سیدہ عائشہ رضی اللہ عنہا سے روایت ہے کہ رسول اللہ صلی اللہ علیہ وسلم ”رات کے وقت نو رکعات نماز ادا فرمایا کرتے تھے۔“ [مسند أبي يعلى الموصلي/مسند عائشة/حدیث: 4737]

سیدہ عائشہ رضی اللہ عنہا سے روایت ہے کہ رسول اللہ صلی اللہ علیہ وسلم اس نماز کو جس کے لیے مسواک کی گئی ہو، اس نماز کے مقابلے میں ستر گنا فضیلت دیتے تھے جس کے لیے مسواک نہ کی گئی ہو، نیز رسول اللہ صلی اللہ علیہ وسلم اس مخفی ذکر کو جسے اعمال لکھنے والے فرشتے بھی نہ سن سکیں، ستر گنا فضیلت عطا فرماتے تھے۔ چنانچہ آپ صلی اللہ علیہ وسلم نے ارشاد فرمایا: ”جب قیامت کا دن ہوگا اور اللہ تبارک و تعالیٰ تمام خلائق کو ان کے محاسبے کے لیے جمع فرمائے گا، اور کاتبینِ اعمال وہ تمام اعمال لے کر حاضر ہوں گے جو انہوں نے محفوظ کیے اور لکھے ہوں گے، تو اللہ تعالیٰ ان فرشتوں سے دریافت فرمائے گا: دیکھو! کیا اس بندے کا کوئی عمل باقی رہ گیا ہے؟ وہ عرض کریں گے: اے ہمارے پروردگار! جو کچھ ہمارے علم میں آیا اور جسے ہم نے یاد رکھا، ہم نے اسے مکمل طور پر شمار کر کے لکھ لیا ہے اور کوئی چیز تشنہ نہیں چھوڑی، تب اللہ سبحانہ و تعالیٰ اس بندے سے فرمائے گا: ”یقیناً میرے پاس تیری ایک ایسی پوشیدہ نیکی محفوظ ہے جسے تو خود بھی نہیں جانتا اور میں ہی تجھے اس کا صلہ عطا کروں گا، اور وہ ذکرِ خفی (خاموشی سے کیا جانے والا ذکر) ہے“۔“ [مسند أبي يعلى الموصلي/مسند عائشة/حدیث: 4738]

سیدہ عائشہ رضی اللہ عنہا سے روایت ہے کہ رسول اللہ صلی اللہ علیہ وسلم میرے گھر میں نماز ادا فرما رہے تھے کہ سیدنا علی بن ابی طالب رضی اللہ عنہ آئے اور آپ صلی اللہ علیہ وسلم کے پہلو میں آپ کی دائیں جانب کھڑے ہو گئے، ”اتنے میں ایک بچھو نبی اکرم صلی اللہ علیہ وسلم کی جانب بڑھا، لیکن جب وہ آپ کے قریب پہنچا تو اسے ہٹا دیا گیا، پھر وہ سیدنا علی رضی اللہ عنہ کی طرف لپکا تو انہوں نے نماز ہی کی حالت میں اپنا جوتا پکڑا اور اسے مار ڈالا، جب وہ اپنی نماز سے فارغ ہوئے تو انہوں نے کہا: «قَاتَلَهَا اللهُ» ”اللہ اسے غارت کرے“، یہ نبی اکرم صلی اللہ علیہ وسلم کی طرف بڑھا تو اسے پھیر دیا گیا، پھر میری طرف متوجہ ہوا اور مجھے نقصان پہنچانے کا ارادہ کیا، چنانچہ رسول اللہ صلی اللہ علیہ وسلم نے نماز کے دوران اسے قتل کرنے میں کوئی حرج یا مضائقہ محسوس نہیں فرمایا۔“ [مسند أبي يعلى الموصلي/مسند عائشة/حدیث: 4739]

سیدہ عائشہ رضی اللہ عنہا سے روایت ہے کہ انہوں نے فرمایا: ”اللہ کی قسم! میں نے (اس معاملے میں) رسول اللہ صلی اللہ علیہ وسلم سے بار بار رجوع کیا، اور مجھے اس کثرتِ تکرار پر صرف اسی بات نے آمادہ کیا تھا کہ میرے دل میں یہ بات بیٹھ ہی نہیں رہی تھی کہ لوگ کبھی بھی کسی ایسے شخص کو پسند کریں گے جو آپ صلی اللہ علیہ وسلم کے مقام (جائے نماز) پر کھڑا ہو۔“ [مسند أبي يعلى الموصلي/مسند عائشة/حدیث: 4740]

سیدہ عائشہ رضی اللہ عنہا سے روایت ہے کہ انہوں نے بیان فرمایا کہ ”رسول اللہ صلی اللہ علیہ وسلم مٹھاس (حلوے) اور شہد کو بے حد پسند فرماتے تھے۔“ [مسند أبي يعلى الموصلي/مسند عائشة/حدیث: 4741]

سیدہ عائشہ رضی اللہ عنہا سے روایت ہے کہ ”رسول اللہ صلی اللہ علیہ وسلم کی خدمتِ اقدس میں ایک ہدیہ پیش کیا گیا جبکہ آپ صلی اللہ علیہ وسلم روزے سے تھے، تو ہم نے عرض کی: اے اللہ کے رسول! اگر آپ روزے سے نہ ہوتے تو ہم اس ہدیے میں سے آپ کی خدمت میں کچھ پیش کرتے، تو آپ صلی اللہ علیہ وسلم نے ارشاد فرمایا: ”وہ لے آؤ“۔“ [مسند أبي يعلى الموصلي/مسند عائشة/حدیث: 4742]

سیدہ عائشہ رضی اللہ عنہا سے روایت ہے کہ ”رسول اللہ صلی اللہ علیہ وسلم (دوپہر کا) کھانا طلب فرماتے تو ہم عرض کرتیں کہ (گھر میں) کچھ بھی موجود نہیں ہے، تو آپ صلی اللہ علیہ وسلم ارشاد فرماتے: «إِنِّي صَائِمٌ» ”بے شک میں روزے سے ہوں۔““ [مسند أبي يعلى الموصلي/مسند عائشة/حدیث: 4743]

سیدہ عائشہ رضی اللہ عنہا سے روایت ہے کہ ”رسول اللہ صلی اللہ علیہ وسلم نے (یومِ نحر کے) آخری پہر میں جب کہ آپ صلی اللہ علیہ وسلم ظہر کی نماز ادا کر چکے تھے، طوافِ افاضہ فرمایا، پھر آپ صلی اللہ علیہ وسلم واپس تشریف لے گئے اور ایامِ تشریق کی راتیں منیٰ ہی میں قیام فرمایا، آپ صلی اللہ علیہ وسلم زوالِ آفتاب کے بعد جمرات کی رمی فرماتے تھے، ہر جمرہ کو سات کنکریاں مارتے، آپ صلی اللہ علیہ وسلم پہلے اور دوسرے جمرہ کے پاس طویل قیام فرماتے اور نہایت عجز و نیاز کے ساتھ دعا مانگتے، پھر تیسرے جمرہ کو کنکریاں مارتے اور وہاں (دعا کے لیے) نہیں ٹھہرتے تھے۔“ [مسند أبي يعلى الموصلي/مسند عائشة/حدیث: 4744]

مجاہد رحمہ اللہ سیدہ عائشہ رضی اللہ عنہا سے روایت کرتے ہیں کہ میں نے رسول اللہ صلی اللہ علیہ وسلم کو یہ ارشاد فرماتے ہوئے سنا: «وَيْلٌ لِلْأُمَرَاءِ وَيْلٌ لِلْعُرَفَاءِ وَيْلٌ لِلْأُمَنَاءِ لَيَأْتِيَنَّ عَلَى أَحَدِهِمْ يَوْمٌ وَدَّ أَنَّهُ مُعَلَّقٌ بِالنَّجْمِ وَأَنَّهُ لَمْ يَلِ عَمَلًا» ”ہلاکت و بربادی ہے حکمرانوں کے لیے، ہلاکت ہے عوامی نگرانوں کے لیے اور ہلاکت ہے امانت دار عہدے داروں کے لیے؛ یقیناً ان میں سے ہر ایک پر ایک ایسا ہولناک دن ضرور آئے گا جب وہ یہ حسرت کرے گا کہ کاش! اسے آسمان کے کسی ستارے سے لٹکا دیا گیا ہوتا اور اس نے زندگی میں کبھی کوئی انتظامی ذمہ داری یا سرکاری عہدہ قبول نہ کیا ہوتا۔“ [مسند أبي يعلى الموصلي/مسند عائشة/حدیث: 4745]

سیدہ عائشہ رضی اللہ عنہا سے روایت ہے کہ ”رسول اللہ صلی اللہ علیہ وسلم مسجد میں سیدنا حسان رضی اللہ عنہ کے لیے منبر رکھواتے تھے جس پر وہ کھڑے ہو کر رسول اللہ صلی اللہ علیہ وسلم کی جانب سے (مشرکین کے مقابلے میں) مفاخرت کرتے یا آپ صلی اللہ علیہ وسلم کا دفاع کرتے تھے، اور رسول اللہ صلی اللہ علیہ وسلم فرماتے تھے: «إِنَّ اللَّهَ يُؤَيِّدُ حَسَّانَ بِرُوحِ الْقُدُسِ مَا نَافَحَ - أَوْ فَاخَرَ - عَنْ رَسُولِ اللَّهِ» ”بے شک اللہ تعالیٰ حسان کی روح القدس (سیدنا جبرائیل علیہ السلام) کے ذریعے اس وقت تک تائید فرماتا ہے جب تک وہ رسول اللہ صلی اللہ علیہ وسلم کی جانب سے مدافعت یا مفاخرت کرتے رہیں۔““ [مسند أبي يعلى الموصلي/مسند عائشة/حدیث: 4746]