سیدنا جابر رضی اللہ عنہ سے روایت ہے کہ رسول اللہ صلی اللہ علیہ وسلم نے ارشاد فرمایا: ”تم میں سے کسی شخص کا پیٹ پیپ یا خون سے بھر جانا اس کے لیے اس سے کہیں بہتر ہے کہ وہ ایسے اشعار سے بھر جائے جن میں میری ہجو (مذمت) کی گئی ہو۔“ [مسند أبي يعلى الموصلي/مسند جابر/حدیث: 2056]

سیدنا جابر رضی اللہ عنہ سے روایت ہے کہ رسول اللہ صلی اللہ علیہ وسلم نے سیدنا ابوطیبہ رضی اللہ عنہ کو بلا بھیجا اور انہوں نے آپ صلی اللہ علیہ وسلم کے پچھنے لگائے (حجامہ کیا)، پھر آپ صلی اللہ علیہ وسلم نے ان سے دریافت فرمایا: ”تمہارا (اپنے مالک کو ادا کیا جانے والا روزانہ کا) مقررہ خراج کتنا ہے؟“ انہوں نے عرض کیا: ”تین صاع“، تو آپ صلی اللہ علیہ وسلم نے ان کے ذمے سے ایک صاع کم کروا دیا۔ [مسند أبي يعلى الموصلي/مسند جابر/حدیث: 2057]

سیدنا جابر بن عبد اللہ رضی اللہ عنہما سے روایت ہے کہ نبی کریم صلی اللہ علیہ وسلم نے ارشاد فرمایا: ”تم سوتے وقت اثمد (سرمہ) کا استعمال لازم کر لو، کیونکہ یہ بصارت کو جلا بخشتا اور (پلکوں کے) بال اگاتا ہے۔“ [مسند أبي يعلى الموصلي/مسند جابر/حدیث: 2058]

سیدنا جابر رضی اللہ عنہ سے روایت ہے کہ رسول اللہ صلی اللہ علیہ وسلم نے ارشاد فرمایا: ”گفتگو کرنے سے پہلے سلام کرنا چاہیے۔“ [مسند أبي يعلى الموصلي/مسند جابر/حدیث: 2059]

سیدنا جابر رضی اللہ عنہ سے روایت ہے کہ رسول اللہ صلی اللہ علیہ وسلم نے ارشاد فرمایا: ”گفتگو کرنے سے پہلے سلام کرنا چاہیے۔“ [مسند أبي يعلى الموصلي/مسند جابر/حدیث: 2059M1]

سیدنا جابر رضی اللہ عنہ سے روایت ہے کہ ہم غزوۂ بدر کے موقع پر رسول اللہ صلی اللہ علیہ وسلم کے ہمراہ نماز ادا کر رہے تھے کہ اچانک آپ صلی اللہ علیہ وسلم اپنی نماز میں مسکرا دیے، جب آپ صلی اللہ علیہ وسلم نماز سے فارغ ہوئے تو ہم نے عرض کی: ”اے اللہ کے رسول! ہم نے دیکھا کہ آپ (دورانِ نماز) مسکرا رہے تھے؟“ آپ صلی اللہ علیہ وسلم نے ارشاد فرمایا: ”درحقیقت میرے پاس سے (فرشتہ) میکائیل گزرے جبکہ ان کے پروں پر گرد و غبار کے اثرات تھے اور وہ دشمن کا پیچھا کرنے کے بعد واپس لوٹ رہے تھے، انہوں نے مجھے دیکھ کر تبسم فرمایا تو میں نے بھی انہیں دیکھ کر مسکراہٹ کا تبادلہ کیا۔“ [مسند أبي يعلى الموصلي/مسند جابر/حدیث: 2060]

سیدنا جابر بن عبد اللہ رضی اللہ عنہ سے روایت ہے کہ رسول اللہ صلی اللہ علیہ وسلم نے ارشاد فرمایا: ”جو شخص اپنے مال کی حفاظت کرتے ہوئے قتل کر دیا جائے وہ شہید ہے“۔ [مسند أبي يعلى الموصلي/مسند جابر/حدیث: 2061]

سیدنا جابر بن عبداللہ رضی اللہ عنہما سے روایت ہے کہ ہم رسول اللہ صلی اللہ علیہ وسلم کے ہمراہ (اراک کے درخت کا پھل) پیلو چن رہے تھے تو آپ صلی اللہ علیہ وسلم نے ارشاد فرمایا: ”تم اس میں سے سیاہ رنگ کے پھل تلاش کیا کرو کیونکہ وہ سب سے زیادہ خوش ذائقہ ہوتے ہیں۔“ ہم نے عرض کیا: (اے اللہ کے رسول صلی اللہ علیہ وسلم !) کیا آپ بکریاں چرایا کرتے تھے؟ آپ صلی اللہ علیہ وسلم نے ارشاد فرمایا: ”جی ہاں، اور کیا کوئی ایسا نبی گزرا ہے جس نے بکریاں نہ چرائی ہوں؟“ [مسند أبي يعلى الموصلي/مسند جابر/حدیث: 2062]

سیدنا جابر رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا: ”مجھے دکھایا گیا کہ میں جنت میں داخل کیا گیا ہوں، تو وہاں اچانک میری ملاقات سیدہ رمیصاء رضی اللہ عنہا سے ہوئی جو سیدنا ابو طلحہ رضی اللہ عنہ کی زوجہ ہیں“، آپ صلی اللہ علیہ وسلم نے مزید ارشاد فرمایا: ”اور میں نے اپنے آگے کسی کے قدموں کی چاپ سنی تو میں نے دریافت کیا: اے جبرائیل! یہ کون ہے؟ انہوں نے عرض کیا: یہ سیدنا بلال رضی اللہ عنہ ہیں، آپ صلی اللہ علیہ وسلم نے فرمایا: اور میں نے ایک سفید محل دیکھا جس کے صحن میں ایک لڑکی موجود تھی، میں نے پوچھا: یہ محل کس کا ہے؟ اس نے بتایا کہ یہ سیدنا عمر بن خطاب رضی اللہ عنہ کا ہے، چنانچہ میں نے چاہا کہ اس میں داخل ہو کر اسے دیکھوں مگر اے عمر! مجھے تمہاری غیرت یاد آگئی“، یہ سن کر سیدنا عمر رضی اللہ عنہ نےعرض کیا: ”اے اللہ کے رسول صلی اللہ علیہ وسلم ! میرے ماں باپ آپ پر فدا ہوں، کیا میں آپ کے معاملے میں بھی غیرت کروں گا؟“ [مسند أبي يعلى الموصلي/مسند جابر/حدیث: 2063]

سیدنا جابر رضی اللہ عنہ سے روایت ہے کہ ”رسول اللہ صلی اللہ علیہ وسلم نے مخابرت (پیداوار کے ایک مخصوص حصے کی شرط پر زمین بٹائی پر دینے) سے منع فرمایا ہے“۔ [مسند أبي يعلى الموصلي/مسند جابر/حدیث: 2064]