نبی صلی اللہ علیہ وسلم کی زوجہ محترمہ حضرت عائشہ رضی اللہ عنہا سے روایت ہے کہ حضرت سہلہ بنت سہیل رضی اللہ عنہا رسول اللہ صلی اللہ علیہ وسلم کے پاس حاضر ہوئیں اور کہنے لگیں: اے اللہ کے رسول صلی اللہ علیہ وسلم ! سالم کے میرے پاس آنے جانے کی وجہ سے میں (اپنے خاوند) حضرت ابو حذیفہ رضی اللہ عنہ کے چہرے پر کراہت کے آثار دیکھتی ہوں۔ (کیا کروں؟) آپ صلی اللہ علیہ وسلم نے فرمایا: ”تو اسے دودھ پلا دے۔“ انہوں نے کہا: وہ تو داڑھی والا ہے۔ آپ صلی اللہ علیہ وسلم نے فرمایا: ”اسے دودھ پلا دے، اس سے ابو حذیفہ کے چہرے کی کراہت ختم ہو جائے گی۔“ وہ فرماتی ہیں: اس کے بعد میں نے کبھی حضرت ابو حذیفہ رضی اللہ عنہ کے چہرے پر کراہت محسوس نہیں کی۔ [سنن نسائي/كتاب النكاح/حدیث: 3321]

حضرت عائشہ رضی اللہ عنہا سے مروی ہے کہ حضرت سہلہ بنت سہیل رضی اللہ عنہا رسول اللہ صلی اللہ علیہ وسلم کے پاس آئیں اور کہنے لگیں: میں سالم کے اپنے پاس آنے جانے کی وجہ سے اپنے خاوند ابوحذیفہ رضی اللہ عنہ کے چہرے پر کراہت کے آثار محسوس کرتی ہوں۔ آپ صلی اللہ علیہ وسلم نے فرمایا: ”اسے دودھ پلا دے۔“ وہ کہنے لگی: اسے کیسے دودھ پلاؤں؟ وہ تو پورا آدمی ہے؟ پھر وہ بعد میں آئی اور کہنے لگی: قسم اس ذات کی جس نے آپ کو برحق نبی بنا دیا! میں نے اس کے بعد ابوحذیفہ رضی اللہ عنہ کے چہرے میں ذرا بھر بھی کراہت محسوس نہیں کی۔ [سنن نسائي/كتاب النكاح/حدیث: 3322]

حضرت عائشہ رضی اللہ عنہا فرماتی ہیں کہ نبی صلی اللہ علیہ وسلم نے حضرت ابو حذیفہ رضی اللہ عنہ کی بیوی کو حکم دیا تھا کہ ”وہ سالم مولیٰ ابو حذیفہ کو دودھ پلا دے تاکہ ابو حذیفہ کی غیرت (اس کے آنے جانے پر) نہ بھڑکے۔“ انہوں نے اسے دودھ پلا دیا، حالانکہ وہ پورا مرد تھا۔ ربیعہ راوی نے کہا: یہ (رخصت) حضرت سالم رضی اللہ عنہ کے لیے تھی۔ [سنن نسائي/كتاب النكاح/حدیث: 3323]

حضرت عائشہ رضی اللہ عنہا سے مروی ہے کہ حضرت سلمہ رضی اللہ عنہا رسول اللہ صلی اللہ علیہ وسلم کے پاس آئیں اور کہنے لگیں: اے اللہ کے رسول! سالم ہمارے ہاں (بلا روک ٹوک) آتا جاتا رہتا ہے لیکن اب وہ مردوں کی طرح (جنسی معاملات) سمجھنے لگا ہے اور ان باتوں کو جاننے لگا ہے جنہیں مرد سمجھتے ہیں۔ آپ صلی اللہ علیہ وسلم نے فرمایا: ”تو اسے دودھ پلا دے، پھر اس وجہ سے تو اس کے لیے حرام ہو جائے گی۔“ (راویِ حدیث ابن ابی ملیکہ رحمہ اللہ نے کہا:) میں ایک برس ٹھہرا رہا، یہ حدیث بیان نہیں کرتا تھا۔ میں قاسم رحمہ اللہ سے ملا تو انہوں نے کہا: یہ حدیث بیان کیا کرو اور کسی سے بھی نہ ڈرو۔ [سنن نسائي/كتاب النكاح/حدیث: 3324]

حضرت عائشہ رضی اللہ عنہا سے روایت ہے کہ سالم مولیٰ ابی حذیفہ رضی اللہ عنہ (متبنیٰ ہونے کی وجہ سے) حضرت ابوحذیفہ رضی اللہ عنہ اور ان کی بیوی کے ساتھ ان کے گھر میں ہی رہتا تھا، پھر (ابوحذیفہ کی بیوی سہلہ) بنت سہیل رضی اللہ عنہا نبی صلی اللہ علیہ وسلم کے پاس آئیں اور کہنے لگیں: سالم اب پورا مرد بن گیا ہے اور وہ مردوں والی (مخصوص) باتیں سمجھنے لگا ہے، وہ ہمارے پاس (اب بھی اسی طرح) آتا جاتا ہے، میں اس کی وجہ سے حضرت ابوحذیفہ رضی اللہ عنہ کے دل میں کچھ کراہت محسوس کرتی ہوں تو نبی صلی اللہ علیہ وسلم نے فرمایا: ”تو اسے دودھ پلا دے، تو اس پر حرام ہو جائے گی۔“ (وہ کہتی ہیں:) میں نے اسے دودھ پلایا، اس طرح حضرت ابوحذیفہ رضی اللہ عنہ کے دل کی کراہت ختم ہو گئی، میں دوبارہ آپ صلی اللہ علیہ وسلم کے پاس آئی اور کہنے لگی: میں نے اسے دودھ پلا دیا تھا، اس طرح ابوحذیفہ کے دل کی ناگواری ختم ہو گئی۔ [سنن نسائي/كتاب النكاح/حدیث: 3325]

حضرت عروہ رحمہ اللہ سے روایت ہے کہ حضرت عائشہ رضی اللہ عنہا کے علاوہ تمام ازواجِ نبی صلی اللہ علیہ وسلم اس بات سے منکر تھیں کہ لوگوں میں سے کوئی شخص اس قسم، یعنی بڑی عمر کی رضاعت کے رشتے سے ان کے پاس آئے جائے۔ انہوں نے حضرت عائشہ رضی اللہ عنہا سے بھی کہا تھا کہ اللہ کی قسم! رسول اللہ صلی اللہ علیہ وسلم نے جو حکم سہلہ بنت سہیل رضی اللہ عنہا کو دیا تھا، وہ صرف سالم رضی اللہ عنہ کے ساتھ خاص تھا اور وہ ان کے لیے رسول اللہ صلی اللہ علیہ وسلم کی طرف سے خصوصی رخصت تھی۔ اللہ کی قسم! اس قسم کی رضاعت کے رشتے سے کوئی شخص نہ ہمارے گھر آ سکتا ہے اور نہ ہمیں بے حجاب دیکھ سکتا ہے۔ [سنن نسائي/كتاب النكاح/حدیث: 3326]

حضرت ام سلمہ رضی اللہ عنہا نبی صلی اللہ علیہ وسلم کی زوجہ محترمہ فرمایا کرتی تھیں کہ باقی تمام ازواجِ نبی صلی اللہ علیہ وسلم اس بات کی قائل نہ تھیں کہ کوئی شخص اس قسم کی رضاعت کے ساتھ ان کے پاس آئے جائے، بلکہ انہوں نے حضرت عائشہ رضی اللہ عنہا سے بھی کہا تھا: اللہ کی قسم! ہم تو اسے ایسی رخصت سمجھتی ہیں جو اللہ تعالیٰ کے رسول صلی اللہ علیہ وسلم نے خصوصی طور پر سالم رضی اللہ عنہ کو عطا فرمائی تھی، لہٰذا کوئی شخص اس جیسی رضاعت کے رشتے سے ہمارے ہاں نہ آئے جائے اور نہ ہمیں دیکھے۔ [سنن نسائي/كتاب النكاح/حدیث: 3327]