ہنیدہ بن خالد الخزاعی رحمہ اللہ کی والدہ (سیدہ ام خالد رضی اللہ عنہا) سے روایت ہے، وہ بیان کرتی ہیں کہ میں ام المومنین سیدہ ام سلمہ رضی اللہ عنہا کی خدمت میں حاضر ہوئی اور ان سے روزوں کے متعلق دریافت کیا، تو انہوں نے فرمایا: ”رسول اللہ صلی اللہ علیہ وسلم ہر ماہ کے آغاز میں تین روزے رکھنے کا حکم فرمایا کرتے تھے: پیر اور جمعرات، اور ایک (تیسرا) دن جو مجھے یاد نہیں رہا۔“ [مسند أبي يعلى الموصلي/مسند أم سلمة زوج النبي صلى الله عليه وسلم/حدیث: 6889]

سیدہ ام سلمہ رضی اللہ عنہا سے روایت ہے، وہ بیان کرتی ہیں کہ میں نے عرض کیا: ”اے اللہ کے رسول صلی اللہ علیہ وسلم ! خواتین (کے دامن کی لمبائی) کا کیا حکم ہے؟“ آپ صلی اللہ علیہ وسلم نے ارشاد فرمایا: ”وہ (ٹخنوں سے نیچے) ایک بالشت لٹکا لیا کریں۔“ میں نے عرض کیا: ”اے اللہ کے رسول صلی اللہ علیہ وسلم ! اس صورت میں تو ان کے پاؤں کھل جائیں گے۔“ آپ صلی اللہ علیہ وسلم نے فرمایا: ”پھر ایک ہاتھ (تک دامن لمبا کر لیں) اور اس سے زیادہ نہ بڑھائیں۔“ [مسند أبي يعلى الموصلي/مسند أم سلمة زوج النبي صلى الله عليه وسلم/حدیث: 6890]

سیدہ ام سلمہ رضی اللہ عنہا سے روایت ہے کہ رسول اللہ صلی اللہ علیہ وسلم نے جب (لباس کا) دامن لٹکانے کے متعلق جو ارشاد فرمانا تھا وہ فرمایا، تو میں نے عرض کی: ”اے اللہ کے رسول صلی اللہ علیہ وسلم ! پھر ہم (خواتین) کے لیے کیا حکم ہے؟“ آپ صلی اللہ علیہ وسلم نے ارشاد فرمایا: ”تم اسے ایک بالشت لٹکا لیا کرو۔“ انہوں نے عرض کی: ”اس صورت میں تو پاؤں کھل جائیں گے۔“ آپ صلی اللہ علیہ وسلم نے فرمایا: ”پھر اسے ایک ہاتھ کے برابر لٹکا لیا کرو۔“ [مسند أبي يعلى الموصلي/مسند أم سلمة زوج النبي صلى الله عليه وسلم/حدیث: 6891]

الحسن رحمہ اللہ سے روایت ہے کہ سیدہ ام سلمہ رضی اللہ عنہا نے انہیں بیان فرمایا کہ ”رسول اللہ صلی اللہ علیہ وسلم نے سیدہ فاطمہ رضی اللہ عنہا کے لیے ان کے کمر بند (پٹکے) سے ایک بالشت کی پیمائش فرمائی۔“ [مسند أبي يعلى الموصلي/مسند أم سلمة زوج النبي صلى الله عليه وسلم/حدیث: 6892]

سیدہ ام سلمہ رضی اللہ عنہا سے روایت ہے کہ رسول اللہ صلی اللہ علیہ وسلم یہ دعا فرمایا کرتے تھے: ” «رَبِّ اغْفِرْ لِي وَارْحَمْنِي وَاهْدِنِي السَّبِيلَ الْأَقْوَمَ» ”اے میرے رب! میری مغفرت فرما، مجھ پر رحم فرما اور مجھے سب سے زیادہ سیدھے اور درست راستے کی ہدایت عطا فرما۔“” [مسند أبي يعلى الموصلي/مسند أم سلمة زوج النبي صلى الله عليه وسلم/حدیث: 6893]

سیدہ ام سلمہ رضی اللہ عنہا سے روایت ہے کہ رسول اللہ صلی اللہ علیہ وسلم کے زمانۂ اقدس میں ایک خاتون کو بکثرت خون آنے (استحاضہ) کا عارضہ لاحق ہوا، تو سیدہ ام سلمہ رضی اللہ عنہا نے ان کے لیے رسول اللہ صلی اللہ علیہ وسلم سے شرعی حکم دریافت کیا، جس پر رسول اللہ صلی اللہ علیہ وسلم نے ارشاد فرمایا: ”وہ ان دنوں کی تعداد پر غور کرے جو اس عارضے کے لاحق ہونے سے پہلے اسے (حیض کے طور پر) آیا کرتے تھے اور ہر ماہ میں ان کی جو مقدار اور تاریخیں تھیں انہیں ملحوظ رکھے، پس وہ اتنے ہی دن نماز چھوڑ دے، پھر جب وہ ایام گزر جائیں اور نماز کا وقت ہو جائے تو غسل کرے اور (خون روکنے کے لیے) کپڑے کا لنگوٹ باندھ کر نماز پڑھے۔“ اس حدیث کی سند میں ایک راوی مبہم (نامعلوم شخص) ہے جس نے سیدہ ام سلمہ رضی اللہ عنہا سے روایت کی ہے۔ [مسند أبي يعلى الموصلي/مسند أم سلمة زوج النبي صلى الله عليه وسلم/حدیث: 6894]

سیدہ زینب بنت ام سلمہ رضی اللہ عنہا سے روایت ہے کہ سیدہ ام سلیم رضی اللہ عنہا رسول اللہ صلی اللہ علیہ وسلم کی خدمتِ اقدس میں حاضر ہوئیں اور عرض گزار ہوئیں کہ ”یقیناً اللہ تعالیٰ حق بات (کے بیان) سے نہیں شرماتا، کیا عورت کو جب احتلام ہو جائے تو اس پر غسل واجب ہے؟“ آپ صلی اللہ علیہ وسلم نے ارشاد فرمایا: ”ہاں، جب وہ (منی کا) پانی دیکھ لے۔“ اس پر سیدہ ام سلمہ رضی اللہ عنہا نے (تعجب سے) کہا: کیا عورت کو بھی احتلام ہوتا ہے؟ تو آپ صلی اللہ علیہ وسلم نے فرمایا: «تَرِبَتْ يَمِينُكِ» ”تیرے ہاتھ خاک آلود ہوں، (اگر ایسا نہیں ہے) تو پھر اس کا بچہ اس کی مشابہت کیسے اختیار کرتا ہے؟“ [مسند أبي يعلى الموصلي/مسند أم سلمة زوج النبي صلى الله عليه وسلم/حدیث: 6895]

سیدہ ام سلمہ رضی اللہ عنہا سے روایت ہے کہ رسول اللہ صلی اللہ علیہ وسلم نے انہیں تعلیم دیتے ہوئے فرمایا: ”اے ام سلمہ! مغرب کی اذان کے وقت یوں کہا کرو: «اللَّهُمَّ عِنْدَ اسْتِقْبَالِ لَيْلِكَ، وَإِدْبَارِ نَهَارِكَ، وَأَصْوَاتِ دُعَاتِكَ، وَحُضُورِ صَلَوَاتِكَ، أَسْأَلُكَ أَنْ تَغْفِرَ لِي» ”اے اللہ! تیری رات کی آمد، تیرے دن کی رخصتی، تیرے پکارنے والوں (مؤذنوں) کی آوازوں اور تیری نمازوں کی حاضری کے وقت، میں تجھ سے سوال کرتی ہوں کہ تو میری مغفرت فرما دے۔““ [مسند أبي يعلى الموصلي/مسند أم سلمة زوج النبي صلى الله عليه وسلم/حدیث: 6896]

سیدہ ام سلمہ رضی اللہ عنہا سے روایت ہے کہ دو آدمی نبی کریم صلی اللہ علیہ وسلم کی بارگاہ میں وراثت اور چند ایسی چیزوں کے متعلق جھگڑا لے کر آئے جو (قدیم ہونے کی وجہ سے) مٹ چکی تھیں، تو رسول اللہ صلی اللہ علیہ وسلم نے ارشاد فرمایا: ”میں تمہارے درمیان اپنی رائے سے اس وقت تک فیصلہ کرتا ہوں جب تک مجھ پر کوئی وحی نازل نہ ہو، چنانچہ جس کے حق میں، میں ایسی دلیل کی بنیاد پر فیصلہ کر دوں جسے میں (صحیح) سمجھ رہا ہوں اور وہ اس کے ذریعے ناحق کوئی حصہ حاصل کر لے، تو وہ درحقیقت آگ کا ایک ٹکڑا حاصل کر رہا ہے جو دہکتے ہوئے انگارے کی مانند قیامت کے دن اس کی گردن میں طوق بنا کر لایا جائے گا“۔ سیدہ ام سلمہ رضی اللہ عنہا بیان کرتی ہیں کہ (یہ سن کر) وہ دونوں آدمی رونے لگے اور ان میں سے ہر ایک نے عرض کیا: اے اللہ کے رسول! میرا وہ حق جس کا میں مطالبہ کر رہا تھا وہ اب میرے اس ساتھی کا ہے، تو رسول اللہ صلی اللہ علیہ وسلم نے ارشاد فرمایا: ”ایسا نہیں، بلکہ تم دونوں جاؤ اور (حق کی) جستجو کرو، پھر قرعہ اندازی کر لو اور اس کے بعد تم میں سے ہر ایک اپنے ساتھی کو (باقی ماندہ مطالبہ) معاف و حلال کر دے“۔ [مسند أبي يعلى الموصلي/مسند أم سلمة زوج النبي صلى الله عليه وسلم/حدیث: 6897]

سیدہ ام سلمہ رضی اللہ عنہا سے روایت ہے کہ رسول اللہ صلی اللہ علیہ وسلم نے ہم سے ارشاد فرمایا: ”ہر مہینے کے شروع میں تین دن کے روزے رکھا کرو: پیر، جمعرات اور اس کے بعد آنے والی اگلی جمعرات۔“ [مسند أبي يعلى الموصلي/مسند أم سلمة زوج النبي صلى الله عليه وسلم/حدیث: 6898]