حضرت ابو دردائ رضی اللہ عنہ فرماتے ہیں کہ تین چیزیں ایسی ہیں جن میں مزاح نہیں ہوتا: نکاح، عتاق اور طلاق [مصنف ابن ابي شيبه/كتاب الطلاق/حدیث: 19425]

حضرت عمر رضی اللہ عنہ فرماتے ہیں کہ چار چیزیں ہر حال میں نافذ ہوجاتی ہیں: غلام کی آزادی، طلاق، نکاح اور نذر [مصنف ابن ابي شيبه/كتاب الطلاق/حدیث: 19426]

حضرت ضحاک رحمہ اللہ فرماتے ہیں کہ تین چیزوں میں مزاح نہیں ہوتا: طلاق، نکاح اور نذر [مصنف ابن ابي شيبه/كتاب الطلاق/حدیث: 19427]

حضرت عمرو بن مہاجر رحمہ اللہ کہتے ہیں کہ عبد الملک بن مروان، سلیمان، عمر بن عبد العزیز اور یزید بن عبدالملک s نے خط میں لکھا تھا کہ تم بیوقوفوں کی سب باتوں کو معاف کردو لیکن طلاق اور غلام کی آزادی میں انہیں چھوٹ نہ دو۔ [مصنف ابن ابي شيبه/كتاب الطلاق/حدیث: 19428]

حضرت سعید بن مسیب رحمہ اللہ فرماتے ہیں کہ تین چیزیں ایسی ہیں جن میں مزاح نہیں ہوتا: نکاح، طلاق اور آزادی [مصنف ابن ابي شيبه/كتاب الطلاق/حدیث: 19429]

حضرت ابو دردائ رضی اللہ عنہ فرماتے ہیں کہ زمانہ جاہلیت میں آدمی اپنی بیوی کو طلاق دینے کے بعد رجوع کرلیتا تھا اور کہتا تھا کہ میں تو مزاح کررہا تھا، غلام کو آزاد کرتا تھا اور رجوع کرلیتا تھا اور کہتا تھا کہ میں تو مزاح کررہا تھا، پھر اللہ تعالیٰ نے اس آیت کو نازل فرمایا { وَلاَ تَتَّخِذُوا آیَاتِ اللہِ ہُزُوًا } اللہ کی آیات کو مذاق نہ بناؤ، اس پر رسول اللہ صلی اللہ علیہ وسلم نے فرمایا کہ جس نے طلاق دی، غلام کو آزاد کرایا، نکاح کرایا یا نکاح کیا اور پھر کہا کہ میں تو مزاح کررہا تھا یہ چیزیں پھر بھی نافذ ہوجائیں گی۔ [مصنف ابن ابي شيبه/كتاب الطلاق/حدیث: 19430]

حضرت عمر بن عبد العزیز رحمہ اللہ نے خط میں لکھا کہ بیوقوفوں کی ہر غلطی کو معاف کردو لیکن غلام کی آزادی اور طلاق دینے کو معاف نہ کرو۔ [مصنف ابن ابي شيبه/كتاب الطلاق/حدیث: 19431]

حضرت سعید رحمہ اللہ فرماتے ہیں کہ تین چیزیں ایسی ہیں جن میں مزاح نہیں ہوتا: عتاق، طلاق اور نکاح [مصنف ابن ابي شيبه/كتاب الطلاق/حدیث: 19432]