محمد بن منکدر رحمہ اللہ سے روایت ہے کہ انہوں نے سیدنا جابر بن عبداللہ رضی اللہ عنہما کو یہ فرماتے ہوئے سنا کہ ہم میں سے ایک شخص کے ہاں لڑکا پیدا ہوا تو اس نے اس کا نام 'قاسم' رکھ دیا، جس پر ہم نے اس سے کہا کہ ”ہم تجھے 'ابو القاسم' کی کنیت نہیں دیں گے اور نہ ہی اس معاملے میں تیری آنکھیں ٹھنڈی کریں گے“، چنانچہ وہ شخص رسول اللہ صلی اللہ علیہ وسلم کی خدمتِ اقدس میں حاضر ہوا اور آپ صلی اللہ علیہ وسلم سے اس بات کا تذکرہ کیا، تو آپ صلی اللہ علیہ وسلم نے ارشاد فرمایا: ”اس کا نام عبدالرحمٰن ہے“۔ [مسند أبي يعلى الموصلي/مسند جابر/حدیث: 2016]

سیدنا جابر بن عبداللہ رضی اللہ عنہما سے روایت ہے کہ ”نبی کریم صلی اللہ علیہ وسلم نے گوشت تناول فرمایا اور پھر (نئے سرے سے) وضو کیے بغیر نماز ادا فرمائی“، نیز سیدنا ابوبکر رضی اللہ عنہ نے بھی گوشت تناول فرمایا اور پھر وضو کیے بغیر نماز پڑھی، اسی طرح سیدنا عمر بن خطاب رضی اللہ عنہ نے بھی گوشت کھایا اور پھر وضو کیے بغیر ہی نماز ادا فرمائی۔ [مسند أبي يعلى الموصلي/مسند جابر/حدیث: 2017]

سیدنا جابر بن عبداللہ رضی اللہ عنہما سے روایت ہے کہ انہوں نے بیان کیا کہ ”میں بیمار ہوا تو نبی کریم صلی اللہ علیہ وسلم اور سیدنا ابوبکر رضی اللہ عنہ پیدل چل کر میری عیادت کے لیے تشریف لائے، انہوں نے مجھے اس حال میں پایا کہ مجھ پر بے ہوشی طاری تھی، پھر رسول اللہ صلی اللہ علیہ وسلم نے وضو فرمایا اور اپنے وضو کا پانی مجھ پر ڈالا جس سے مجھے ہوش آ گیا، تب میں نے آپ صلی اللہ علیہ وسلم سے عرض کی کہ اے اللہ کے رسول! میں اپنے مال کے بارے میں کیا طرزِ عمل اختیار کروں؟ تو آپ صلی اللہ علیہ وسلم نے مجھے کوئی جواب نہیں دیا یہاں تک کہ وراثت سے متعلق یہ آیت مبارکہ نازل ہوئی: ﴿يُوصِيكُمُ اللَّهُ فِي أَوْلَادِكُمْ﴾ ”اللہ تمہیں تمہاری اولاد کے (حقِ وراثت کے) بارے میں حکم دیتا ہے“۔“ [مسند أبي يعلى الموصلي/مسند جابر/حدیث: 2018]

سیدنا جابر رضی اللہ عنہ سے روایت ہے کہ رسول اللہ صلی اللہ علیہ وسلم نے مجھ سے ارشاد فرمایا: ”اگر بحرین کا مال آگیا تو میں تمہیں اس طرح، اس طرح اور اس طرح (تین مرتبہ لپ بھر کر) عطا کروں گا۔“ اور (راویِ حدیث) سفیان رحمہ اللہ نے اپنے دونوں ہاتھوں سے تین مرتبہ لپ بھرنے کا اشارہ کر کے ہمیں دکھایا۔ ابھی بحرین کا مال نہیں آیا تھا کہ رسول اللہ صلی اللہ علیہ وسلم کی وفات ہو گئی، چنانچہ جب وہ مال آگیا تو سیدنا ابوبکر رضی اللہ عنہ نے کھڑے ہو کر فرمایا: ”جس کسی کا رسول اللہ صلی اللہ علیہ وسلم کے ذمہ کوئی وعدہ ہو یا کوئی قرض ہو تو وہ ہمارے پاس آئے۔“ سیدنا جابر رضی اللہ عنہ فرماتے ہیں کہ میں ان کے پاس گیا اور عرض کی کہ نبی کریم صلی اللہ علیہ وسلم نے مجھ سے وعدہ فرمایا تھا، چنانچہ انہوں نے مجھے عطا فرمایا، اس کے بعد میں دوبارہ ان کے پاس مانگنے گیا تو انہوں نے مجھے نہ دیا، پھر میں تیسری بار حاضر ہوا اور عرض کی کہ میں نے آپ سے سوال کیا مگر آپ نے مجھے عطا نہ فرمایا، پھر سوال کیا تو آپ نے نہ دیا، اب یا تو آپ مجھے عطا فرمائیں یا پھر مجھ سے بخل برتیں، اس پر سیدنا ابوبکر رضی اللہ عنہ نے فرمایا: ”بخل سے بڑھ کر اور کون سی بیماری زیادہ مہلک ہو سکتی ہے؟ میں نے جب بھی تمہیں دینے سے انکار کیا تو میرے پیشِ نظر یہی تھا کہ میں تمہیں (بیک وقت وافر مقدار میں) عطا کروں۔“ [مسند أبي يعلى الموصلي/مسند جابر/حدیث: 2019]

سیدنا جابر رضی اللہ عنہ سے (سابقہ روایت کی طرح ہی) مروی ہے، البتہ اس میں یہ الفاظ ہیں کہ ”انہوں (سیدنا ابوبکر رضی اللہ عنہ) نے میرے لیے ایک لپ بھر کر (مال) نکالا، پس جب میں نے اسے شمار کیا تو اسے پانچ سو پایا، تب سیدنا ابوبکر رضی اللہ عنہ نے فرمایا: ”اس کے برابر دو مرتبہ مزید لے لو۔““ [مسند أبي يعلى الموصلي/مسند جابر/حدیث: 2020]

سیدنا جابر رضی اللہ عنہ سے روایت ہے کہ ”غزوہِ احد کے دن میرے والد شہید کر دیے گئے تو انہیں اس حالت میں لایا گیا کہ ان کے جسم کے اعضاء کاٹ کر انہیں مثلہ کر دیا گیا تھا، پھر انہیں رسول اللہ صلی اللہ علیہ وسلم کے سامنے رکھ دیا گیا، میں نے بارہا ارادہ کیا کہ ان کے چہرے سے کپڑا ہٹاؤں لیکن میری قوم نے مجھے دو مرتبہ روک دیا، پھر نبی صلی اللہ علیہ وسلم نے حکم دیا تو جنازہ اٹھا لیا گیا“، سفیان رحمہ اللہ نے (اپنی روایت میں) کہا کہ گویا ان شہداء کو ان کے مقتل کی طرف واپس لوٹا دیا گیا، سیدنا جابر رضی اللہ عنہ بیان کرتے ہیں کہ آپ صلی اللہ علیہ وسلم نے ایک خاتون کے رونے کی آواز سنی تو دریافت فرمایا ”یہ کون ہے؟“ صحابہ کرام رضی اللہ عنہم نے عرض کیا کہ یہ عمرو کی بیٹی یا ان کی بہن ہے، آپ صلی اللہ علیہ وسلم نے فرمایا ”تم کیوں روتی ہو؟ - یا (راوی کو شک ہے کہ) فرمایا: نہ روؤ - کیونکہ فرشتے اسے اپنے پروں سے مسلسل سایہ کیے ہوئے تھے یہاں تک کہ اسے (وہاں سے) اٹھا لیا گیا۔“ [مسند أبي يعلى الموصلي/مسند جابر/حدیث: 2021]

سیدنا جابر رضی اللہ عنہ سے روایت ہے کہ رسول اللہ صلی اللہ علیہ وسلم نے غزوہ خندق کے دن لوگوں کو (دشمن کی خبر لانے کے لیے) ترغیب دی تو سیدنا زبیر رضی اللہ عنہ اس مہم کے لیے تیار ہو گئے، آپ صلی اللہ علیہ وسلم نے پھر لوگوں کو پکارا تو دوبارہ سیدنا زبیر رضی اللہ عنہ ہی آمادہ ہو کر آگے بڑھے، اس پر رسول اللہ صلی اللہ علیہ وسلم نے ارشاد فرمایا: ”بے شک ہر نبی کا ایک حواری (مخلص جاں نثار) ہوتا ہے اور میرے حواری زبیر ہیں“۔ [مسند أبي يعلى الموصلي/مسند جابر/حدیث: 2022]

سیدنا جابر رضی اللہ عنہ سے روایت ہے کہ رسول اللہ صلی اللہ علیہ وسلم نے ارشاد فرمایا: ”مدینہ منورہ (لوہار کی) بھٹی کی مانند ہے، جو اپنے میل کچیل (ناپاک اجزاء) کو نکال باہر کرتا ہے اور اس کی پاکیزگی نکھر کر خالص ہو جاتی ہے۔“ [مسند أبي يعلى الموصلي/مسند جابر/حدیث: 2023]

سیدنا جابر رضی اللہ عنہ سے روایت ہے کہ یہودی یہ کہا کرتے تھے کہ ”جو شخص اپنی بیوی کے پاس پیچھے کی سمت سے (قبل میں) آئے تو بچہ بھینگا پیدا ہوتا ہے“، اس پر اللہ تعالیٰ نے یہ آیتِ کریمہ نازل فرمائی: ﴿نِسَاؤُكُمْ حَرْثٌ لَكُمْ فَأْتُوا حَرْثَكُمْ أَنَّى شِئْتُمْ﴾ ”تمہاری بیویاں تمہاری کھیتیاں ہیں، پس تم اپنی کھیتیوں میں جس طرح چاہو آؤ“۔ [مسند أبي يعلى الموصلي/مسند جابر/حدیث: 2024]

سیدنا جابر رضی اللہ عنہ سے روایت ہے کہ رسول اللہ صلی اللہ علیہ وسلم نے ارشاد فرمایا: ”ایک کے مقابلے میں دو جانوروں کا نقد (دست بدست) تبادلہ کرنے میں کوئی حرج نہیں، لیکن ادھار کی صورت میں اس میں کوئی خیر و بھلائی نہیں ہے۔“ [مسند أبي يعلى الموصلي/مسند جابر/حدیث: 2025]