سیدنا ابو سعید خدری رضی اللہ عنہ سے روایت ہے کہ نبی کریم صلی اللہ علیہ وسلم نے فرمایا: ”تین (قسم کے لوگ) ایسے ہیں جن کی طرف دیکھ کر اللہ تعالیٰ قیامت کے دن ہنسے گا: وہ آدمی جو رات کو اٹھ کر نماز پڑھتا ہے، وہ لوگ جو نماز کے لیے صفیں باندھتے ہیں، اور وہ لوگ جو دشمن سے لڑائی کے لیے صف بستہ ہوتے ہیں۔“ [مسند أبي يعلى الموصلي/من مسند أبي سعيد الخدري/حدیث: 1004]

سیدنا ابو سعید خدری اور سیدنا ابو ہریرہ رضی اللہ عنہما سے روایت ہے کہ رسول اللہ صلی اللہ علیہ وسلم نے فرمایا: ”اللہ تعالیٰ فرماتا ہے: روزہ میرے لیے ہے اور میں ہی اس کا بدلہ دوں گا۔ اور روزہ دار کے لیے دو خوشیاں ہیں: جب وہ افطار کرتا ہے تو خوش ہوتا ہے، اور جب اللہ سے ملے گا تو خوش ہوگا۔ اور اس ذات کی قسم جس کے ہاتھ میں محمد کی جان ہے! روزہ دار کے منہ کی بو اللہ کے نزدیک کستوری کی خوشبو سے زیادہ پاکیزہ ہے۔“ [مسند أبي يعلى الموصلي/من مسند أبي سعيد الخدري/حدیث: 1005]

سیدنا ابو سعید خدری رضی اللہ عنہ بیان کرتے ہیں کہ ہم نے عرض کیا: ”اے اللہ کے رسول! کیا ہم اپنے رب کو دیکھیں گے؟“ آپ صلی اللہ علیہ وسلم نے فرمایا: ”کیا دوپہر کے وقت جب بادل نہ ہوں تو تمہیں سورج دیکھنے میں کوئی دقت ہوتی ہے؟“ ہم نے عرض کیا: ”نہیں۔“ فرمایا: ”کیا چودھویں کی رات جب بادل نہ ہوں تو تمہیں چاند دیکھنے میں کوئی دقت ہوتی ہے؟“ ہم نے عرض کیا: ”نہیں۔“ فرمایا: ”تو جس طرح تمہیں ان دونوں کو دیکھنے میں کوئی دقت نہیں ہوتی، اسی طرح تمہیں اس (اپنے رب) کو دیکھنے میں بھی کوئی دقت نہیں ہوگی۔“ [مسند أبي يعلى الموصلي/من مسند أبي سعيد الخدري/حدیث: 1006]

سیدنا ابو سعید خدری رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا: ”جو آدمی اللہ اور یومِ آخرت پر ایمان رکھتا ہے وہ انصار سے بغض نہیں رکھتا۔“ [مسند أبي يعلى الموصلي/من مسند أبي سعيد الخدري/حدیث: 1007]

سیدنا ابو سعید خدری رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا: ”(دین سے) نکل جانے والوں (خوارج) کو وہ گروہ قتل کرے گا جو دونوں گروہوں میں اللہ کو زیادہ محبوب اور اللہ سے زیادہ قریب ہوگا۔“ [مسند أبي يعلى الموصلي/من مسند أبي سعيد الخدري/حدیث: 1008]

رجاء رحمہ اللہ بیان کرتے ہیں کہ مروان نے (عید کے دن) منبر (عیدگاہ کی طرف) نکلوایا اور نماز سے پہلے خطبہ شروع کر دیا، تو ایک آدمی کھڑا ہوا اور کہا: ”اے مروان! تم نے سنت کی مخالفت کی ہے؛ تم نے منبر نکلوایا حالانکہ اسے نکالا نہیں جاتا تھا، اور تم نے نماز سے پہلے خطبہ شروع کر دیا۔“ سیدنا ابو سعید خدری رضی اللہ عنہ نے پوچھا: ”یہ کون ہے؟“ لوگوں نے بتایا: ”فلاں شخص ہے۔“ آپ رضی اللہ عنہ نے فرمایا: ”اس نے تو اپنی ذمہ داری ادا کر دی، (کیونکہ) رسول اللہ صلی اللہ علیہ وسلم نے فرمایا ہے: جو شخص کوئی برائی دیکھے تو اسے اپنے ہاتھ سے بدل دے، اگر اس کی طاقت نہ ہو تو اپنی زبان سے، اور اگر اس کی بھی طاقت نہ ہو تو اپنے دل سے (برا جانے)، اور یہ ایمان کا سب سے کمزور درجہ ہے۔“ [مسند أبي يعلى الموصلي/من مسند أبي سعيد الخدري/حدیث: 1009]

سیدنا ابو سعید خدری رضی اللہ عنہ سے روایت ہے کہ انہوں نے رسول اللہ صلی اللہ علیہ وسلم کو فرماتے ہوئے سنا: ”میں نے مدینہ کے دونوں سنگلاخ میدانوں کے درمیان (کے علاقے) کو اسی طرح حرم قرار دیا ہے جس طرح ابراہیم (علیہ السلام) نے مکہ کو حرم قرار دیا تھا۔“ راوی کہتے ہیں: سیدنا ابو سعید رضی اللہ عنہ ہم میں سے کسی کو اس حال میں پاتے کہ اس کے ہاتھ میں کوئی پرندہ ہوتا جسے اس نے پکڑ رکھا ہوتا، تو آپ اسے اس کے ہاتھ سے چھڑا کر آزاد کر دیتے۔ [مسند أبي يعلى الموصلي/من مسند أبي سعيد الخدري/حدیث: 1010]

سیدنا ابو سعید خدری رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا: ”آدمی کی باجماعت نماز اس کی اکیلے کی نماز سے پچیس درجے بڑھ کر ہے، اور اگر وہ اسے کسی (کھلی) زمین (بیابان) میں پڑھے اور اس کا وضو، رکوع اور سجدہ پوری طرح ادا کرے تو اس کی نماز پچاس درجے تک پہنچ جاتی ہے۔“ [مسند أبي يعلى الموصلي/من مسند أبي سعيد الخدري/حدیث: 1011]

سیدنا ابو سعید خدری رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا: ”عورت سے تین میں سے کسی ایک خوبی کی بنا پر نکاح کیا جاتا ہے: اس کے مال کی وجہ سے، اس کے حسن کی وجہ سے، اور اس کے دین کی وجہ سے۔ تو تم دین دار اور با اخلاق عورت کو اختیار کرو، تمہارے ہاتھ خاک آلود ہوں!“ [مسند أبي يعلى الموصلي/من مسند أبي سعيد الخدري/حدیث: 1012]

سیدنا ابو سعید خدری رضی اللہ عنہ سے روایت ہے کہ نبی کریم صلی اللہ علیہ وسلم نے فرمایا: ”میری امت میں ایسے لوگ بھی ہوں گے جو ایک آدمی اور اس کے گھر والوں کی سفارش کریں گے تو وہ اس کی سفارش سے جنت میں داخل ہو جائیں گے۔“ [مسند أبي يعلى الموصلي/من مسند أبي سعيد الخدري/حدیث: 1013]