(نبی کریم صلی اللہ علیہ وسلم نے فرمایا:)
”ہر دو اذانوں (یعنی اذان اور اقامت) کے درمیان نماز ہے، اس شخص کے لیے جو پڑھنا چاہے۔“ [صحيح الجامع الصغير وزيادته/حرف الباء/حدیث: 2850]

(نبی کریم صلی اللہ علیہ وسلم نے فرمایا:)
”ہر دو رکعتوں کے درمیان التحیات (تشہد کے لیے بیٹھنا) ہے۔“ [صحيح الجامع الصغير وزيادته/حرف الباء/حدیث: 2851]

(نبی کریم صلی اللہ علیہ وسلم نے فرمایا:)
”قیامت سے پہلے ہرج (یعنی کثرت سے قتل و غارت گری) کے دن ہوں گے۔“ [صحيح الجامع الصغير وزيادته/حرف الباء/حدیث: 2852]

(نبی کریم صلی اللہ علیہ وسلم نے فرمایا:)
”قیامت سے پہلے تم ایک ایسی قوم سے جنگ کرو گے جن کے جوتے بالوں کے ہوں گے، اور وہ دوزخ والے ہیں۔“ [صحيح الجامع الصغير وزيادته/حرف الباء/حدیث: 2853]

(نبی کریم صلی اللہ علیہ وسلم نے فرمایا:)
”قیامت سے پہلے تم ایک ایسی قوم سے جنگ کرو گے جو بالوں کے جوتے پہنتی ہوگی، اور تم ایک ایسی قوم سے (بھی) لڑو گے جن کے چہرے ایسے (چوڑے اور چپٹے) ہوں گے جیسے تہہ بہ تہہ چمڑا مڑھی ہوئی ڈھالیں ہوتی ہیں۔“ [صحيح الجامع الصغير وزيادته/حرف الباء/حدیث: 2854]

(نبی کریم صلی اللہ علیہ وسلم نے فرمایا:)
”قیامت سے پہلے اندھیری رات کے تاریک حصوں کی مانند (ہولناک اور پے در پے) فتنے ظاہر ہوں گے۔“ [صحيح الجامع الصغير وزيادته/حرف الباء/حدیث: 2855]

(نبی کریم صلی اللہ علیہ وسلم نے فرمایا:)
”قیامت سے پہلے (مجرموں کی) صورتیں مسخ کی جائیں گی، زمین میں دھنسنے کے واقعات ہوں گے اور (آسمان سے پتھروں کی) بارش ہوگی۔“ [صحيح الجامع الصغير وزيادته/حرف الباء/حدیث: 2856]

(نبی کریم صلی اللہ علیہ وسلم نے فرمایا:)
”اسی دوران کہ میں جنت میں سیر کر رہا تھا، اچانک میرے سامنے ایک ایسی نہر لائی گئی جس کے دونوں کناروں پر اندر سے کھوکھلے موتیوں کے خیمے تھے۔ میں نے پوچھا: اے جبریل! یہ کیا ہے؟ انہوں نے جواب دیا: یہ وہ نہرِ کوثر ہے جو اللہ تعالیٰ نے آپ کو عطا فرمائی ہے۔ پھر فرشتے نے اپنا ہاتھ اس نہر کی مٹی پر مارا تو اس میں سے خالص مشک نکالی، پھر میرے سامنے سدرۃ المنتہیٰ کو ظاہر کیا گیا تو میں نے اس کے پاس ایک بہت بڑا اور عظیم نور دیکھا۔“ [صحيح الجامع الصغير وزيادته/حرف الباء/حدیث: 2857]

(نبی کریم صلی اللہ علیہ وسلم نے فرمایا:)
”اسی اثناء میں کہ میں سویا ہوا تھا، میرے پاس زمین کے خزانے لائے گئے اور میرے ہاتھوں میں سونے کے دو کنگن رکھ دیے گئے۔ وہ مجھے بہت بھاری لگے اور انہوں نے مجھے فکر میں ڈال دیا، تو اللہ تعالیٰ نے میری طرف وحی فرمائی کہ میں ان پر پھونک ماروں۔ چنانچہ میں نے ان پر پھونک ماری تو وہ دونوں اڑ (غائب ہو) گئے۔ پس میں نے اس کی تعبیر ان دو جھوٹے (مدعیانِ نبوت) سے لی جن کے درمیان میں موجود ہوں: ایک صنعاء کا رہنے والا (اسود عنسی) اور دوسرا یمامہ کا رہنے والا (مسیلمہ کذاب)۔“ [صحيح الجامع الصغير وزيادته/حرف الباء/حدیث: 2858]

(نبی کریم صلی اللہ علیہ وسلم نے فرمایا:)
”میں سویا ہوا تھا کہ اچانک میرے پاس دودھ کا ایک پیالہ لایا گیا، میں نے اس میں سے (اتنا پیٹ بھر کر) پیا یہاں تک کہ میں اس کی سیرابی کو اپنے ناخنوں سے نکلتا ہوا محسوس کرنے لگا، پھر میں نے اپنا بچا ہوا (جھوٹا) عمر بن خطاب کو دے دیا۔“ (صحابہ کرام نے) عرض کیا: اے اللہ کے رسول! آپ نے اس خواب کی کیا تعبیر لی ہے؟ تو آپ صلی اللہ علیہ وسلم نے فرمایا: ”(اس سے مراد) علم (ہے)۔“ [صحيح الجامع الصغير وزيادته/حرف الباء/حدیث: 2859]