حضرت ابوہریرہ رضی اللہ عنہ سے روایت ہے، وہ نبی صلی اللہ علیہ وسلم سے بیان کرتے ہیں کہ آپ صلی اللہ علیہ وسلم نے فرمایا: ”قیامت کے دن لوگوں کا حشر تین فرقوں میں ہوگا: ایک یہ کہ لوگ رغبت کرنے اور ڈرنے والے ہوں گے۔ دوسرا یہ کہ ایک اونٹ پر دو آدمی سوار ہوں گے، کسی پر تین ہوں گے، کسی پر چار ہوں گے اور کسی پر دس ہوں گے۔ اور تیسرا یہ کہ باقی ماندہ لوگوں کو آگ جمع کرے گی۔ جب وہ قیلولہ کریں گے تو آگ بھی ان کے ساتھ ٹھہرے گی، جب وہ رات گزاریں گے تو آگ بھی ان کے ساتھ ہوگی، جب وہ صبح کریں گے تو آگ بھی ان کے ساتھ ہوگی، نیز جب وہ شام کریں گے تو آگ بھی شام کے وقت ان کے ساتھ موجود ہوگی۔“ [صحيح البخاري/كِتَاب الرِّقَاقِ/حدیث: 6522]

حضرت انس بن مالک رضی اللہ عنہ سے روایت ہے کہ ایک صحابی نے پوچھا: ”اللہ کے رسول! کافر کا چہرے کے بل کیسے حشر کیا جائے گا؟“ آپ صلی اللہ علیہ وسلم نے فرمایا: ”کیا وہ ذات جس نے اسے دنیا میں دونوں پاؤں پر چلایا ہے، اسے اس بات پر قدرت نہیں کہ اسے قیامت کے دن چہرے کے بل چلا دے؟“ (راویِ حدیث) قتادہ رحمہ اللہ نے کہا: ”کیوں نہیں، ہمارے رب کی عزت و آبرو کی قسم! وہ منہ کے بل چلا سکتا ہے۔“ [صحيح البخاري/كِتَاب الرِّقَاقِ/حدیث: 6523]

حضرت ابن عباس رضی اللہ عنہ سے روایت ہے، انہوں نے کہا: میں نے نبی صلی اللہ علیہ وسلم کو یہ فرماتے ہوئے سنا: ”تم اللہ سے برہنہ پاؤں، برہنہ جسم اور غیر مختون پیدل چلتے ہوئے ملاقات کرو گے۔“ سفیان رحمہ اللہ نے کہا: ”اس حدیث کو ہم ان (نو یا دس) احادیث میں سے شمار کرتے ہیں جسے حضرت ابن عباس رضی اللہ عنہ نے براہ راست نبی صلی اللہ علیہ وسلم سے سنا ہے۔“ [صحيح البخاري/كِتَاب الرِّقَاقِ/حدیث: 6524]

حضرت ابن عباس رضی اللہ عنہما ہی سے روایت ہے، انہوں نے کہا کہ میں نے رسول اللہ صلی اللہ علیہ وسلم کو منبر پر خطبہ دیتے ہوئے یا فرماتے سنا: ”تم اللہ تعالیٰ سے ننگے پاؤں، برہنہ جسم اور غیر مختون حالت میں ملاقات کرو گے۔“ [صحيح البخاري/كِتَاب الرِّقَاقِ/حدیث: 6525]

حضرت عبداللہ بن عباس رضی اللہ عنہما سے روایت ہے انہوں نے کہا کہ نبی کریم صلی اللہ علیہ وسلم ہمیں خطبہ دینے کے لیے کھڑے ہوئے اور فرمایا: ”یقیناً تم لوگ برہنہ پاؤں، برہنہ تن اور غیر مختون اٹھائے جاؤ گے۔ ﴿كَمَا بَدَأْنَا أَوَّلَ خَلْقٍ نُعِيدُهُ﴾ [سورة الأنبياء: 104] ”جس طرح ہم نے تمہیں پہلے پیدا کیا تھا اسی طرح تمہیں لوٹائیں گے۔“ قیامت کے دن تمام مخلوقات میں سب سے پہلے پوشاک پہنائی جائے گی وہ حضرت ابراہیم خلیل اللہ علیہ السلام ہوں گے۔ اس دوران میں میری امت میں سے کچھ لوگوں کو، جن کے اعمال نامے بائیں ہاتھ میں ہوں گے، گرفتار کر کے لایا جائے گا، میں کہوں گا: ”اے میرے رب! یہ تو میرے ساتھی ہیں۔“ اللہ تعالیٰ فرمائے گا: ”آپ نہیں جانتے کہ انہوں نے آپ کے بعد کیا بدعات نکالی تھیں۔“ اس وقت میں بھی وہی کہوں گا جو اللہ کے نیک بندے نے کہا تھا: ﴿وَكُنْتُ عَلَيْهِمْ شَهِيدًا مَا دُمْتُ فِيهِمْ﴾ [سورة المائدة: 117] ”اے اللہ! جب تک میں ان میں موجود رہا میں ان کا نگہبان تھا۔“ مجھے کہا جائے گا: ”یہ لوگ ہمیشہ اپنی ایڑیوں کے بل پھرتے ہی رہے (مرتد ہوتے رہے)۔““ [صحيح البخاري/كِتَاب الرِّقَاقِ/حدیث: 6526]

حضرت عائشہ رضی اللہ عنہا سے روایت ہے، انہوں نے کہا کہ رسول اللہ صلی اللہ علیہ وسلم نے فرمایا: ”تم ننگے پاؤں، ننگے جسم اور غیر مختون حالت میں اٹھائے جاؤ گے۔“ حضرت عائشہ رضی اللہ عنہا کہتی ہیں کہ میں نے پوچھا: اللہ کے رسول! کیا مرد اور عورتیں ایک دوسرے کو دیکھتے ہوں گے؟ آپ صلی اللہ علیہ وسلم نے فرمایا: ”اس وقت معاملہ اس سے کہیں زیادہ سنگین ہوگا، اس کا خیال بھی کوئی نہیں کرسکے گا۔“ [صحيح البخاري/كِتَاب الرِّقَاقِ/حدیث: 6527]

حضرت عبداللہ بن مسعود رضی اللہ عنہ سے روایت ہے، انہوں نے کہا کہ ہم نبی صلی اللہ علیہ وسلم کے ہمراہ ایک خیمے میں تھے، آپ نے فرمایا: ”کیا تم اس بات پر خوش ہو کہ اہل جنت کا ایک چوتھائی رہو؟“ ہم نے کہا: ”جی ہاں۔“ پھر آپ نے فرمایا: ”کیا تم اس پر خوش ہو کہ اہل جنت کا تم نصف رہو؟“ ہم نے کہا: ”جی ہاں۔“ آپ نے فرمایا: ”مجھے اس ذات کی قسم جس کے ہاتھ میں میری جان ہے! میں امید رکھتا ہوں کہ تم اہل جنت کا نصف ہوگے۔ یہ اس لیے کہ جنت میں صرف مسلمان ہی داخل ہوں گے اور تم اہل شرک کے مقابلے میں اس طرح ہوگے جس طرح سیاہ بیل کے جسم پر سفید بال ہو یا جیسے سرخ بیل کے جسم پر ایک سیاہ بال ہو۔“ [صحيح البخاري/كِتَاب الرِّقَاقِ/حدیث: 6528]

حضرت ابوہریرہ رضی اللہ عنہ سے روایت ہے کہ نبی صلی اللہ علیہ وسلم نے فرمایا: ”قیامت کے دن سب سے پہلے آدم کو پکارا جائے گا تو ان کی اولاد انہیں دیکھے گی، کہا جائے گا: ”یہ تمہارے باپ آدم ہیں۔“ حضرت آدم علیہ السلام جواب دیں گے: «لَبَّيْكَ وَسَعْدَيْكَ» ”میں سعادت مندی کے ساتھ حاضر ہوں۔“ اللہ تعالیٰ فرمائے گا: ”اپنی نسل میں سے دوزخ کا حصہ الگ کر دو۔“ حضرت آدم علیہ السلام عرض کریں گے: ”اے پروردگار! کس نسبت سے الگ کر دوں؟“ اللہ تعالیٰ فرمائے گا: ”سو میں سے ننانوے“۔ صحابہ نے پوچھا: ”اللہ کے رسول! جب ہم میں سے ننانوے فیصد نکال لیے جائیں گے تو باقی کیا بچے گا؟“ آپ صلی اللہ علیہ وسلم نے فرمایا: ”بلاشبہ امت سابقہ امتوں کے مقابلے میں، سیاہ بیل میں سفید بال کی طرح ہوگی۔““ [صحيح البخاري/كِتَاب الرِّقَاقِ/حدیث: 6529]