سیدہ عائشہ رضی اللہ عنہا سے روایت ہے کہ ”نبی کریم صلی اللہ علیہ وسلم جب غسلِ جنابت فرماتے تو اپنے دائیں ہاتھ سے بائیں ہاتھ پر پانی ڈال کر اپنی شرمگاہ دھوتے تھے (اور بسا اوقات سیدہ رضی اللہ عنہا نے اس عضو کے لیے کنایہ استعمال فرمایا)، پھر آپ صلی اللہ علیہ وسلم نماز کے وضو کی طرح وضو فرماتے، پھر اپنا دستِ مبارک پانی میں ڈالتے اور اس سے اپنے بالوں کا خلال کرتے، جب آپ صلی اللہ علیہ وسلم کو یہ اطمینان ہو جاتا کہ پانی نے جلد کو چھو لیا ہے تو اپنے سرِ مبارک پر تین بار پانی بہاتے اور برتن میں جو کچھ پانی بچ رہتا، غسل سے فراغت کے بعد اسے اپنے پورے جسم پر انڈیل لیتے۔“ [مسند أبي يعلى الموصلي/مسند عائشة/حدیث: 4497]

سیدہ عائشہ رضی اللہ عنہا سے روایت ہے کہ رسول اللہ صلی اللہ علیہ وسلم نے (ان سے) ارشاد فرمایا: ”تم مجھے خواب میں دکھائی گئی ہو، میں نے (اس کا تذکرہ کرتے ہوئے) کہا کہ جب فرشتہ تمہیں ریشم کے ایک نفیس ٹکڑے میں لپیٹ کر لایا اور اس نے کہا کہ ’یہ آپ کی زوجہ ہیں‘، پھر جب میں نے تمہارے چہرے سے نقاب ہٹایا تو دیکھا کہ وہ تم ہی ہو، تو میں نے (اپنے دل میں) کہا کہ ’اگر یہ معاملہ اللہ کی طرف سے ہے تو وہ اسے ضرور پورا فرما دے گا‘۔“ [مسند أبي يعلى الموصلي/مسند عائشة/حدیث: 4498]

سیدہ عائشہ رضی اللہ عنہا سے روایت ہے کہ ان کے پاس سیدنا ابنِ عمر رضی اللہ عنہما کا وہ قول ذکر کیا گیا جس میں میت پر (گھر والوں کے) روئے جانے کی وجہ سے عذاب ہونے کا بیان تھا، تو آپ رضی اللہ عنہا نے فرمایا: «يَرْحَمُ اللَّهُ أَبَا عَبْدِ الرَّحْمَنِ» ”اللہ تعالیٰ ابوعبدالرحمن پر رحم فرمائے“، ”انہوں نے حدیث سنی تو سہی مگر اسے (صحیح طور پر) یاد نہ رکھ سکے، اصل میں رسول اللہ صلی اللہ علیہ وسلم کا گزر ایک یہودی کے جنازے کے پاس سے ہوا جس کے گھر والے اس پر رو رہے تھے، تو رسول اللہ صلی اللہ علیہ وسلم نے ارشاد فرمایا: «إِنَّهُمْ لَيَبْكُونَ، وَإِنَّهُ لَيُعَذَّبُ» ”یہ لوگ تو یقیناً اس پر رو رہے ہیں، اور اسے تو (قبر میں) عذاب دیا جا رہا ہے“۔“ [مسند أبي يعلى الموصلي/مسند عائشة/حدیث: 4499]

سیدہ عائشہ رضی اللہ عنہا سے روایت ہے کہ انہوں نے عرض کی: ”اے اللہ کے رسول صلی اللہ علیہ وسلم ! آپ کی تمام ازواجِ مطہرات کی کوئی نہ کوئی کنیت ہے سوائے میرے،“ تو آپ صلی اللہ علیہ وسلم نے ارشاد فرمایا: ”تم اپنے (بھانجے اور دینی) بیٹے سیدنا عبداللہ بن زبیر رضی اللہ عنہ کے نام پر اپنی کنیت رکھ لو،“ چنانچہ اس کے بعد آپ رضی اللہ عنہا کی کنیت ”ام عبداللہ“ معروف ہو گئی۔ [مسند أبي يعلى الموصلي/مسند عائشة/حدیث: 4500]

سیدہ عائشہ رضی اللہ عنہا سے روایت ہے کہ سیدنا ابوقُعیس رضی اللہ عنہ کے بھائی نے ان کے پاس حاضر ہونے کی اجازت چاہی تو انہوں نے انہیں اجازت دینے سے انکار کر دیا، پھر انہوں نے اس بات کا ذکر نبی کریم صلی اللہ علیہ وسلم سے کیا تو آپ صلی اللہ علیہ وسلم نے ارشاد فرمایا: ”وہ تمہارے چچا ہیں، لہٰذا انہیں اندر آنے دو“، انہوں نے عرض کی کہ اے اللہ کے رسول! مجھے تو محض اس عورت نے دودھ پلایا ہے، اس مرد نے تو دودھ نہیں پلایا، آپ صلی اللہ علیہ وسلم نے پھر ارشاد فرمایا: ”وہ تمہارے چچا ہیں، انہیں داخل ہونے کی اجازت دے دو۔“ [مسند أبي يعلى الموصلي/مسند عائشة/حدیث: 4501]

سیدہ عائشہ رضی اللہ عنہا سے روایت ہے کہ سیدنا حمزہ بن عمرو اسلمی رضی اللہ عنہ نے نبی کریم صلی اللہ علیہ وسلم سے دریافت کیا کہ اے اللہ کے رسول! میں ایسا شخص ہوں جو مسلسل (کثرت سے) روزے رکھتا ہوں، تو کیا میں سفر کی حالت میں بھی روزہ رکھ لیا کروں؟ آپ صلی اللہ علیہ وسلم نے ارشاد فرمایا: ”اگر تم چاہو تو روزہ رکھ لو اور اگر چاہو تو نہ رکھو۔“ [مسند أبي يعلى الموصلي/مسند عائشة/حدیث: 4502]

سیدہ عائشہ رضی اللہ عنہا سے روایت ہے کہ رسول اللہ صلی اللہ علیہ وسلم نے ارشاد فرمایا: ”پانچ موذی جانور ایسے ہیں جنہیں حدودِ حرم میں بھی مارا جا سکتا ہے: بچھو، چوہیا، چیل، کوا اور کاٹ کھانے والا کتا۔“ [مسند أبي يعلى الموصلي/مسند عائشة/حدیث: 4503]

سیدہ عائشہ رضی اللہ عنہا سے روایت ہے، وہ بیان کرتی ہیں کہ ہم ذوالحجہ کا چاند طلوع ہونے کے قریب (مدینہ سے) روانہ ہوئے تو رسول اللہ صلی اللہ علیہ وسلم نے ارشاد فرمایا: ”جو شخص حج کا تلبیہ پکارنا چاہے وہ حج کا احرام باندھ لے اور جو عمرے کا تلبیہ پکارنا چاہے وہ عمرے کا احرام باندھ لے۔“ سیدہ عائشہ رضی اللہ عنہا فرماتی ہیں کہ میں ان لوگوں میں شامل تھی جنہوں نے عمرے کا احرام باندھا تھا، پھر انہوں نے ذکر کیا کہ جب وہ ’سرف‘ نامی مقام پر پہنچیں تو انہیں حیض آ گیا، وہ کہتی ہیں کہ رسول اللہ صلی اللہ علیہ وسلم میرے پاس تشریف لائے جبکہ میں رو رہی تھی، میں نے عرض کیا: ”میری یہ تمنا تھی کہ کاش میں اس سال حج کے لیے نہ نکلتی۔“ آپ صلی اللہ علیہ وسلم نے فرمایا: ”تم اپنے سر کے بال کھول لو، کنگھی کر لو، عمرہ (کے افعال) ترک کر دو اور وہی سب کچھ کرو جو مسلمان اپنے حج کے افعال میں کرتے ہیں۔“ چنانچہ انہوں نے اللہ اور اس کے رسول صلی اللہ علیہ وسلم کی اطاعت کی، پھر جب واپسی (منیٰ سے کوچ) کی رات آئی تو آپ صلی اللہ علیہ وسلم نے سیدنا عبد الرحمن بن ابی بکر رضی اللہ عنہ کو حکم دیا کہ انہیں تنعیم لے جائیں، پس وہ انہیں تنعیم لے گئے اور انہوں نے وہاں سے عمرے کا احرام باندھا۔ [مسند أبي يعلى الموصلي/مسند عائشة/حدیث: 4504]

سیدہ عائشہ رضی اللہ عنہا سے روایت ہے کہ انہوں نے فرمایا: ”گویا میں (اب بھی) اپنے آپ کو دیکھ رہی ہوں کہ میں رسول اللہ صلی اللہ علیہ وسلم کے ہدی (قربانی کے جانوروں) کے لیے قلادے (گلے کے پٹے) بٹ رہی تھی، پھر (ان جانوروں کو روانہ کرنے کے بعد) آپ صلی اللہ علیہ وسلم کسی ایسی چیز سے اجتناب نہیں فرماتے تھے جس سے احرام کی حالت میں موجود شخص اجتناب کرتا ہے۔“ [مسند أبي يعلى الموصلي/مسند عائشة/حدیث: 4505]

سیدہ عائشہ رضی اللہ عنہا سے روایت ہے کہ نبی اکرم صلی اللہ علیہ وسلم جب اعتکاف کرنے کا ارادہ فرماتے تو فجر کی نماز ادا کرنے کے بعد اپنی اعتکاف گاہ میں داخل ہو جاتے، پھر جب اکیسویں کی صبح ہوئی تو آپ صلی اللہ علیہ وسلم فجر کی نماز سے فارغ ہو کر مسجد میں تشریف لائے تو وہاں کئی خیمے دیکھے، جن میں ایک خیمہ سیدہ عائشہ رضی اللہ عنہا کا تھا جس کے لیے انہوں نے آپ صلی اللہ علیہ وسلم سے اجازت لی تھی اور دوسرا خیمہ سیدہ زینب رضی اللہ عنہا کا تھا، تو رسول اللہ صلی اللہ علیہ وسلم نے دریافت فرمایا: ”کیا تم ان خیموں کے ذریعے نیکی و بھلائی کا ارادہ رکھتی ہو؟“ پھر آپ صلی اللہ علیہ وسلم نے اپنا اعتکاف مؤخر کر دیا اور اسے ماہِ شوال میں ادا فرمایا۔ [مسند أبي يعلى الموصلي/مسند عائشة/حدیث: 4506]