قتادہ رحمہ اللہ بیان کرتے ہیں کہ میں نے سیدنا انس بن مالک رضی اللہ عنہ سے دریافت کیا کہ رسول اللہ صلی اللہ علیہ وسلم کی قرات کیسی تھی؟ تو انہوں نے جواب دیا: ”آپ صلی اللہ علیہ وسلم اپنی آواز کو خوب کھینچ کر (مد کے ساتھ) تلاوت فرماتے تھے۔“ [مسند أبي يعلى الموصلي/مسند أنس بن مالك/حدیث: 2906]

سیدنا انس رضی اللہ عنہ سے روایت ہے کہ ”جب اللہ کے نبی سیدنا موسیٰ علیہ السلام نے اپنے ساتھی کو اس مدت (کی تکمیل) کی طرف بلایا جو ان کے درمیان (طے) تھی، تو ان کے ساتھی نے ان سے کہا کہ ہر وہ بکری جو اپنے (اصلی) رنگ کے علاوہ کسی دوسرے رنگ کا بچہ جنے گی، اس کا وہ بچہ آپ کا ہوگا، پس سیدنا موسیٰ علیہ السلام نے ارادہ فرمایا اور پانی (کے گھاٹ) پر کچھ رسیاں رکھ دیں، چنانچہ جب بکریوں نے ان رسیوں کو دیکھا تو وہ بدک گئیں اور (جوش میں آکر) ادھر ادھر گھومنے لگیں، پھر ان سب نے چتکبرے بچے جنے سوائے ایک بکری کے، چنانچہ سیدنا موسیٰ علیہ السلام اس سال ان تمام بچوں کو لے گئے۔“ [مسند أبي يعلى الموصلي/مسند أنس بن مالك/حدیث: 2907]

سیدنا انس رضی اللہ عنہ سے روایت ہے کہ جب رسول اللہ صلی اللہ علیہ وسلم خیبر تشریف لائے تو آپ صلی اللہ علیہ وسلم نے فرمایا: ”بلاشبہ جب ہم کسی قوم کے میدان میں (بطورِ لشکر) اترتے ہیں تو ﴿فَسَاءَ صَبَاحُ الْمُنْذَرِينَ﴾ ”پھر ان لوگوں کی صبح بہت ہی بری ہو جاتی ہے جنہیں (اللہ کے عذاب سے) ڈرایا گیا ہو“۔“ [مسند أبي يعلى الموصلي/مسند أنس بن مالك/حدیث: 2908]

سیدنا انس رضی اللہ عنہ سے روایت ہے کہ رسول اللہ صلی اللہ علیہ وسلم نے ارشاد فرمایا: ”جس شخص نے مجھ پر دانستہ جھوٹ منسوب کیا، اسے چاہیے کہ وہ اپنا ٹھکانا جہنم کی آگ میں بنا لے۔“ اور موسیٰ بن محمد کی روایت میں ”جان بوجھ کر“ (متعمداً) کا لفظ مذکور نہیں ہے۔ [مسند أبي يعلى الموصلي/مسند أنس بن مالك/حدیث: 2909]

سیدنا انس رضی اللہ عنہ سے روایت ہے کہ رسول اللہ صلی اللہ علیہ وسلم ، سیدنا ابوبکر، سیدنا عمر اور سیدنا عثمان رضی اللہ عنہم احد پہاڑ پر تھے کہ پہاڑ لرزنے لگا۔ آپ صلی اللہ علیہ وسلم نے اسے اپنے پاؤں سے ضرب لگائی اور فرمایا: ”اے احد! ٹھہر جا؛ تجھ پر ایک نبی، ایک صدیق اور دو شہید ہیں۔“ [مسند أبي يعلى الموصلي/مسند أنس بن مالك/حدیث: 2910]

سیدنا انس رضی اللہ عنہ سے روایت ہے کہ رسول اللہ صلی اللہ علیہ وسلم دونوں ہتھیلیوں کے اندرونی رخ سے دعا کرتے تھے۔ راوی نے ”اس طرح“ کہہ کر اپنی دونوں ہتھیلیاں ظاہر کیں۔ [مسند أبي يعلى الموصلي/مسند أنس بن مالك/حدیث: 2911]

سیدنا انس رضی اللہ عنہ سے روایت ہے کہ ”رسول اللہ صلی اللہ علیہ وسلم اپنے موزوں اور اپنے جوتوں میں (پہن کر) نماز ادا فرمایا کرتے تھے۔“ [مسند أبي يعلى الموصلي/مسند أنس بن مالك/حدیث: 2912]

سیدنا انس رضی اللہ عنہ سے روایت ہے کہ ”رسول اللہ صلی اللہ علیہ وسلم نے سال کے پانچ ایام میں روزہ رکھنے سے ممانعت فرمائی ہے: عید الفطر کا دن، عید الاضحیٰ کا دن اور ایامِ تشریق کے تین دن۔“ [مسند أبي يعلى الموصلي/مسند أنس بن مالك/حدیث: 2913]

سیدنا انس رضی اللہ عنہ سے روایت ہے کہ اللہ کے نبی صلی اللہ علیہ وسلم نے معراج کے سفر کی کیفیت بیان کرتے ہوئے ارشاد فرمایا کہ ”جب مجھے آسمان کی طرف لے جایا گیا تو چوتھے آسمان پر میرا گزر سیدنا ادریس علیہ السلام کے پاس سے ہوا۔“ [مسند أبي يعلى الموصلي/مسند أنس بن مالك/حدیث: 2914]

سیدنا انس رضی اللہ عنہ سے روایت ہے کہ رسول اللہ صلی اللہ علیہ وسلم صحابہ کرام کو نماز پڑھا رہے تھے کہ ایک شخص آیا اور وہ نماز میں شامل ہو گیا، اس حال میں کہ (تیزی سے چلنے کی وجہ سے) اس کا سانس پھولا ہوا تھا، تو اس نے کہا: «اللَّهُ أَكْبَرُ، الْحَمْدُ لِلَّهِ حَمْدًا كَثِيرًا طَيِّبًا مُبَارَكًا فِيهِ» ”اللہ سب سے بڑا ہے، تمام تعریفیں اللہ ہی کے لیے ہیں، ایسی تعریف جو بہت زیادہ ہو، پاکیزہ ہو اور اس میں برکت دی گئی ہو“، پھر جب رسول اللہ صلی اللہ علیہ وسلم اپنی نماز مکمل کر چکے تو دریافت فرمایا: ”تم میں سے وہ کلمات کہنے والا کون ہے؟“ تب لوگ خاموش رہے، آپ صلی اللہ علیہ وسلم نے پھر دریافت فرمایا: ”تم میں سے وہ کلمات کہنے والا کون ہے؟ کیونکہ اس نے کوئی نازیبا بات نہیں کہی ہے“ تو اس شخص نے عرض کی: ”اے اللہ کے رسول! میں ہوں، میں جب پہنچا تو میرا سانس چڑھا ہوا تھا، چنانچہ میں نے یہ کلمات کہہ دیے“، تب آپ صلی اللہ علیہ وسلم نے ارشاد فرمایا: ”یقیناً میں نے بارہ فرشتوں کو دیکھا جو ان کلمات کی طرف ایک دوسرے سے سبقت لے جانے کی کوشش کر رہے تھے کہ ان میں سے کون ان کلمات کو (بارگاہِ الٰہی میں) اوپر لے کر جائے“۔ [مسند أبي يعلى الموصلي/مسند أنس بن مالك/حدیث: 2915]