حضرت ابوہریرہ رضی اللہ عنہ سے روایت ہے، انہوں نے فرمایا کہ ”شبِ معراج میں رسول اللہ صلی اللہ علیہ وسلم کو دودھ کا ایک پیالہ اور شراب کا ایک پیالہ پیش کیا گیا۔“ [صحيح البخاري/كِتَاب الْأَشْرِبَةِ/حدیث: 5603]

حضرت ام فضل رضی اللہ عنہا سے روایت ہے، انہوں نے کہا: ”لوگوں نے عرفہ کے دن رسول اللہ صلی اللہ علیہ وسلم کے روزے کے متعلق شک کیا، تو میں نے آپ کے لیے ایک برتن میں دودھ بھیجا جسے آپ نے نوش فرمایا۔“ سفیان کبھی اس حدیث کو یوں بیان کرتے ہیں کہ ”عرفہ کے دن رسول اللہ صلی اللہ علیہ وسلم کے روزے کے متعلق لوگوں کو شبہ تھا، اس لیے ام فضل رضی اللہ عنہا نے آپ کے لیے دودھ بھیجا۔“ جب (سفیان) سے پوچھا جاتا (کہ یہ روایت موصول ہے یا مرسل) تو وہ کہتے: ”(مرفوع متصل ہے کیونکہ) یہ ام فضل رضی اللہ عنہا کی روایت ہے (جو صحابیہ تھیں)۔“ [صحيح البخاري/كِتَاب الْأَشْرِبَةِ/حدیث: 5604]

حضرت جابر بن عبداللہ رضی اللہ عنہ سے روایت ہے، انہوں نے کہا کہ حضرت ابو حمید ساعدی رضی اللہ عنہ مقام نقیع سے دودھ کا ایک پیالہ لائے تو رسول اللہ صلی اللہ علیہ وسلم نے ان سے فرمایا: ”تو نے اسے ڈھانپا کیوں نہیں؟ اگرچہ اس کے عرض کے بل ایک لکڑی ہی رکھ دیتے۔“ [صحيح البخاري/كِتَاب الْأَشْرِبَةِ/حدیث: 5605]

حضرت جابر رضی اللہ عنہ سے روایت ہے، انہوں نے کہا کہ ایک انصاری صحابی حضرت ابو حمید ساعدی رضی اللہ عنہ مقام نقیع سے نبی صلی اللہ علیہ وسلم کے لیے دودھ سے بھرا ایک برتن لائے۔ نبی صلی اللہ علیہ وسلم نے ان سے فرمایا: ”تم اسے ڈھانپ کر کیوں نہیں لائے؟ اگرچہ اس پر ایک لکڑی ہی رکھ دیتے۔“ (اعمش کہتے ہیں کہ) مجھے سفیان نے بیان کیا، ان سے حضرت جابر رضی اللہ عنہ نے اور انہوں نے نبی صلی اللہ علیہ وسلم سے یہ حدیث بیان کی۔ [صحيح البخاري/كِتَاب الْأَشْرِبَةِ/حدیث: 5606]

حضرت براء رضی اللہ عنہ سے روایت ہے، انہوں نے کہا کہ نبی صلی اللہ علیہ وسلم مکہ مکرمہ سے تشریف لائے تو حضرت ابوبکر صدیق رضی اللہ عنہ آپ کے ہمراہ تھے۔ حضرت ابوبکر صدیق رضی اللہ عنہ نے بیان کیا کہ ”ہم راستے میں ایک چرواہے کے قریب سے گزرے جبکہ رسول اللہ صلی اللہ علیہ وسلم کو پیاس لگی تھی“۔ حضرت ابوبکر صدیق رضی اللہ عنہ نے فرمایا کہ ”میں ایک پیالے میں تھوڑا سا دودھ لایا، رسول اللہ صلی اللہ علیہ وسلم نے وہ نوش فرمایا تو مجھے راحت محسوس ہوئی“۔ اس دوران میں سراقہ بن جعشم گھوڑے پر سوار ہو کر ہمارے پاس پہنچ گیا۔ آپ صلی اللہ علیہ وسلم نے اس کے لیے بددعا کی۔ سراقہ نے آپ صلی اللہ علیہ وسلم سے التجا کی کہ ”آپ بددعا نہ کریں وہ واپس چلا جائے گا“۔ نبی صلی اللہ علیہ وسلم نے ایسا ہی کیا۔ [صحيح البخاري/كِتَاب الْأَشْرِبَةِ/حدیث: 5607]

حضرت ابو ہریرہ رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا: ”بہترین صدقہ دودھ دینے والی اونٹنی یا دودھ دینے والی بکری کا عطیہ دینا ہے جو ایک برتن صبح بھر کر دودھ دے اور ایک برتن شام کو بھر دے۔“ [صحيح البخاري/كِتَاب الْأَشْرِبَةِ/حدیث: 5608]

حضرت ابن عباس رضی اللہ عنہما سے روایت ہے کہ رسول اللہ صلی اللہ علیہ وسلم نے دودھ نوش فرمایا، پھر آپ صلی اللہ علیہ وسلم نے کلی کی اور فرمایا: ”اس میں چکناہٹ ہوتی ہے۔“ [صحيح البخاري/كِتَاب الْأَشْرِبَةِ/حدیث: 5609]

حضرت انس بن مالک رضی اللہ عنہ سے روایت ہے انہوں نے کہا کہ رسول اللہ صلی اللہ علیہ وسلم نے فرمایا: ”مجھے جب سدرۃ المنتہیٰ کی طرف اٹھایا گیا تو میں نے وہاں چار نہریں دیکھیں: ان میں سے دو ظاہری تھیں اور دو باطنی۔ ظاہری نہریں تو نیل اور فرات ہیں اور باطنی نہریں جنت میں تھیں۔ پھر مجھے تین پیالے پیش کیے گئے۔ ایک پیالے میں دودھ اور دوسرے میں شہد تھا جبکہ تیسرے پیالے میں شراب تھی، میں نے وہ پیالہ لیا جس میں دودھ تھا اور اسے میں نے نوشِ جاں کیا، اس لیے انتخاب پر مجھے کہا گیا: آپ نے اور آپ کی امت نے اصل فطرت کو پالیا ہے۔“ ہشام، سعید اور ہمام نے حضرت قتادہ سے، انہوں نے حضرت انس رضی اللہ عنہ سے، انہوں نے مالک بن صعصعہ رضی اللہ عنہ سے یہ حدیث بیان کی ہے، اس میں نہروں کا ذکر تو اسی طرح ہے لیکن تین پیالوں کا ذکر نہیں ہے۔ [صحيح البخاري/كِتَاب الْأَشْرِبَةِ/حدیث: 5610]