حضرت ام کرز، جناب نبی کریم صلی اللہ علیہ وآلہ وسلم سے روایت کرتی ہیں کہ آپ صلی اللہ علیہ وآلہ وسلم نے فرمایا: ”بچہ کی طر ف سے دو پوری بکریاں اور بچی کی طرف سے ایک بکری۔“ اس بات سے تمہارا کوئی نقصان نہیں ہوگا کہ وہ بکریاں ہوں یا بکرے ہوں۔“ [مصنف ابن ابي شيبه/كتاب العقيقة/حدیث: 25820]

حضرت ام کرز سے روایت ہے کہ میں نے جناب رسول اللہ صلی اللہ علیہ وآلہ وسلم کو فرماتے سُنا۔ ”بچہ کی طرف سے دو پوری بکریاں اور بچہ کی طرف سے ایک بکری۔“ [مصنف ابن ابي شيبه/كتاب العقيقة/حدیث: 25821]

حضرت عطاء سے روایت ہے کہ حضرت ام السباع نے جناب رسول اللہ صلی اللہ علیہ وآلہ وسلم سے سوال کیا۔ کیا میں اپنی اولاد کی طرف سے عقیقہ کروں؟ آپ صلی اللہ علیہ وآلہ وسلم نے ارشاد فرمایا: ”ہاں۔“ بچہ کی طرف سے دو بکریاں اور بچی کی طرف سے ایک بکری۔“ [مصنف ابن ابي شيبه/كتاب العقيقة/حدیث: 25822]

حضرت ابن عباس رضی اللہ عنہما سے روایت ہے۔ وہ کہتے ہیں کہ بچے کی طرف سے دو بکریاں اور بچی کی طرف سے ایک بکری۔“ [مصنف ابن ابي شيبه/كتاب العقيقة/حدیث: 25823]

حضرت عمرو بن شعیب، اپنے والد سے، اپنے دادا سے روایت کرتے ہیں کہ جناب رسول اللہ صلی اللہ علیہ وآلہ وسلم سے عقیقہ کے بارے میں سوال کیا گیا؟ تو آپ صلی اللہ علیہ وآلہ وسلم نے ارشاد فرمایا: ”میں (والدین کی) نافرمانی کرنے کو پسند نہیں کرتا۔ جس آدمی کے بچہ پیدا ہو اور وہ اس کی طرف سے قربانی کرنے کو پسند کرے تو اس کو قربانی کرنی چاہیے، بچہ کی طرف سے دو بکریاں اور بچی کی طرف سے ایک بکری۔“ [مصنف ابن ابي شيبه/كتاب العقيقة/حدیث: 25824]

حضرت مجاہد سے روایت ہے۔ وہ کہتے ہیں کہ عقیقہ میں دو پوری بکریاں ہیں اور بچی کی طرف سے ایک بکری ہوگی۔ [مصنف ابن ابي شيبه/كتاب العقيقة/حدیث: 25825]

حضرت حفصہ بنت عبد الرحمن، حضرت عائشہ رضی اللہ عنہا کے بارے میں روایت کرتی ہیں کہ انہوں نے ارشاد فرمایا: جناب رسول اللہ صلی اللہ علیہ وآلہ وسلم نے ہمیں حکم دیا کہ ہم عقیقہ کریں بچہ کی طرف سے دو بکریاں اور بچی کی طرف سے ایک بکری۔ [مصنف ابن ابي شيبه/كتاب العقيقة/حدیث: 25826]

حضرت عائشہ رضی اللہ عنہا سے روایت ہے وہ کہتی ہیں کہ غلام (بچہ) کی طرف سے دو پوری بکریاں اور بچی کی طرف سے ایک بکری کا (عقیقہ کرنا) سُنت ہے۔ [مصنف ابن ابي شيبه/كتاب العقيقة/حدیث: 25827]