سیدہ عائشہ رضی اللہ عنہا سے روایت ہے کہ انہوں نے بیان فرمایا کہ ”رسول اللہ صلی اللہ علیہ وسلم (رمضان میں) صبح اس حال میں کرتے کہ آپ حالتِ جنابت میں ہوتے تھے، پھر آپ اپنا روزہ (باقاعدہ) مکمل فرماتے تھے۔“ [مسند أبي يعلى الموصلي/مسند عائشة/حدیث: 4707]

سیدہ عائشہ رضی اللہ عنہا سے روایت ہے کہ انہوں نے بیان فرمایا: ”رسول اللہ صلی اللہ علیہ وسلم نمازِ فجر کے لیے (غسل فرما کر) اس حال میں تشریف لے جاتے کہ آپ صلی اللہ علیہ وسلم کے سرِ مبارک سے پانی کے قطرے ٹپک رہے ہوتے تھے، یہ حالت جماع کی وجہ سے ہوتی تھی نہ کہ احتلام کے سبب، پھر آپ صلی اللہ علیہ وسلم (اسی حالت میں صبح کر کے) روزہ رکھتے تھے۔“ [مسند أبي يعلى الموصلي/مسند عائشة/حدیث: 4708]

سیدہ عائشہ رضی اللہ عنہا سے روایت ہے کہ ”رسول اللہ صلی اللہ علیہ وسلم رات بسر فرماتے تو سیدنا بلال رضی اللہ عنہ آپ صلی اللہ علیہ وسلم کو اذان کے ذریعے (نمازِ فجر کے لیے) بیدار کرتے، جس پر آپ صلی اللہ علیہ وسلم بیدار ہو کر غسل فرماتے، میں پانی کو آپ صلی اللہ علیہ وسلم کے جسدِ اطہر اور بالوں سے ڈھلکتا ہوا دیکھتی تھی، پھر آپ صلی اللہ علیہ وسلم (مسجد کی طرف) تشریف لے جاتے اور نماز ادا فرماتے تو میں آپ صلی اللہ علیہ وسلم کے گریہ و بکا کی آواز سنتی، پھر آپ صلی اللہ علیہ وسلم دن بھر روزے سے رہتے“؛ مطرف رحمہ اللہ کہتے ہیں کہ میں نے امام شعبی رحمہ اللہ سے دریافت کیا کہ کیا یہ عمل صرف ماہِ رمضان میں ہوتا تھا؟ تو انہوں نے جواب دیا کہ ”رمضان ہو یا غیرِ رمضان، دونوں کا حکم برابر ہے (یعنی آپ صلی اللہ علیہ وسلم کا یہی معمول مبارک تھا)۔“ [مسند أبي يعلى الموصلي/مسند عائشة/حدیث: 4709]

قتادہ رحمہ اللہ بیان کرتے ہیں کہ ہم نے ابراہیم بن یزید رحمہ اللہ کی جانب خط لکھ کر ان سے رضاعت کے متعلق دریافت کیا، تو انہوں نے جواباً لکھا کہ شریح رحمہ اللہ نے بیان کیا کہ سیدنا علی اور سیدنا ابن مسعود رضی اللہ عنہما فرمایا کرتے تھے کہ ”رضاعت کی مقدار تھوڑی ہو یا زیادہ، وہ (نکاح کی) حرمت ثابت کر دیتی ہے“، نیز ان کی تحریر میں یہ بھی درج تھا کہ ابوالشعثاء المحاربی رحمہ اللہ نے بیان کیا کہ سیدہ عائشہ رضی اللہ عنہا نے روایت کیا کہ اللہ کے نبی صلی اللہ علیہ وسلم ارشاد فرمایا کرتے تھے: ”ایک یا دو بار دودھ چوس لینے سے حرمت ثابت نہیں ہوتی۔“ [مسند أبي يعلى الموصلي/مسند عائشة/حدیث: 4710]

ابوبکر بن محمد رحمہ اللہ سے روایت ہے کہ جب سیدنا رافع بن خدیج رضی اللہ عنہ کی وفات ہوئی تو سیدنا عبداللہ بن عمر رضی اللہ عنہما نے فرمایا: ”ان پر (نوحہ و ماتم) نہ کرو؛ کیونکہ زندہ کا میت پر رونا میت کے لیے عذاب کا باعث ہوتا ہے۔“ اس پر ام المؤمنین سیدہ عائشہ رضی اللہ عنہا نے فرمایا: ”رسول اللہ صلی اللہ علیہ وسلم نے تو یہ بات محض ایک یہودی عورت کے متعلق فرمائی تھی جس کے لواحقین اس پر رو رہے تھے کہ: «إِنَّهُمْ لَيَبْكُونَ عَلَيْهَا، وَإِنَّهَا لَتُعَذَّبُ فِي قَبْرِهَا» ”یہ لوگ تو اس پر رو رہے ہیں جبکہ اسے اس کی قبر میں عذاب دیا جا رہا ہے۔““ [مسند أبي يعلى الموصلي/مسند عائشة/حدیث: 4711]

سیدہ عائشہ رضی اللہ عنہا سے روایت ہے — اور انہوں نے (حدیث بیان کرتے ہوئے) اپنے دونوں ہاتھ پھیلا کر دکھائے — وہ فرماتی ہیں کہ ”میں نے رسول اللہ صلی اللہ علیہ وسلم کو اپنے ان دونوں ہاتھوں سے آپ کے احرام باندھتے وقت خوشبو لگائی، اور آپ صلی اللہ علیہ وسلم کے احرام سے حلال ہونے پر بیت اللہ کا طواف کرنے سے پہلے بھی آپ صلی اللہ علیہ وسلم کو خوشبو لگائی۔“ [مسند أبي يعلى الموصلي/مسند عائشة/حدیث: 4712]

سیدہ عائشہ رضی اللہ عنہا سے روایت ہے کہ رسول اللہ صلی اللہ علیہ وسلم جب (آسمان پر) کوئی ابرِ سیاہ دیکھتے تو آپ صلی اللہ علیہ وسلم پر گھبراہٹ طاری ہو جاتی اور آپ صلی اللہ علیہ وسلم کے رخِ انور کا رنگ بدل جاتا، آپ صلی اللہ علیہ وسلم (اضطراب کی کیفیت میں) کبھی آگے بڑھتے اور کبھی پیچھے ہٹتے، اور کبھی گھر کے اندر تشریف لے جاتے تو کبھی باہر تشریف لاتے، پھر جب بارش ہو جاتی تو آپ صلی اللہ علیہ وسلم کی وہ بے چینی ختم ہو جاتی۔ سیدہ عائشہ رضی اللہ عنہا بیان کرتی ہیں کہ میں نے آپ صلی اللہ علیہ وسلم سے اس (کیفیت) کے بارے میں دریافت کیا تو آپ صلی اللہ علیہ وسلم نے ارشاد فرمایا: ”تجھے کیا خبر؟ ہو سکتا ہے کہ یہ ویسا ہی معاملہ ہو جیسا کہ (قومِ عاد کے بارے میں) مروی ہے: ﴿فَلَمَّا رَأَوْهُ عَارِضًا مُسْتَقْبِلَ أَوْدِيَتِهِمْ قَالُوا هَذَا عَارِضٌ مُمْطِرُنَا﴾ ”پھر جب انہوں نے اسے اپنے میدانوں کی طرف بڑھتا ہوا ایک بادل دیکھا تو کہنے لگے کہ یہ بادل ہم پر برسنے والا ہے“۔“ [مسند أبي يعلى الموصلي/مسند عائشة/حدیث: 4713]

سیدہ عائشہ رضی اللہ عنہا سے روایت ہے کہ ”رسول اللہ صلی اللہ علیہ وسلم روزے کی حالت میں (اپنی زوجہ کا) بوسہ لے لیا کرتے تھے“، سفیان بن عیینہ رحمہ اللہ بیان کرتے ہیں کہ میں نے عبدالرحمن بن قاسم رحمہ اللہ سے دریافت کیا کہ کیا آپ نے اپنے والد (قاسم بن محمد رحمہ اللہ) کو سیدہ عائشہ رضی اللہ عنہا کے حوالے سے یہ خبر دیتے ہوئے سنا ہے کہ رسول اللہ صلی اللہ علیہ وسلم روزے کی حالت میں بوسہ لیا کرتے تھے؟ تو انہوں نے جواب دیا: ”جی ہاں“۔ [مسند أبي يعلى الموصلي/مسند عائشة/حدیث: 4714]

سیدہ عائشہ رضی اللہ عنہا سے روایت ہے کہ انہوں نے بیان فرمایا: ”رسول اللہ صلی اللہ علیہ وسلم روزے کی حالت میں ہونے کے باوجود (اپنی کسی زوجہ کا) بوسہ لے لیا کرتے تھے۔“ [مسند أبي يعلى الموصلي/مسند عائشة/حدیث: 4715]

سیدہ عائشہ رضی اللہ عنہا سے روایت ہے کہ ”رسول اللہ صلی اللہ علیہ وسلم روزوں کے مہینے (یعنی رمضان المبارک میں حالتِ روزہ کے دوران اپنی کسی زوجہ مطہرہ کا) بوسہ لے لیا کرتے تھے۔“ [مسند أبي يعلى الموصلي/مسند عائشة/حدیث: 4716]