حضرت غالب فرماتے ہیں کہ ہم لوگ حضرت حسن بصری کے دروازے پر بیٹھے ہوئے تھے کہ ایک آدمی آیا اور کہنے لگا: میرے والد نے میرے دادا سے نقل کیا ہے کہ انہوں نے فرمایا: کہ میرے والد نے مجھے رسول اللہ صلی اللہ علیہ وآلہ وسلم کے پاس بھیجا اور کہا: کہ آپ صلی اللہ علیہ وآلہ وسلم کے پاس جاؤ اور آپ صلی اللہ علیہ وآلہ وسلم کو میرا سلام کہنا، پس میں آپ صلی اللہ علیہ وآلہ وسلم کے پاس آیا میں نے کہا کہ میرے والد آپ صلی اللہ علیہ وآلہ وسلم کو سلام کہہ رہے ہیں۔ آپ صلی اللہ علیہ وآلہ وسلم نے فرمایا: علیک و علی رضی اللہ عنہابیک السلام۔ تجھ پر اور تیرے والد پر سلام ہو۔ [مصنف ابن ابي شيبه/ كتاب الأدب/حدیث: 27350]

حضرت محمد بن ابو المخالد فرماتے ہیں کہ میں نے حضرت ابن ابی اوفی سے عرض کیا: آپ کے بھتیجوں نے آپ کو سلام کہا ہے پھر مسجد والوں نے بھی۔ آپ نے جواب دیا۔ وَعَلَیْک وَعَلَیْہِمْ۔ [مصنف ابن ابي شيبه/ كتاب الأدب/حدیث: 27351]

حضرت اسود فرماتے ہیں کہ حضرت عبد اللہ بن مسعود رضی اللہ عنہ نے مجھ سے ارشاد فرمایا: جب تم حضرت عمر سے ملو تو ان کو سلام کہنا۔ راوی کہتے ہیں کہ جب میں آپ سے ملا تو میں نے ان کو سلام کہا۔ آپ نے یوں جواب دیا۔ وعلیہ یا یوں جواب دیا، وعلیہ السلام ورحمۃ اللہ۔ [مصنف ابن ابي شيبه/ كتاب الأدب/حدیث: 27352]

حضرت عائشہ رضی اللہ عنہا فرماتی ہیں کہ نبی کریم صلی اللہ علیہ وآلہ وسلم نے مجھ سے فرمایا: بیشک جبرائیل تمہیں سلام کہہ رہے ہیں۔ آپ نے یوں جواب دیا وعلیہ السلام ورحمۃ اللہ۔ [مصنف ابن ابي شيبه/ كتاب الأدب/حدیث: 27353]

حضرت ابن عون فرماتے ہیں کہ جب امام سے کہا جاتا کہ فلاں شخص نے آپ کو سلام کہا ہے تو آپ یوں جواب دیتے، وعلیک وعلیہ السلام۔ [مصنف ابن ابي شيبه/ كتاب الأدب/حدیث: 27354]