللہ علیہ وسلم نے فرمایا:)
”میں قیامت کے دن تمام لوگوں کا سردار ہوں گا، اور کیا تم جانتے ہو کہ یہ کس وجہ سے ہوگا؟ اللہ تعالیٰ اگلوں اور پچھلوں کو ایک ہی میدان میں جمع فرمائے گا، پکارنے والے کی آواز سب تک پہنچے گی اور نگاہ سب کو دیکھ سکے گی، اور سورج ان کے بالکل قریب آ جائے گا۔ لوگوں کو اس قدر غم اور تکلیف پہنچے گی جسے برداشت کرنے کی ان میں طاقت نہیں ہوگی۔ پس لوگ ایک دوسرے سے کہیں گے: کیا تم نہیں دیکھتے کہ تم کس حال کو پہنچ گئے ہو؟ کیا تم کسی ایسے شخص کو تلاش نہیں کرتے جو تمہارے رب کے حضور تمہاری سفارش کرے؟ پھر کچھ لوگ دوسروں سے کہیں گے: آدم (علیہ السلام) کے پاس چلو۔ وہ آدم (علیہ السلام) کے پاس آئیں گے اور کہیں گے: اے آدم! آپ ہمارے باپ ہیں، آپ ابوالبشر ہیں، اللہ نے آپ کو اپنے ہاتھ سے پیدا فرمایا، آپ میں اپنی طرف سے روح پھونکی اور فرشتوں کو حکم دیا تو انہوں نے آپ کو سجدہ کیا۔ آپ اپنے رب کے حضور ہماری سفارش کیجیے، کیا آپ نہیں دیکھتے کہ ہم کس حال میں ہیں؟ کیا آپ نہیں دیکھتے کہ ہم کس مصیبت کو پہنچ چکے ہیں؟ آدم (علیہ السلام) ان سے کہیں گے: بے شک میرا رب آج اس قدر غضب ناک ہے کہ نہ اس سے پہلے کبھی ایسا غضب ناک ہوا اور نہ اس کے بعد کبھی ایسا غضب ناک ہوگا۔ اور اس نے مجھے اس درخت (کے پھل کھانے) سے منع فرمایا تھا مگر میں نے نافرمانی کی۔ آج مجھے خود اپنی جان کی فکر ہے، میری جان، میری جان، میری جان۔ تم میرے علاوہ کسی اور کے پاس جاؤ، تم نوح (علیہ السلام) کے پاس جاؤ۔ پس وہ نوح (علیہ السلام) کے پاس آئیں گے اور کہیں گے: (اے نوح!) آپ زمین والوں کی طرف بھیجے گئے سب سے پہلے رسول ہیں اور اللہ نے آپ کو ﴿عَبْدًا شَكُورًا﴾ ”نہایت شکر گزار بندہ“ [سورة الإسراء: 3] کا نام دیا ہے۔ آپ اپنے رب کے حضور ہماری سفارش کیجیے، کیا آپ نہیں دیکھتے کہ ہم کس حال میں ہیں؟ کیا آپ نہیں دیکھتے کہ ہم کس مصیبت کو پہنچ چکے ہیں؟ نوح (علیہ السلام) ان سے کہیں گے: بے شک میرا رب آج اس قدر غضب ناک ہے کہ نہ اس سے پہلے کبھی ایسا غضب ناک ہوا اور نہ اس کے بعد کبھی ایسا غضب ناک ہوگا۔ مجھے ایک دعا کا حق ملا تھا جو میں نے اپنی قوم کے خلاف کر لی تھی۔ مجھے اپنی جان کی فکر ہے، میری جان، میری جان، میری جان۔ تم میرے علاوہ کسی اور کے پاس جاؤ، تم ابراہیم (علیہ السلام) کے پاس جاؤ۔ پس وہ ابراہیم (علیہ السلام) کے پاس آئیں گے اور کہیں گے: اے ابراہیم! آپ اللہ کے نبی اور اہل زمین میں سے اس کے خلیل ہیں۔ آپ اپنے رب کے حضور ہماری سفارش کیجیے، کیا آپ نہیں دیکھتے کہ ہم کس حال میں ہیں؟ کیا آپ نہیں دیکھتے کہ ہم کس مصیبت کو پہنچ چکے ہیں؟ ابراہیم (علیہ السلام) ان سے کہیں گے: بے شک میرا رب آج اس قدر غضب ناک ہے کہ نہ اس سے پہلے کبھی ایسا غضب ناک ہوا اور نہ اس کے بعد کبھی ایسا غضب ناک ہوگا۔ میں نے (اپنی زندگی میں) تین مرتبہ جھوٹ بولا تھا۔ مجھے اپنی جان کی فکر ہے، میری جان، میری جان، میری جان۔ تم میرے علاوہ کسی اور کے پاس جاؤ، تم موسیٰ (علیہ السلام) کے پاس جاؤ۔ پس وہ موسیٰ (علیہ السلام) کے پاس آئیں گے اور کہیں گے: اے موسیٰ! آپ اللہ کے رسول ہیں، اللہ نے آپ کو اپنے پیغامات اور اپنے کلام کے ذریعے لوگوں پر فضیلت دی ہے۔ آپ اپنے رب کے حضور ہماری سفارش کیجیے، کیا آپ نہیں دیکھتے کہ ہم کس حال میں ہیں؟ کیا آپ نہیں دیکھتے کہ ہم کس مصیبت کو پہنچ چکے ہیں؟ وہ کہیں گے: بے شک میرا رب آج اس قدر غضب ناک ہے کہ نہ اس سے پہلے کبھی ایسا غضب ناک ہوا اور نہ اس کے بعد کبھی ایسا غضب ناک ہوگا۔ میں نے ایک شخص کو قتل کیا تھا حالانکہ مجھے اس کے قتل کا حکم نہیں دیا گیا تھا۔ مجھے اپنی جان کی فکر ہے، میری جان، میری جان، میری جان۔ تم میرے علاوہ کسی اور کے پاس جاؤ، تم عیسیٰ (علیہ السلام) کے پاس جاؤ۔ پس وہ عیسیٰ (علیہ السلام) کے پاس آئیں گے اور کہیں گے: اے عیسیٰ! آپ اللہ کے رسول ہیں، اور اس کا کلمہ ہیں جسے اس نے مریم (علیہا السلام) کی طرف القا کیا اور اس کی طرف سے ایک روح ہیں، اور آپ نے پنگھوڑے میں لوگوں سے کلام کیا تھا۔ آپ اپنے رب کے حضور ہماری سفارش کیجیے، کیا آپ نہیں دیکھتے کہ ہم کس حال میں ہیں؟ کیا آپ نہیں دیکھتے کہ ہم کس مصیبت کو پہنچ چکے ہیں؟ عیسیٰ (علیہ السلام) ان سے کہیں گے: بے شک میرا رب آج اس قدر غضب ناک ہے کہ نہ اس سے پہلے کبھی ایسا غضب ناک ہوا اور نہ اس کے بعد کبھی ایسا غضب ناک ہوگا۔ مجھے اپنی جان کی فکر ہے، میری جان، میری جان، میری جان۔ تم میرے علاوہ کسی اور کے پاس جاؤ، تم محمد ( صلی اللہ علیہ وسلم ) کے پاس جاؤ۔ پس وہ میرے پاس آئیں گے اور کہیں گے: اے محمد! آپ اللہ کے رسول اور خاتم الانبیاء ہیں، اور اللہ نے آپ کے اگلے پچھلے تمام گناہ معاف فرما دیے ہیں۔ آپ اپنے رب کے حضور ہماری سفارش کیجیے، کیا آپ نہیں دیکھتے کہ ہم کس حال میں ہیں؟ کیا آپ نہیں دیکھتے کہ ہم کس مصیبت کو پہنچ چکے ہیں؟ پھر میں چلوں گا اور عرش کے نیچے آ کر اپنے رب کے حضور سجدے میں گر پڑوں گا، پھر اللہ تعالیٰ مجھ پر اپنی حمد اور بہترین ثناء کے ایسے کلمات کھولے گا جو مجھ سے پہلے کسی پر نہیں کھولے تھے۔ پھر کہا جائے گا: اے محمد! اپنا سر اٹھائیے، مانگیے آپ کو دیا جائے گا، اور سفارش کیجیے آپ کی سفارش قبول کی جائے گی۔ تو میں اپنا سر اٹھاؤں گا اور عرض کروں گا: اے میرے رب! میری امت، میری امت۔ تو کہا جائے گا: اے محمد! اپنی امت کے ان لوگوں کو جن پر کوئی حساب نہیں ہے، جنت کے دروازوں میں سے دائیں دروازے سے داخل کر دیجیے، اور اس کے علاوہ باقی دروازوں میں بھی وہ عام لوگوں کے ساتھ شریک ہیں۔ اس ذات کی قسم جس کے ہاتھ میں میری جان ہے! جنت کے دروازوں کے دو کواڑوں کے درمیان اتنا فاصلہ ہے جتنا مکہ اور ہجر کے درمیان، یا جتنا مکہ اور بصریٰ کے درمیان ہے۔“ [صحيح الجامع الصغير وزيادته/[حرف الألف] -- أنا/حدیث: 1466]

(نبی کریم صلی اللہ علیہ وسلم نے فرمایا:)
”میں قیامت کے دن اولادِ آدم کا سردار ہوں گا، اور سب سے پہلا وہ شخص ہوں گا جس کی قبر شق ہوگی (یعنی سب سے پہلے میں قبر سے اٹھوں گا)، اور میں ہی سب سے پہلا شفاعت کرنے والا ہوں اور میں ہی وہ پہلا شخص ہوں جس کی شفاعت قبول کی جائے گی۔“ [صحيح الجامع الصغير وزيادته/[حرف الألف] -- أنا/حدیث: 1467]

(نبی کریم صلی اللہ علیہ وسلم نے فرمایا:)
”میں قیامت کے دن اولادِ آدم کا سردار ہوں گا اور اس پر مجھے کوئی فخر نہیں، اور میرے ہاتھ میں حمد کا جھنڈا ہوگا اور اس پر کوئی فخر نہیں، اور اس دن آدم (علیہ السلام) اور ان کے علاوہ تمام انبیاء میرے ہی جھنڈے کے نیچے ہوں گے، اور میں ہی سب سے پہلا شفاعت کرنے والا اور سب سے پہلا وہ شخص ہوں گا جس کی شفاعت قبول کی جائے گی اور مجھے اس پر کوئی فخر نہیں۔“ [صحيح الجامع الصغير وزيادته/[حرف الألف] -- أنا/حدیث: 1468]

(نبی کریم صلی اللہ علیہ وسلم نے فرمایا:)
”میں حوضِ کوثر پر تم سے پہلے پہنچ کر تمہارا پیش رو ہوں گا۔“ [صحيح الجامع الصغير وزيادته/[حرف الألف] -- أنا/حدیث: 1469]

(نبی کریم صلی اللہ علیہ وسلم نے فرمایا:)
”میں حوضِ کوثر پر تمہارا پیش رو ہوں گا، میں تمہارا انتظار کروں گا یہاں تک کہ تم میں سے کچھ لوگوں کو میرے سامنے پیش کیا جائے گا، پھر جب میں انہیں پہچان لوں گا تو انہیں مجھ سے دور کر دیا جائے گا۔ تو میں عرض کروں گا: اے میرے رب! یہ تو میرے صحابہ ہیں! اے میرے رب! یہ تو میرے صحابہ ہیں! تو کہا جائے گا: آپ نہیں جانتے کہ انہوں نے آپ کے بعد (دین میں) کیا کیا نئی چیزیں ایجاد کر لی تھیں۔“ [صحيح الجامع الصغير وزيادته/[حرف الألف] -- أنا/حدیث: 1470]

(نبی کریم صلی اللہ علیہ وسلم نے فرمایا:)
”میں حوضِ کوثر پر تمہارا پیش رو ہوں گا، اور میں کچھ لوگوں کو بچانے کے لیے کشمکش کروں گا پھر ان کے معاملے میں مجھ پر غلبہ پا لیا جائے گا (یعنی انہیں مجھ سے چھین لیا جائے گا)، تو میں عرض کروں گا: اے میرے رب! یہ تو میرے صحابہ ہیں! یہ تو میرے صحابہ ہیں! تو وہ (اللہ) فرمائے گا: آپ نہیں جانتے کہ انہوں نے آپ کے بعد کیا کیا نئی چیزیں گھڑ لی تھیں۔“ [صحيح الجامع الصغير وزيادته/[حرف الألف] -- أنا/حدیث: 1471]

(نبی کریم صلی اللہ علیہ وسلم نے فرمایا:)
”میں محمد بن عبداللہ بن عبدالمطلب ہوں، بے شک اللہ تعالیٰ نے مخلوق کو پیدا فرمایا تو مجھے ان میں سے بہترین گروہ میں رکھا، پھر انہیں دو حصوں میں تقسیم کیا تو مجھے ان میں سے بہترین حصے میں رکھا، پھر انہیں قبیلوں میں تقسیم کیا تو مجھے ان میں سے بہترین قبیلے میں پیدا فرمایا، پھر انہیں گھرانوں میں تقسیم کیا تو مجھے ان میں سے بہترین گھرانے میں پیدا فرمایا۔ پس میں گھرانے کے لحاظ سے بھی تم سب سے بہتر ہوں اور ذات کے لحاظ سے بھی تم سب سے بہتر ہوں۔“ [صحيح الجامع الصغير وزيادته/[حرف الألف] -- أنا/حدیث: 1472]

(نبی کریم صلی اللہ علیہ وسلم نے فرمایا:)
”میں محمد ہوں، اور احمد ہوں، اور مقفی (سب کے بعد آنے والا) ہوں، اور حاشر (لوگوں کو جمع کرنے والا) ہوں، اور توبہ کا نبی ہوں، اور رحمت کا نبی ہوں۔“ [صحيح الجامع الصغير وزيادته/[حرف الألف] -- أنا/حدیث: 1473]

(نبی کریم صلی اللہ علیہ وسلم نے فرمایا:)
”میں اس شخص کا وارث ہوں جس کا کوئی وارث نہ ہو، میں اس کی طرف سے قیدی کا فدیہ ادا کرتا ہوں اور اس کے مال کا وارث بنتا ہوں، اور ماموں اس شخص کا وارث ہے جس کا کوئی وارث نہ ہو، وہ اس کی طرف سے قیدی کا فدیہ ادا کرتا ہے اور اس کے مال کا وارث ہوتا ہے۔“ [صحيح الجامع الصغير وزيادته/[حرف الألف] -- أنا/حدیث: 1474]

(نبی کریم صلی اللہ علیہ وسلم نے فرمایا:)
”میں اور یتیم کی کفالت کرنے والا شخص جنت میں اس طرح (ایک ساتھ) ہوں گے۔“ [صحيح الجامع الصغير وزيادته/[حرف الألف] -- أنا/حدیث: 1475]