کلثوم بن جبر سے مروی ہے کہ مسلم بن یسار رحمہ اللہ نے فرمایا: ”جب تمہیں یہ معلوم ہو جائے کہ جمعہ کے دن سورج نصف النہار (عین دوپہر) کو پہنچ چکا ہے، تو پھر کوئی چیز ہرگز نہ خریدو۔“ [مصنف ابن ابي شيبه/كتاب الجمعة/حدیث: 5494]

ابن ابی ذئب سے روایت ہے کہ عمر بن عبدالعزیز رحمہ اللہ جمعہ کے دن جب نماز کے لیے اذان دے دی جاتی تو لوگوں کو خرید و فروخت کرنے سے منع فرما دیتے تھے۔ [مصنف ابن ابي شيبه/كتاب الجمعة/حدیث: 5495]

ضحاک رحمہ اللہ سے روایت ہے کہ انہوں نے فرمایا: ”جب جمعہ کے دن سورج زوال پذیر ہو جائے تو نماز کی ادائیگی تک «البيع والشراء» (خرید و فروخت) حرام ہو جاتی ہے۔“ [مصنف ابن ابي شيبه/كتاب الجمعة/حدیث: 5496]

ہشیم نے حجاج کے واسطے سے عطاء سے، اور حجاج کے بعض ساتھیوں کے واسطے سے حسن بصری سے روایت کی ہے کہ ان دونوں نے یہی (مذکورہ بالا قول) کہا ہے۔ [مصنف ابن ابي شيبه/كتاب الجمعة/حدیث: 5497]

قاسم بن محمد سے روایت ہے کہ انہوں نے جمعہ کے دن ایک شخص سے کوئی چیز خریدی، پھر بعد میں اس شخص سے ان کی ملاقات ہوئی تو انہوں نے اس سے کہا: ”مجھ سے یہ سودا واپس لے لیں (یعنی اسے منسوخ کر دیں)، کیونکہ میرا گمان ہے کہ میں نے آپ سے یہ خریداری سورج ڈھلنے کے بعد کی تھی۔“ [مصنف ابن ابي شيبه/كتاب الجمعة/حدیث: 5498]

سفیان بن عیینہ عبدالکریم سے، وہ مجاہد یا کسی اور سے روایت کرتے ہیں کہ انہوں نے کہا: ”جو شخص جمعہ کے دن زوالِ آفتاب کے بعد کوئی چیز فروخت کرے تو اس کی وہ بیع مردود ہے، کیونکہ اللہ تعالیٰ نے ﴿إِذَا نُودِيَ لِلصَّلَاةِ مِنْ يَوْمِ الْجُمُعَةِ﴾ [سورة الجمعة: 9] ”جب جمعہ کے دن نماز کے لیے اذان دی جائے“ تو بیع کرنے سے منع فرمایا ہے“، (اس راوی کے متعلق) سفیان کو شک ہوا ہے۔ [مصنف ابن ابي شيبه/كتاب الجمعة/حدیث: 5499]

حضرت برد کہتے ہیں کہ میں نے حضرت زہری سے عرض کیا کہ جمعہ کے دن خریدو فروخت کب ممنوع ہوتی ہیں؟ انہوں نے فرمایا کہ پہلے اذان امام کے نکلنے کے وقت ہوتی تھی۔ پھر حضرت عثمان نے ایک تیسری اذان کا اضافہ کیا، جس کے بعد لوگوں کو جمع کرنے کے لئے منارہ پر اذان دی جانے لگی تاکہ لوگ جمع ہوجائیں۔ میرے خیال کے مطابق اس وقت خریدو فروخت کو ترک کردینا چاہئے۔ [مصنف ابن ابي شيبه/كتاب الجمعة/حدیث: 5500]

حضرت میمون فرماتے ہیں کہ اہل مدینہ کا معمول یہ تھا کہ جب جمعہ کے دن مؤذن اذان دے دیتا تو لوگ بازاروں میں اعلان کیا کرتے تھے کہ بیع حرام ہوگئی، بیع حرام ہوگئی۔ [مصنف ابن ابي شيبه/كتاب الجمعة/حدیث: 5501]

حضرت شعبی جمعہ کی ساعت قبولیت کے بارے میں فرماتے ہیں کہ وہ بیع کے حرام ہونے سے حلال ہونے کا درمیانی وقت ہے۔ [مصنف ابن ابي شيبه/كتاب الجمعة/حدیث: 5502]