عامر شعبی رحمہ اللہ سے روایت ہے کہ رسول اللہ صلی اللہ علیہ وسلم جب جمعہ کے دن منبر پر تشریف لاتے تو لوگوں کی طرف رخِ انور کرتے اور فرماتے: «السَّلَامُ عَلَيْكُمْ» ”تم پر سلامتی ہو“، پھر اللہ تعالیٰ کی حمد و ثنا بیان کرتے اور ایک سورت تلاوت فرماتے، پھر تھوڑی دیر کے لیے تشریف فرما ہوتے، پھر دوبارہ کھڑے ہو کر خطبہ دیتے اور اس کے بعد منبر سے نیچے تشریف لاتے، اور سیدنا ابوبکر صدیق و سیدنا عمر فاروق رضی اللہ عنہما بھی اسی طرح کیا کرتے تھے۔ [مصنف ابن ابي شيبه/كتاب الجمعة/حدیث: 5301]

سیدنا ابونضرہ سے روایت ہے، انہوں نے بیان کیا کہ سیدنا عثمان رضی اللہ عنہ کافی عمر رسیدہ ہو گئے تھے، پس جب وہ منبر پر تشریف لاتے تو ”سلام“ کرتے، پھر اتنی دیر تک قیام فرماتے جتنی دیر میں کوئی انسان ام الکتاب (سورہ فاتحہ) پڑھ لے۔ [مصنف ابن ابي شيبه/كتاب الجمعة/حدیث: 5302]

عمرو بن مہاجر سے روایت ہے کہ عمر بن عبدالعزیز رحمہ اللہ جب منبر پر (خطبہ دینے کے لیے) سیدھے کھڑے ہو جاتے تو حاضرین کو «سلام» کرتے تھے اور لوگ ان کے سلام کا جواب دیتے تھے۔ [مصنف ابن ابي شيبه/كتاب الجمعة/حدیث: 5303]