سیدنا انس بن مالک رضی اللہ عنہ سے روایت ہے کہ ”سیدنا حسن بن علی رضی اللہ عنہما چہرے کی مشابہت اور خدوخال میں تمام لوگوں کے مقابلے میں رسول اللہ صلی اللہ علیہ وسلم کے سب سے زیادہ ہم شکل تھے۔“ [مسند أبي يعلى الموصلي/مسند أنس بن مالك/حدیث: 3585]

سیدنا انس رضی اللہ عنہ سے روایت ہے کہ انہوں نے فرمایا: ”میں نے رسول اللہ صلی اللہ علیہ وسلم کی صاحبزادی سیدہ زینب رضی اللہ عنہا کے زیبِ تن ریشم کی ایک دھاری دار قمیص دیکھی۔“ [مسند أبي يعلى الموصلي/مسند أنس بن مالك/حدیث: 3586]

سیدنا انس رضی اللہ عنہ سے روایت ہے کہ رسول اللہ صلی اللہ علیہ وسلم نے ارشاد فرمایا: ”بے شک میرا حوض (اس قدر وسیع ہے کہ اس کی مسافت) ایلہ اور یمن کے شہر صنعاء کے درمیانی فاصلے کے برابر ہے، اور یقیناً اس میں (پانی پینے کے لیے) رکھے ہوئے صراحی نما برتنوں کی تعداد آسمان کے ستاروں کے برابر ہے۔“ [مسند أبي يعلى الموصلي/مسند أنس بن مالك/حدیث: 3587]

سیدنا انس رضی اللہ عنہ سے روایت ہے کہ نبی کریم صلی اللہ علیہ وسلم ”نماز کے دوران اشارہ فرمایا کرتے تھے۔“ [مسند أبي يعلى الموصلي/مسند أنس بن مالك/حدیث: 3588]

سیدنا انس بن مالک رضی اللہ عنہ فرماتے ہیں: میں نے رسول اللہ صلی اللہ علیہ وسلم کو قیر لگے برتن اور کدو کے خشک برتن میں مشروب (نبیذ) تیار کرنے سے منع فرماتے سنا، اور آپ صلی اللہ علیہ وسلم نے فرمایا: ”ہر نشہ آور چیز حرام ہے۔“ [مسند أبي يعلى الموصلي/مسند أنس بن مالك/حدیث: 3589]

سیدنا انس بن مالک رضی اللہ عنہ سے روایت ہے کہ ”رسول اللہ صلی اللہ علیہ وسلم کو چالیس سال کی عمر میں منصبِ نبوت عطا کیا گیا، پھر آپ صلی اللہ علیہ وسلم مکہ مکرمہ میں دس سال اور مدینہ منورہ میں دس سال مقیم رہے، اور جب آپ صلی اللہ علیہ وسلم کی وفات ہوئی تو آپ صلی اللہ علیہ وسلم کی عمر مبارک ساٹھ برس تھی، اور اس وقت آپ صلی اللہ علیہ وسلم کے سرِ انور اور داڑھی مبارک میں بیس بال بھی سفید نہیں تھے“۔ [مسند أبي يعلى الموصلي/مسند أنس بن مالك/حدیث: 3590]

سیدنا انس بن مالک رضی اللہ عنہ سے روایت ہے کہ رسول اللہ صلی اللہ علیہ وسلم نے ارشاد فرمایا: ”اگر ابنِ آدم کے پاس سونے کی ایک وادی ہو تو وہ یہ پسند کرے گا کہ اس کے پاس ایسی دو وادیاں ہوں، اور اس کے منہ کو مٹی کے سوا کوئی چیز نہیں بھر سکے گی، اور اللہ تعالیٰ اس کی توبہ قبول فرماتا ہے جو توبہ کرے۔“ [مسند أبي يعلى الموصلي/مسند أنس بن مالك/حدیث: 3591]

سیدنا انس بن مالک رضی اللہ عنہ سے روایت ہے کہ ”رسول اللہ صلی اللہ علیہ وسلم نے اس بات سے منع فرمایا ہے کہ کوئی شخص اپنے گھوڑے کی جفتی (نسل کشی کے لیے نر گھوڑے کی خدمات) کی قیمت وصول کرے۔“ [مسند أبي يعلى الموصلي/مسند أنس بن مالك/حدیث: 3592]

سیدنا انس بن مالک رضی اللہ عنہ سے روایت ہے کہ ”رسول اللہ صلی اللہ علیہ وسلم عصر کی نماز اس وقت ادا فرماتے تھے جب سورج بلند اور اس کی روشنی تیز ہوتی تھی، چنانچہ (نماز سے فراغت کے بعد) کوئی جانے والا مدینہ کے بالائی علاقوں (عوالی) کی سمت روانہ ہوتا تو وہ وہاں اس حال میں پہنچتا کہ سورج ابھی بلند ہی ہوتا تھا۔“ [مسند أبي يعلى الموصلي/مسند أنس بن مالك/حدیث: 3593]

سیدنا انس بن مالک رضی اللہ عنہ سے روایت ہے کہ غزوہ حنین کے دن جب اللہ تعالیٰ نے اپنے رسول کو قبیلہ ہوازن کے اموال سے وہ مالِ غنیمت عطا فرمایا جو اسے منظور تھا، تو رسول اللہ صلی اللہ علیہ وسلم قریش کے بعض (نومسلم) لوگوں کی تالیفِ قلب کے لیے انہیں سو سو اونٹ عطا فرمانے لگے، جس پر انصار کے کچھ لوگوں نے کہا: «يَغْفِرُ اللَّهُ لِرَسُولِ اللَّهِ» ”اللہ تعالیٰ رسول اللہ صلی اللہ علیہ وسلم کی مغفرت فرمائے“ کہ وہ قریش کو تو نواز رہے ہیں لیکن ہمیں چھوڑ دیا ہے حالانکہ ہماری تلواروں سے اب بھی ان دشمنوں کے خون کے قطرے ٹپک رہے ہیں۔ سیدنا انس رضی اللہ عنہ بیان کرتے ہیں کہ جب رسول اللہ صلی اللہ علیہ وسلم کو ان کی اس بات کی خبر پہنچی تو آپ صلی اللہ علیہ وسلم نے انصار کو بلا بھیجا اور انہیں چمڑے کے ایک خیمے میں جمع فرمایا اور ان کے ساتھ کسی اور کو نہ بلایا؛ جب وہ سب جمع ہو گئے تو رسول اللہ صلی اللہ علیہ وسلم ان کے پاس تشریف لائے اور دریافت فرمایا: ”وہ کیا بات ہے جو مجھے تمہاری طرف سے پہنچی ہے؟“ اس پر انصار کے سمجھدار لوگوں نے عرض کیا: ”اے اللہ کے رسول! ہمارے جو صاحبِ رائے بزرگ ہیں انہوں نے تو کچھ نہیں کہا، البتہ ہمارے کچھ نو عمر نوجوانوں نے یہ کہہ دیا ہے کہ اللہ تعالیٰ رسول اللہ صلی اللہ علیہ وسلم کی بخشش فرمائے، وہ قریش کو دے رہے ہیں اور ہمیں نظر انداز کر رہے ہیں حالانکہ ہماری تلواروں سے اب بھی ان کا خون ٹپک رہا ہے۔“ تب رسول اللہ صلی اللہ علیہ وسلم نے ارشاد فرمایا: ”میں ان لوگوں کو (مال) اس لیے دیتا ہوں کیونکہ یہ ابھی نئے نئے کفر سے نکلے ہیں، میں ان کی تالیفِ قلب کرنا چاہتا ہوں؛ کیا تم اس بات پر خوش نہیں ہو کہ لوگ تو مال و دولت لے کر جائیں اور تم اپنے گھروں کی طرف رسول اللہ صلی اللہ علیہ وسلم کو ساتھ لے کر لوٹو؟ اللہ کی قسم! تم جس ہستی کو لے کر واپس پلٹو گے وہ اس مال سے کہیں بہتر ہے جسے وہ لوگ لے کر جا رہے ہیں۔“ انہوں نے عرض کیا: ”اے اللہ کے رسول! ہم یقیناً اس پر راضی ہیں۔“ پھر آپ صلی اللہ علیہ وسلم نے ان سے فرمایا: ”تم میرے بعد عنقریب شدید قسم کی حق تلفی اور دوسروں کو ترجیح دیے جانے کا سامنا کرو گے، پس تم صبر کرنا یہاں تک کہ تم اللہ اور اس کے رسول سے جا ملو، اور یقیناً میں حوضِ کوثر پر موجود ہوں گا۔“ سیدنا انس رضی اللہ عنہ کہتے ہیں کہ انصار نے جواباً عرض کیا: ”جی ہاں (ہم صبر کریں گے)“۔ [مسند أبي يعلى الموصلي/مسند أنس بن مالك/حدیث: 3594]