حضرت عائشہ رضی اللہ عنہا فرماتی ہیں کہ نبی کریم صلی اللہ علیہ وآلہ وسلم رمضان میں بوسہ لیا کرتے تھے۔ [مصنف ابن ابي شيبه/كتاب الصيام/حدیث: 9641]

حضرت عروہ سے روایت ہے کہ حضرت عائشہ رضی اللہ عنہا فرماتی ہیں کہ نبی کریم صلی اللہ علیہ وآلہ وسلم روزہ کی حالت میں اپنی زوجہ کا بوسہ لیا کرتے تھے۔ یہ فرما کر حضرت عائشہ رضی اللہ عنہا مسکرائیں جس سے ہمیں اندازہ ہوا کہ وہ زوجہ آپ ہی ہوں گی۔ [مصنف ابن ابي شيبه/كتاب الصيام/حدیث: 9642]

حضرت عائشہ رضی اللہ عنہا فرماتی ہیں کہ نبی کریم صلی اللہ علیہ وآلہ وسلم روزہ کی حالت میں بوسہ لیتے اور اپنی بیوی کے ساتھ معانقہ وغیرہ بھی کرتے تھے کیونکہ آپ صلی اللہ علیہ وآلہ وسلم اپنی کیفیات پر تم سے زیادہ قابو رکھنے والے تھے۔ [مصنف ابن ابي شيبه/كتاب الصيام/حدیث: 9643]

حضرت علی رضی اللہ عنہ فرماتے ہیں کہ روزہ دار کے لئے بوسہ لینے میں کوئی حرج نہیں۔ [مصنف ابن ابي شيبه/كتاب الصيام/حدیث: 9644]

حضرت زید ابی عتاب فرماتے ہیں کہ حضرت سعد سے روزہ دار کے لئے بوسہ کے بارے میں سوال کیا گیا تو انہوں نے فرمایا کہ میں روزہ کی حالت میں ایسا کرتا ہوں۔ [مصنف ابن ابي شيبه/كتاب الصيام/حدیث: 9645]

حضرت ابو سعید سے روزے کی حالت میں بوسہ لینے کے بارے میں سوال کیا گیا تو آپ نے فرمایا اگر اس سے آگے نہ بڑھے تو اس میں کوئی حرج نہیں۔ [مصنف ابن ابي شيبه/كتاب الصيام/حدیث: 9646]

ام المؤمنین حضرت حفصہ بنت عمر فرماتی ہیں کہ نبی کریم صلی اللہ علیہ وآلہ وسلم روزہ کی حالت میں بوسہ لیا کرتے تھے۔ [مصنف ابن ابي شيبه/كتاب الصيام/حدیث: 9647]

ام المؤمنین حضرت ام سلمہ فرماتی ہیں کہ نبی کریم صلی اللہ علیہ وآلہ وسلم میرا بوسہ لیا کرتے تھے حالانکہ میرا بھی روزہ ہوتا اور حضور صلی اللہ علیہ وآلہ وسلم کا بھی روزہ ہوتا تھا۔ [مصنف ابن ابي شيبه/كتاب الصيام/حدیث: 9648]

حضرت ابوہریرہ سے روزہ دار کے لئے بوسہ کے بارے میں سوال کیا گیا تو انہوں نے فرمایا کہ میں اس بات کو پسند کرتا ہوں کہ روزے کی حالت میں ہونٹوں کو ہونٹوں میں رکھوں۔ [مصنف ابن ابي شيبه/كتاب الصيام/حدیث: 9649]

ام المؤمنین حضرت ام سلمہ فرماتی ہیں کہ نبی کریم صلی اللہ علیہ وآلہ وسلم روزے کی حالت میں میرا بوسہ لیا کرتے تھے۔ [مصنف ابن ابي شيبه/كتاب الصيام/حدیث: 9650]