سیدنا انس رضی اللہ عنہ سے روایت ہے کہ ”سیدہ ام سلیم رضی اللہ عنہا نے ان کے ہاتھ رسول اللہ صلی اللہ علیہ وسلم کی خدمتِ اقدس میں کوئی چیز بھیجی—جس کے متعلق ہمام رحمہ اللہ نے صراحت کی کہ اس میں تازہ کھجوریں تھیں—تو آپ صلی اللہ علیہ وسلم ایک ایک مٹھی بھر کر اپنی بعض ازواجِ مطہرات کی طرف بھیجنے لگے، اور آپ صلی اللہ علیہ وسلم ایک ایک مٹھی بھر کر (تقسیم فرماتے) حالانکہ آپ صلی اللہ علیہ وسلم خود بھی ان کی رغبت و خواہش رکھتے تھے۔“ [مسند أبي يعلى الموصلي/مسند أنس بن مالك/حدیث: 2896]

سیدنا انس رضی اللہ عنہ سے روایت ہے کہ رسول اللہ صلی اللہ علیہ وسلم یہ دعا فرمایا کرتے تھے: «اللَّهُمَّ إِنِّي أَعُوذُ بِكَ مِنَ الْبَرَصِ وَالْجُذَامِ وَالْجُنُونِ وَسَيِّئِ الْأَسْقَامِ» ”اے اللہ! میں برص (سفید داغ)، جذام (کوڑھ)، دیوانگی اور بری بیماریوں سے تیری پناہ مانگتا ہوں۔“ [مسند أبي يعلى الموصلي/مسند أنس بن مالك/حدیث: 2897]

سیدنا انس رضی اللہ عنہ سے روایت ہے کہ رسول اللہ صلی اللہ علیہ وسلم نے ارشاد فرمایا: ”قیامت کے دن موت کو اس حال میں لایا جائے گا گویا کہ وہ ایک چتکبرا مینڈھا ہے، پھر اسے جنت اور دوزخ کے درمیان کھڑا کر دیا جائے گا، پھر ایک پکارنے والا پکارے گا: اے اہل جنت! وہ عرض کریں گے: «لَبَّيْكَ رَبَّنَا» ”اے ہمارے پروردگار! ہم حاضر ہیں“، آپ صلی اللہ علیہ وسلم نے فرمایا: پھر ان سے پوچھا جائے گا: کیا تم اسے پہچانتے ہو؟ وہ عرض کریں گے: جی ہاں اے ہمارے رب! یہ موت ہے، چنانچہ اسے ذبح کر دیا جائے گا جیسے بکری ذبح کی جاتی ہے، پس یہ (اہلِ جنت) ابدی طور پر مامون و بے خوف ہو جائیں گے اور ان (اہلِ جہنم) کی نجات کی امیدیں منقطع ہو جائیں گی۔“ [مسند أبي يعلى الموصلي/مسند أنس بن مالك/حدیث: 2898]

سیدنا انس بن مالک رضی اللہ عنہ سے روایت ہے کہ رسول اللہ صلی اللہ علیہ وسلم نے ارشاد فرمایا: ”اللہ تعالیٰ قیامت کے دن تمام لوگوں کو جمع فرمائے گا، تو ان کے دلوں میں (الہاماً) یہ بات ڈالی جائے گی اور وہ کہیں گے: کاش! ہم اپنے رب کے حضور کسی کی سفارش پیش کریں جو ہمیں ہمارے اس (تکلیف دہ) مقام سے راحت عطا فرمائے۔ پس وہ سیدنا آدم علیہ السلام کے پاس حاضر ہوں گے اور عرض کریں گے: اے آدم! آپ تمام انسانوں کے باپ ہیں، اللہ نے آپ کو اپنے دستِ قدرت سے پیدا فرمایا اور اپنے فرشتوں سے آپ کو سجدہ کروایا، لہٰذا آپ اپنے رب کے حضور ہماری شفاعت فرمائیں تاکہ وہ ہمیں اس جگہ سے نجات دے۔ وہ فرمائیں گے: میں اس منصب کا اہل نہیں ہوں، اور وہ اپنی اس لغزش کو یاد کریں گے جو ان سے سرزد ہوئی تھی اور اس کی وجہ سے اپنے رب سے حیا محسوس کریں گے، اور کہیں گے: بلکہ تم نوح علیہ السلام کے پاس جاؤ جو پہلے رسول ہیں جنہیں اللہ نے مبعوث فرمایا۔ چنانچہ وہ سیدنا نوح علیہ السلام کے پاس آئیں گے تو وہ بھی فرمائیں گے: میں اس منصب کے لائق نہیں ہوں اور وہ اپنی اس خطا کو یاد کریں گے جو ان سے سرزد ہوئی تھی اور اپنے رب سے حیا کریں گے، اور کہیں گے: تم ابراہیم علیہ السلام کے پاس چلے جاؤ۔ آپ صلی اللہ علیہ وسلم نے فرمایا: پھر وہ سیدنا ابراہیم علیہ السلام کے پاس آئیں گے تو وہ بھی فرمائیں گے: میں اس لائق نہیں ہوں اور وہ اپنی لغزش کو یاد کر کے اپنے رب سے حیا کریں گے اور کہیں گے: بلکہ تم موسیٰ علیہ السلام کے پاس جاؤ۔ پھر وہ سیدنا موسیٰ علیہ السلام کی خدمت میں حاضر ہوں گے تو وہ بھی یہی فرمائیں گے: میں اس منصب کا اہل نہیں ہوں اور وہ اپنی لغزش کو یاد کر کے اپنے رب سے شرمائیں گے اور کہیں گے: تم عیسیٰ علیہ السلام کے پاس جاؤ جو اللہ کی روح اور اس کا کلمہ ہیں۔ آپ صلی اللہ علیہ وسلم نے فرمایا: پھر وہ سیدنا عیسیٰ علیہ السلام کے پاس آئیں گے تو وہ فرمائیں گے: میں اس منصب کا اہل نہیں ہوں، تم محمد صلی اللہ علیہ وسلم کے پاس چلے جاؤ، وہ اللہ کے ایسے بندے ہیں جن کے اگلے اور پچھلے تمام گناہ اللہ نے معاف فرما دیے ہیں۔ آپ صلی اللہ علیہ وسلم نے فرمایا: پس وہ میرے پاس آئیں گے، تو میں اپنے رب سے (سفارش کی) اجازت مانگوں گا اور مجھے اجازت عطا کی جائے گی، پھر جب میں اپنے رب کو دیکھوں گا تو سجدے میں گر جاؤں گا، اللہ تعالیٰ جب تک چاہے گا مجھے اسی حال میں رہنے دے گا، پھر فرمایا جائے گا: اے محمد! اپنا سر اٹھائیے، کہیے! آپ کی بات سنی جائے گی، مانگیے! آپ کو دیا جائے گا، اور شفاعت کیجیے! آپ کی شفاعت قبول کی جائے گی۔ پس میں اپنا سر اٹھاؤں گا اور اپنے رب کی ایسی حمد و ثنا کروں گا جو وہ مجھے سکھائے گا، پھر میں سفارش کروں گا تو اللہ تعالیٰ میرے لیے ایک حد مقرر فرما دے گا، پس میں ان لوگوں کو آگ سے نکال کر جنت میں داخل کر دوں گا۔ پھر میں دوبارہ لوٹوں گا اور سجدے میں گر جاؤں گا اور اپنے رب کی ویسی ہی حمد کروں گا جو وہ مجھے سکھائے گا، پھر میں سفارش کروں گا تو اللہ تعالیٰ میرے لیے ایک اور حد مقرر فرما دے گا، میں انہیں جہنم سے نکال کر جنت میں داخل کر دوں گا۔ پھر میں تیسری مرتبہ رجوع کروں گا اور سجدہ ریز ہو کر اپنے رب کی وہی حمد کروں گا جو وہ مجھے سکھائے گا، پھر کہا جائے گا: اے محمد! کہیے! آپ کی پکار سنی جائے گی، مانگیے! آپ کی مراد پوری کی جائے گی، شفاعت کیجیے! آپ کی شفاعت مانی جائے گی۔ پس میں اپنا سر اٹھاؤں گا اور اپنے رب کی ویسی ہی حمد کروں گا جو وہ مجھے سکھائے گا، پھر میں شفاعت کروں گا تو اللہ تعالیٰ میرے لیے ایک گروہ کی حد متعین فرما دے گا، میں انہیں آگ سے نکال کر جنت میں پہنچا دوں گا۔“ اور آپ صلی اللہ علیہ وسلم نے تیسری یا چوتھی مرتبہ ارشاد فرمایا: ”پھر جہنم میں صرف وہی باقی رہ جائیں گے جنہیں قرآن نے روک لیا ہوگا۔“ قتادہ رحمہ اللہ نے اس کی وضاحت میں فرمایا کہ: ”اس سے مراد وہ لوگ ہیں جن پر (قرآن کے حکم کے مطابق) ہمیشگی کا عذاب واجب ہو چکا ہے۔“ [مسند أبي يعلى الموصلي/مسند أنس بن مالك/حدیث: 2899]

سیدنا انس رضی اللہ عنہ سے روایت ہے کہ رسول اللہ صلی اللہ علیہ وسلم (نماز میں) اس قدر طویل قیام فرماتے کہ آپ صلی اللہ علیہ وسلم کے قدمِ مبارک یا پنڈلیاں متورم ہو جاتیں، تو آپ صلی اللہ علیہ وسلم سے عرض کیا گیا: ”کیا اللہ تعالیٰ نے آپ کے لیے ﴿مَا تَقَدَّمَ مِنْ ذَنْبِكَ وَمَا تَأَخَّرَ﴾ یعنی آپ کی تمام اگلی اور پچھلی خطائیں معاف نہیں فرما دیں؟“ تو آپ صلی اللہ علیہ وسلم نے ارشاد فرمایا: «أَفَلَا أَكُونُ عَبْدًا شَكُورًا» ”تو کیا میں ایک شکر گزار بندہ نہ بنوں؟“ [مسند أبي يعلى الموصلي/مسند أنس بن مالك/حدیث: 2900]

سیدنا انس رضی اللہ عنہ سے روایت ہے کہ رسول اللہ صلی اللہ علیہ وسلم نے ارشاد فرمایا: ”قیامت اس وقت تک برپا نہیں ہوگی جب تک کہ علم اٹھا نہ لیا جائے، جہالت غالب نہ آ جائے، عورتوں کی کثرت نہ ہو جائے اور مردوں کی تعداد اس قدر کم نہ ہو جائے کہ پچاس عورتوں کا نگران و کفیل محض ایک مرد رہ جائے۔“ [مسند أبي يعلى الموصلي/مسند أنس بن مالك/حدیث: 2901]

سیدنا انس رضی اللہ عنہ سے روایت ہے کہ رسول اللہ صلی اللہ علیہ وسلم نے ارشاد فرمایا: ”میری امت کی عمریں ساٹھ سے ستر سال کے درمیان ہوں گی، اور ان میں سے بہت کم لوگ ایسے ہوں گے جو اسی سال کی عمر کو پہنچیں گے۔“ [مسند أبي يعلى الموصلي/مسند أنس بن مالك/حدیث: 2902]

سیدنا انس رضی اللہ عنہ سے روایت ہے کہ رسول اللہ صلی اللہ علیہ وسلم نے ارشاد فرمایا: ”حصولِ علم ہر مسلمان پر فرض ہے۔“ [مسند أبي يعلى الموصلي/مسند أنس بن مالك/حدیث: 2903]

سیدنا انس رضی اللہ عنہ سے روایت ہے کہ رسول اللہ صلی اللہ علیہ وسلم جب کسی غزوہ (جنگ) کے لیے روانہ ہوتے تو یہ دعا فرماتے تھے: «اللَّهُمَّ أَنْتَ عَضُدِي، وَأَنْتَ نَصِيرِي، وَبِكَ أُقَاتِلُ» ”اے اللہ! تو ہی میرا بازو (قوت و سہارا) ہے، تو ہی میرا مددگار ہے، اور تیری ہی دی ہوئی ہمت و نصرت کے ساتھ میں دشمن سے قتال کرتا ہوں۔“ [مسند أبي يعلى الموصلي/مسند أنس بن مالك/حدیث: 2904]

سیدنا انس رضی اللہ عنہ سے روایت ہے کہ نبی کریم صلی اللہ علیہ وسلم کا یہ معمول مبارک تھا کہ جب کبھی تیز ہوا یا آندھی چلتی تو آپ صلی اللہ علیہ وسلم فرماتے: «اللَّهُمَّ أَسْأَلُكَ مِنْ خَيْرِ مَا أُمِرَتْ بِهِ، وَأَعُوذُ بِكَ مِنْ شَرِّ مَا أُمِرَتْ بِهِ» ”اے اللہ! میں تجھ سے اس بھلائی کا سوال کرتا ہوں جس کا اسے (ہوا کو) حکم دیا گیا ہے اور میں تیری پناہ مانگتا ہوں اس برائی سے جس کا اسے حکم دیا گیا ہے۔“ [مسند أبي يعلى الموصلي/مسند أنس بن مالك/حدیث: 2905]