سیدہ ام سلمہ رضی اللہ عنہا سے روایت ہے کہ رسول اللہ صلی اللہ علیہ وسلم ہمارے ہاں تشریف لائے جبکہ ہمارے پاس ایک بچہ تھا جو تکلیف کی شدت محسوس کر رہا تھا، تو آپ صلی اللہ علیہ وسلم نے دریافت فرمایا: ”اسے کیا ہوا ہے؟“ لوگوں نے عرض کی: ہمیں اس کے متعلق نظرِ بد لگ جانے کا اندیشہ ہے، جس پر آپ صلی اللہ علیہ وسلم نے ارشاد فرمایا: ”تم اسے نظرِ بد کے اثر سے شفایابی کے لیے دم کیوں نہیں کرواتے؟“ [مسند أبي يعلى الموصلي/مسند أم سلمة زوج النبي صلى الله عليه وسلم/حدیث: 6879]

سیدہ ام سلمہ رضی اللہ عنہا سے روایت ہے کہ میں نے رسول اللہ صلی اللہ علیہ وسلم کو یہ فرماتے ہوئے سنا: ”میں تو محض ایک انسان ہوں اور تم اپنے مقدمات میرے پاس لاتے ہو، اور یہ ممکن ہے کہ تم میں سے کوئی اپنی دلیل پیش کرنے میں دوسرے سے زیادہ فصیح و چرب زبان ہو، تو میں جو کچھ اس سے سنتا ہوں اسی کے مطابق فیصلہ صادر کر دیتا ہوں؛ پس میں (اپنی سماعت کی بنیاد پر) اگر کسی شخص کے حق میں اس کے بھائی کے حق کا کوئی فیصلہ کر دوں، تو وہ اسے ہرگز وصول نہ کرے، کیونکہ میں تو اسے جہنم کی آگ کا ایک ٹکڑا کاٹ کر دے رہا ہوں۔“ [مسند أبي يعلى الموصلي/مسند أم سلمة زوج النبي صلى الله عليه وسلم/حدیث: 6880]

سیدہ ام سلمہ رضی اللہ عنہا سے روایت ہے کہ رسول اللہ صلی اللہ علیہ وسلم نے ارشاد فرمایا: ”تم لوگ اپنے مقدمات میرے پاس لاتے ہو اور میں تو محض ایک انسان ہی ہوں، اور یہ ممکن ہے کہ تم میں سے کوئی اپنی دلیل پیش کرنے میں دوسرے کی نسبت زیادہ فصیح و چرب زبان ہو، لہٰذا میں (اس کی ظاہری گفتگو کی بنیاد پر) جس کے حق میں اس کے بھائی کے حق کا فیصلہ کر دوں تو وہ اسے ہرگز نہ لے، کیونکہ درحقیقت میں اسے آگ کا ایک ٹکڑا کاٹ کر دے رہا ہوں۔“ [مسند أبي يعلى الموصلي/مسند أم سلمة زوج النبي صلى الله عليه وسلم/حدیث: 6881]

سیدہ ام سلمہ رضی اللہ عنہا سے روایت ہے کہ رسول اللہ صلی اللہ علیہ وسلم نے ارشاد فرمایا: ”بے شک جو شخص چاندی کے برتن میں (کوئی چیز) پیتا ہے، وہ تو اپنے پیٹ میں جہنم کی آگ ہی گڑگڑاتے ہوئے اتارتا ہے۔“ [مسند أبي يعلى الموصلي/مسند أم سلمة زوج النبي صلى الله عليه وسلم/حدیث: 6882]

سیدنا سعد اور سیدہ ام سلمہ رضی اللہ عنہما سے روایت ہے کہ نبی اکرم صلی اللہ علیہ وسلم نے سیدنا علی رضی اللہ عنہ سے ارشاد فرمایا: ”کیا تم اس بات پر راضی نہیں ہو کہ تم میرے لیے ویسے ہی ہو جیسے ہارون (علیہ السلام) موسیٰ (علیہ السلام) کے لیے تھے؟ سوائے اس کے کہ میرے بعد کوئی نبی نہیں ہے۔“ [مسند أبي يعلى الموصلي/مسند أم سلمة زوج النبي صلى الله عليه وسلم/حدیث: 6883]

سیدہ زینب بنت ام سلمہ رضی اللہ عنہا اپنی والدہ سیدہ ام سلمہ رضی اللہ عنہا سے روایت کرتی ہیں کہ نبی کریم صلی اللہ علیہ وسلم ”کھجور کے پتوں سے تیار کردہ مختصر چٹائی (خمرہ) پر نماز ادا فرمایا کرتے تھے“۔ [مسند أبي يعلى الموصلي/مسند أم سلمة زوج النبي صلى الله عليه وسلم/حدیث: 6884]

سیدہ ام سلمہ رضی اللہ عنہا سے روایت ہے کہ رسول اللہ صلی اللہ علیہ وسلم نے حجۃ الوداع کے موقع پر ہم سے ارشاد فرمایا: ”(تمہارے لیے) بس یہی ایک (فرض) حج ہے، اس کے بعد (تمہارا کام) گھروں میں چٹائیوں کی پشت پر (ٹک کر) بیٹھے رہنا ہے۔“ ابن ابی سمینہ رحمہ اللہ نے (سند کے راوی کے متعلق) علمی وضاحت کرتے ہوئے فرمایا کہ ”وہ دراصل سعید ہیں لیکن (شیخ نے) اسی طرح (سعد ہی) بیان کیا ہے۔“ [مسند أبي يعلى الموصلي/مسند أم سلمة زوج النبي صلى الله عليه وسلم/حدیث: 6885]

سیدہ ام سلمہ رضی اللہ عنہا سے روایت ہے کہ سیدہ فاطمہ رضی اللہ عنہا نبی کریم صلی اللہ علیہ وسلم کی خدمتِ اقدس میں حاضر ہوئیں تو آپ صلی اللہ علیہ وسلم نے ان سے سرگوشی فرمائی جس پر وہ رونے لگیں، پھر آپ صلی اللہ علیہ وسلم نے دوبارہ ان سے کوئی مخفی بات کہی تو وہ ہنس دیں، میں نے ان سے اس بابت دریافت کیا تو انہوں نے بتایا کہ: ”رسول اللہ صلی اللہ علیہ وسلم نے مجھے خبر دی کہ آپ صلی اللہ علیہ وسلم کا وصال اسی سال ہونے والا ہے، تو میں (یہ سن کر) رو پڑی، پھر آپ صلی اللہ علیہ وسلم نے مجھ سے ارشاد فرمایا: ”کیا تم اس بات پر خوش نہیں ہو کہ تم جنت کی عورتوں کی سردار ہو گی سوائے فلاں خاتون کے؟“ تو میں (یہ خوشخبری سن کر) ہنس پڑی۔“ [مسند أبي يعلى الموصلي/مسند أم سلمة زوج النبي صلى الله عليه وسلم/حدیث: 6886]

سیدہ عائشہ رضی اللہ عنہا سے اسی کے مانند روایت مروی ہے۔ [مسند أبي يعلى الموصلي/مسند أم سلمة زوج النبي صلى الله عليه وسلم/حدیث: 6887]

سیدنا ابو سعید رضی اللہ عنہ، سیدہ ام سلمہ رضی اللہ عنہا سے روایت کرتے ہیں کہ نبی کریم صلی اللہ علیہ وسلم نے سیدنا علی، سیدہ فاطمہ، سیدنا حسن اور سیدنا حسین رضی اللہ عنہم پر ایک چادر تانی (اور انہیں ڈھانپ لیا)، پھر دعا فرمائی: «هَؤُلَاءِ أَهْلُ بَيْتِي، إِلَيْكَ لَا إِلَى النَّارِ» ”یہ میرے اہل بیت ہیں، (اے اللہ! ان کا مرجع و مآویٰ) تیری ہی جناب میں ہو، نہ کہ آگ کی طرف۔“ سیدہ ام سلمہ رضی اللہ عنہا بیان کرتی ہیں کہ میں نے عرض کیا: ”اے اللہ کے رسول صلی اللہ علیہ وسلم ! کیا میں بھی ان میں شامل ہوں؟“ تو آپ صلی اللہ علیہ وسلم نے ارشاد فرمایا: ”نہیں، البتہ تم خیر و بھلائی پر ہو۔“ [مسند أبي يعلى الموصلي/مسند أم سلمة زوج النبي صلى الله عليه وسلم/حدیث: 6888]