سیدنا ابن عباس رضی اللہ عنہما سے روایت ہے کہ ایک دیہاتی نبی کریم صلی اللہ علیہ وسلم کی خدمت میں حاضر ہوا اور مسجد ہی میں آپ صلی اللہ علیہ وسلم سے بیعت کی، پھر وہ وہاں سے مڑا اور ایک جگہ کھڑا ہو کر اپنی ٹانگیں پھیلا کر پیشاب کرنے لگا تو لوگ (اسے روکنے کے لیے) اس کی طرف لپکے، اس پر نبی کریم صلی اللہ علیہ وسلم نے ارشاد فرمایا: ”اس شخص کا پیشاب (درمیان میں) نہ روکو۔“ پھر آپ صلی اللہ علیہ وسلم نے اسے بلا کر دریافت فرمایا: ”کیا تم مسلمان نہیں ہو؟“ اس نے عرض کیا: کیوں نہیں (میں مسلمان ہوں)۔ آپ صلی اللہ علیہ وسلم نے پوچھا: ”پھر تمہیں مسجد میں پیشاب کرنے پر کس چیز نے ابھارا؟“ اس نے جواب دیا: اس ذات کی قسم جس نے آپ کو حق کے ساتھ مبعوث فرمایا ہے! میرا گمان تو یہی تھا کہ یہ بھی زمین کے عام حصوں میں سے ہی ایک حصہ ہے، اس لیے میں نے یہاں پیشاب کر دیا۔ تب نبی کریم صلی اللہ علیہ وسلم نے پانی کا ایک بڑا ڈول لانے کا حکم دیا اور وہ اس کے پیشاب پر بہا دیا گیا۔ [مسند أبي يعلى الموصلي/أول مسند ابن عباس/حدیث: 2557]

طاوس الیمانی رحمہ اللہ بیان کرتے ہیں کہ میں نے سیدنا عبداللہ بن عباس رضی اللہ عنہما سے عرض کیا کہ لوگ یہ گمان کرتے ہیں کہ رسول اللہ صلی اللہ علیہ وسلم نے ارشاد فرمایا ہے: ”جمعہ کے دن غسل کیا کرو اور اپنے سروں کو دھویا کرو خواہ تم حالتِ جنابت میں نہ ہو، اور خوشبو استعمال کیا کرو۔“ اس پر سیدنا ابن عباس رضی اللہ عنہما نے فرمایا: ”خوشبو کے متعلق تو میں نہیں جانتا، البتہ غسل کے بارے میں ہاں (یعنی یہ حکم ثابت ہے)۔“ [مسند أبي يعلى الموصلي/أول مسند ابن عباس/حدیث: 2558]

سیدنا عبداللہ بن عباس رضی اللہ عنہما سے روایت ہے کہ ”رسول اللہ صلی اللہ علیہ وسلم عشاء کی نماز کے بعد رات کے وقت تیرہ رکعتیں ادا فرمایا کرتے تھے۔“ [مسند أبي يعلى الموصلي/أول مسند ابن عباس/حدیث: 2559]

سیدنا عبد اللہ بن عباس رضی اللہ عنہما سے روایت ہے کہ ”رسول اللہ صلی اللہ علیہ وسلم کی وفات اس حال میں ہوئی کہ آپ صلی اللہ علیہ وسلم نے (خلافت و جانشینی کے حوالے سے) کوئی وصیت نہیں فرمائی تھی۔“ [مسند أبي يعلى الموصلي/أول مسند ابن عباس/حدیث: 2560]

سیدنا عبد اللہ بن عباس رضی اللہ عنہما سے روایت ہے کہ ”رسول اللہ صلی اللہ علیہ وسلم نے دو رکعتیں نماز ادا فرمائیں جن میں آپ صلی اللہ علیہ وسلم نے ﴿ام الکتاب﴾ کی تلاوت فرمائی اور ان میں اس پر کسی چیز کا اضافہ نہیں فرمایا۔“ [مسند أبي يعلى الموصلي/أول مسند ابن عباس/حدیث: 2561]

سیدنا عبد اللہ بن عباس رضی اللہ عنہما سے روایت ہے کہ انہوں نے دریافت فرمایا: ”تم ان دو قرأتوں میں سے کسے پہلی قرأت شمار کرتے ہو؟“ لوگوں نے عرض کیا: ”سیدنا عبد اللہ بن مسعود رضی اللہ عنہ کی قرأت کو۔“ آپ رضی اللہ عنہ نے فرمایا: ”دراصل ہماری قرأت پہلی قرأت ہے، جبکہ سیدنا عبد اللہ بن مسعود رضی اللہ عنہ کی قرأت آخری اور حتمی قرأت ہے؛ بے شک رسول اللہ صلی اللہ علیہ وسلم پر ہر رمضان المبارک میں ایک بار قرآنِ کریم پیش کیا جاتا تھا، لیکن جس سال آپ صلی اللہ علیہ وسلم کی وفات ہوئی، اس سال آپ صلی اللہ علیہ وسلم پر دو مرتبہ قرآن پیش کیا گیا، اس موقع پر سیدنا عبد اللہ بن مسعود رضی اللہ عنہ موجود تھے، چنانچہ انہوں نے اس بات کا مشاہدہ فرما لیا تھا کہ اس میں سے کتنا حصہ منسوخ ہوا اور کیا تبدیل کیا گیا۔“ [مسند أبي يعلى الموصلي/أول مسند ابن عباس/حدیث: 2562]

سیدنا ابن عباس رضی اللہ عنہما سے روایت ہے کہ رسول اللہ صلی اللہ علیہ وسلم نے فرمایا: ”میری مدد بادِ صبا (مشرقی ہوا) کے ذریعے کی گئی ہے اور قومِ عاد کو بادِ دبور (مغربی ہوا) کے ذریعے ہلاک کر دیا گیا تھا۔“ [مسند أبي يعلى الموصلي/أول مسند ابن عباس/حدیث: 2563]

سیدنا ابن عباس رضی اللہ عنہما سے روایت ہے کہ ”رسول اللہ صلی اللہ علیہ وسلم نے غزوہ طائف کے موقع پر مشرکین کے ان غلاموں کو آزاد کر دیا تھا جو (اپنے مالکان کو چھوڑ کر) وہاں سے نکلے اور آپ صلی اللہ علیہ وسلم کی خدمت میں حاضر ہو گئے تھے۔“ [مسند أبي يعلى الموصلي/أول مسند ابن عباس/حدیث: 2564]

سیدنا ابن عباس رضی اللہ عنہما سے روایت ہے کہ ایک شخص رسول اللہ صلی اللہ علیہ وسلم کی بارگاہ میں حاضر ہوا اور عرض گزار ہوا: ”اے اللہ کے رسول! میں نے (خواب میں) ایک بادل دیکھا جس سے گھی اور شہد ٹپک رہا تھا، پس لوگ اسے اپنے ہاتھوں میں سمیٹنے لگے، کسی نے زیادہ لیا اور کسی نے کم اور کوئی ان کے درمیان تھا، اور گویا کہ آسمان سے ایک رسی لٹکائی گئی، پھر آپ صلی اللہ علیہ وسلم تشریف لائے اور آپ صلی اللہ علیہ وسلم نے اسے تھام لیا تو آپ صلی اللہ علیہ وسلم بلند ہو گئے اور اللہ تعالیٰ نے آپ صلی اللہ علیہ وسلم کو سرفرازی عطا فرمائی، پھر آپ صلی اللہ علیہ وسلم کے بعد ایک اور صاحب آئے، انہوں نے بھی اسے پکڑا اور وہ بھی بلند ہوئے اور اللہ نے انہیں رفعت دی، پھر آپ دونوں کے بعد ایک اور صاحب آئے، انہوں نے بھی اسے تھاما اور وہ بھی بلند ہوئے، پھر آپ سب کے بعد ایک اور صاحب آئے، انہوں نے اسے تھاما تو وہ رسی منقطع ہوگئی، پھر اسے ان کے لیے جوڑ دیا گیا تو وہ بھی بلند ہوئے اور اللہ نے انہیں سربلندی عطا فرمائی۔“ اس پر سیدنا ابوبکر صدیق رضی اللہ عنہ نے عرض کی: ”اے اللہ کے رسول! مجھے اجازت عطا فرمائیں کہ میں اس کی تعبیر بیان کروں۔“ آپ صلی اللہ علیہ وسلم نے انہیں اجازت دی تو انہوں نے عرض کی: ”بادل سے مراد دینِ اسلام ہے، اور گھی و شہد سے مراد قرآنِ کریم کی حلاوت و لذت ہے، اور رسی سے مراد وہ حق و ہدایت ہے جس پر آپ صلی اللہ علیہ وسلم قائم ہیں، آپ صلی اللہ علیہ وسلم اسے تھامے ہوئے ہیں تو اللہ آپ صلی اللہ علیہ وسلم کو رفعت عطا فرمائے گا، پھر آپ صلی اللہ علیہ وسلم کے بعد ایک شخص آپ کے منہج پر چلے گا اور وہ بھی بلند مرتبہ پائے گا، پھر آپ دونوں کے بعد ایک اور شخص آئے گا جو آپ دونوں کے نقشِ قدم پر چلے گا اور وہ بھی سرفراز ہوگا، پھر آپ لوگوں کے بعد ایک اور شخص آئے گا جو آپ کے طریقے پر ہوگا مگر اس کے معاملے میں وہ رسی ٹوٹ جائے گی، پھر اسے اس کے لیے جوڑ دیا جائے گا اور وہ بھی بلند ہوگا اور اللہ اسے رفعت عطا فرمائے گا۔“ پھر انہوں نے دریافت کیا: ”اے اللہ کے رسول! کیا میں نے درست تعبیر کی ہے؟“ آپ صلی اللہ علیہ وسلم نے ارشاد فرمایا: ”تم نے کچھ درست کہا اور کچھ میں خطا کی۔“ انہوں نے عرض کی: ”اے اللہ کے رسول! میں آپ کو قسم دیتا ہوں کہ مجھے میری غلطی سے ضرور آگاہ فرمائیے۔“ آپ صلی اللہ علیہ وسلم نے ارشاد فرمایا: ”قسم نہ کھاؤ۔“ [مسند أبي يعلى الموصلي/أول مسند ابن عباس/حدیث: 2565]

سیدنا ابن عباس رضی اللہ عنہما سے روایت ہے کہ انہوں نے فرمایا: ”رسول اللہ صلی اللہ علیہ وسلم نے (بیت اللہ کے گرد) کسی بھی ایسی چیز کا طواف نہیں فرمایا مگر یہ کہ وہ بیت اللہ ہی کا حصہ تھی۔“ [مسند أبي يعلى الموصلي/أول مسند ابن عباس/حدیث: 2566]