سیدنا انس رضی اللہ عنہ سے روایت ہے کہ ”انہوں نے ایک روز رسول اللہ صلی اللہ علیہ وسلم کے دستِ مبارک میں چاندی کی ایک انگوٹھی دیکھی تو صحابہ کرام رضی اللہ عنہم نے بھی چاندی کی انگوٹھیاں بنوا لیں اور انہیں پہننے لگے، پھر نبی صلی اللہ علیہ وسلم نے اپنی انگوٹھی مبارک اتار پھینکی تو لوگوں نے بھی اپنی انگوٹھیاں اتار پھینکیں، نیز آپ صلی اللہ علیہ وسلم نے ایک شخص کے ہاتھ میں سونے کی انگوٹھی دیکھی تو آپ صلی اللہ علیہ وسلم نے اس کی انگلی پر ضرب لگائی، اور آپ صلی اللہ علیہ وسلم نے سیدہ ام سلمہ رضی اللہ عنہا کے کانوں میں سونے کی دو بالیاں دیکھیں تو آپ صلی اللہ علیہ وسلم نے ان سے اعراض برتا یہاں تک کہ انہوں نے انہیں اتار کر پھینک دیا۔“ [مسند أبي يعلى الموصلي/مسند أنس بن مالك/حدیث: 3565]

سیدنا انس رضی اللہ عنہ سے روایت ہے کہ رسول اللہ صلی اللہ علیہ وسلم نے (سورہ المائدہ کی یہ آیت) اس طرح تلاوت فرمائی: ﴿وَكَتَبْنَا عَلَيْهِمْ فِيهَا أَنَّ النَّفْسَ بِالنَّفْسِ وَالْعَيْنَ بِالْعَيْنِ﴾ ”اور ہم نے ان (بنی اسرائیل) پر اس (تورات) میں یہ بات فرض کر دی تھی کہ بلاشبہ جان کے بدلے جان اور آنکھ کے بدلے آنکھ ہے“۔ [مسند أبي يعلى الموصلي/مسند أنس بن مالك/حدیث: 3566]

سیدنا انس رضی اللہ عنہ سے روایت ہے کہ ”جب رسول اللہ صلی اللہ علیہ وسلم اس مرض میں مبتلا ہوئے جس میں آپ صلی اللہ علیہ وسلم کا وصال ہوا، تو سیدنا بلال رضی اللہ عنہ آپ صلی اللہ علیہ وسلم کی خدمت میں حاضر ہوئے اور نماز کی اطلاع دی، جس پر آپ صلی اللہ علیہ وسلم نے ارشاد فرمایا: ”اے بلال! تم نے پیغام پہنچا دیا، اب جو چاہے وہ نماز پڑھے اور جو چاہے وہ چھوڑ دے۔“ سیدنا بلال رضی اللہ عنہ نے عرض کی: ”یا رسول اللہ! پھر لوگوں کو نماز کون پڑھائے گا؟“ آپ صلی اللہ علیہ وسلم نے ارشاد فرمایا: ”سیدنا ابوبکر رضی اللہ عنہ سے کہو کہ وہ لوگوں کو نماز پڑھائیں۔“ چنانچہ جب سیدنا ابوبکر رضی اللہ عنہ امامت کے لیے آگے بڑھے تو رسول اللہ صلی اللہ علیہ وسلم کے حجرہ مبارک سے پردے ہٹا دیے گئے، ہم نے آپ صلی اللہ علیہ وسلم کی طرف دیکھا تو آپ صلی اللہ علیہ وسلم کا رخِ انور (نورانیت اور صفائی میں) گویا کاغذ کا ایک سفید ورق تھا اور آپ صلی اللہ علیہ وسلم پر سیاہ رنگ کی ایک دھاری دار چادر تھی، سیدنا ابوبکر رضی اللہ عنہ نے یہ گمان کیا کہ شاید آپ صلی اللہ علیہ وسلم باہر تشریف لانا چاہتے ہیں، چنانچہ وہ پیچھے ہٹنے لگے تو رسول اللہ صلی اللہ علیہ وسلم نے ان کی طرف اشارہ فرمایا کہ ”اپنی جگہ پر ہی رہو“، پس سیدنا ابوبکر رضی اللہ عنہ نے نماز پڑھائی اور اس روز کے بعد ہم نے رسول اللہ صلی اللہ علیہ وسلم کا دیدار نہیں کیا یہاں تک کہ اسی دن آپ صلی اللہ علیہ وسلم کی وفات ہو گئی۔“ [مسند أبي يعلى الموصلي/مسند أنس بن مالك/حدیث: 3567]

سیدنا انس رضی اللہ عنہ سے روایت ہے کہ جب احد کا معرکہ ہوا تو رسول اللہ صلی اللہ علیہ وسلم سیدنا حمزہ رضی اللہ عنہ کے پاس سے گزرے جن کی ناک کاٹی جا چکی تھی اور ان کے اعضاء کا مثلہ کیا گیا تھا، تو آپ صلی اللہ علیہ وسلم نے فرمایا: ”اگر یہ خدشہ نہ ہوتا کہ سیدہ صفیہ رضی اللہ عنہا اپنے دل میں رنج محسوس کریں گی تو میں انہیں (اسی حالت میں) چھوڑ دیتا یہاں تک کہ اللہ تعالیٰ انہیں درندوں کے پیٹوں اور پرندوں کے پوٹوں سے محشور فرماتا۔“ پھر انہیں ایک دھاریدار کملی میں کفن دیا گیا، (وہ اتنی چھوٹی تھی کہ) جب ان کا سر ڈھانپا جاتا تو ان کے پاؤں کھل جاتے اور جب ان کے پاؤں ڈھانپے جاتے تو ان کا سر ظاہر ہو جاتا، چنانچہ صحابہ نے ان کا سر ڈھانپ دیا، اور آپ صلی اللہ علیہ وسلم نے (اس وقت) شہداء میں سے کسی پر نمازِ جنازہ نہیں پڑھی اور فرمایا: ”میں آج تم پر گواہ ہوں۔“ آپ صلی اللہ علیہ وسلم دو دو اور تین تین شہداء کو ایک ہی قبر میں جمع فرماتے اور دریافت کرتے: ”ان میں سے کس کو قرآن زیادہ یاد ہے؟“ تو (جس کی طرف اشارہ ہوتا) آپ صلی اللہ علیہ وسلم اسے لحد میں مقدم رکھتے تھے، اور دو دو تین تین آدمیوں کو ایک ہی کپڑے میں کفن دیا جاتا تھا۔ [مسند أبي يعلى الموصلي/مسند أنس بن مالك/حدیث: 3568]

سیدنا انس رضی اللہ عنہ سے روایت ہے کہ ”نبی کریم صلی اللہ علیہ وسلم نماز کے دوران (کسی ضرورت کے تحت) اشارہ فرمایا کرتے تھے۔“ [مسند أبي يعلى الموصلي/مسند أنس بن مالك/حدیث: 3569]

سیدنا انس بن مالک رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا: ”میں نے اللہ تعالیٰ سے نسلِ انسانی کے ان ناسمجھ بچوں کو مانگا جو شعور و تکلیف کی عمر کو نہیں پہنچے تھے، تو اللہ تعالیٰ نے انہیں مجھے عطا فرما دیا۔“ [مسند أبي يعلى الموصلي/مسند أنس بن مالك/حدیث: 3570]

سیدنا انس رضی اللہ عنہ سے روایت ہے کہ نبی کریم صلی اللہ علیہ وسلم عمرہ القضاء کے موقع پر مکہ مکرمہ میں داخل ہوئے اور سیدنا ابن رواحہ رضی اللہ عنہ آپ صلی اللہ علیہ وسلم کے آگے آگے یہ اشعار پڑھ رہے تھے: ”اے کفار کی اولاد! آپ صلی اللہ علیہ وسلم کا راستہ چھوڑ دو، یقیناً رحمن نے اپنی نازل کردہ کتاب ﴿قرآن﴾ میں یہ بیان فرمایا ہے کہ بہترین موت اللہ کی راہ میں قتل ہونا (شہادت) ہے“۔ [مسند أبي يعلى الموصلي/مسند أنس بن مالك/حدیث: 3571]

سیدنا انس بن مالک رضی اللہ عنہ سے روایت ہے کہ ”رسول اللہ صلی اللہ علیہ وسلم کو چالیس سال کی عمر میں منصبِ نبوت پر فائز کیا گیا، پھر آپ صلی اللہ علیہ وسلم دس برس مکہ مکرمہ میں مقیم رہے اور دس سال مدینہ منورہ میں قیام فرمایا، اور جب آپ صلی اللہ علیہ وسلم کی وفات ہوئی تو آپ صلی اللہ علیہ وسلم کی عمرِ مبارک ساٹھ برس تھی اور آپ صلی اللہ علیہ وسلم کے سرِ مبارک اور داڑھی مبارک میں بیس بال بھی سفید نہیں تھے۔“ [مسند أبي يعلى الموصلي/مسند أنس بن مالك/حدیث: 3572]

سیدنا انس بن مالک رضی اللہ عنہ سے روایت ہے کہ رسول اللہ صلی اللہ علیہ وسلم نے ارشاد فرمایا: ”بے شک ہر دین کا ایک نمایاں اخلاق ہوتا ہے اور اس دینِ (اسلام) کا امتیازی اخلاق حیا ہے۔“ [مسند أبي يعلى الموصلي/مسند أنس بن مالك/حدیث: 3573]

سیدنا انس بن مالک رضی اللہ عنہ سے روایت ہے کہ میں نے رسول اللہ صلی اللہ علیہ وسلم کو یہ فرماتے ہوئے سنا: ”بے شک ہر امت کا ایک امین (انتہائی دیانت دار اور قابلِ اعتماد شخص) ہوتا ہے اور یہ ہماری امت کے امین ہیں“، اور آپ صلی اللہ علیہ وسلم نے (یہ فرماتے ہوئے) سیدنا ابو عبیدہ بن جراح رضی اللہ عنہ کا ہاتھ تھاما ہوا تھا۔ [مسند أبي يعلى الموصلي/مسند أنس بن مالك/حدیث: 3574]