حضرت زہرہ بن حمیضہ فرماتے ہیں کہ میں سواری پر حضرت ابوبکر کے پیچھے بیٹھا ہوا تھا کہ چند لوگوں پر ہمارا گزر ہوا تو ہم نے ان پر سلام کیا، تو انہوں نے ہمارے سلام کا جواب خوب بڑھا کردیا۔ اس پر حضرت ابوبکر نے فرمایا: کہ آج کے دن تو لوگ ثواب میں ہم پر غالب آ رہے ہیں۔ [مصنف ابن ابي شيبه/ كتاب الأدب/حدیث: 27336]

حضرت زید بن وہب فرماتے ہیں کہ حضرت عمر نے ارشاد فرمایا: میں حضرت ابوبکر کے پیچھے سواری پر سوار تھا، پھر انہوں نے مذکورہ حدیث ذکر کی، اور فرمایا: کہ لوگ آج ثواب میں ہم سے آگے بڑھ گئے۔ [مصنف ابن ابي شيبه/ كتاب الأدب/حدیث: 27337]

حضرت ابو البختری فرماتے ہیں کہ ایک آدمی حضرت علی رضی اللہ عنہ کے پاس آیا، اور کہا: اے امیر المؤمنین: السلام علیک ورحمۃ اللہ وبرکاتہ، آپ نے فرمایا: وعلیکم، وہ آدمی سمجھا کہ آپ نے سنا نہیں۔ اس نے پھر کہا: اے امیرالمؤمنین! السلام علیک ورحمۃ اللہ وبرکاتہ، آپ نے فرمایا: وعلیکم، اس آدمی نے کہا: آپ مجھے ویسے جواب کیوں نہیں دے رہے جیسا کہ میں نے آپ کو کہا؟ آپ نے فرمایا: کیا میں نے ایسا نہیں کیا؟ [مصنف ابن ابي شيبه/ كتاب الأدب/حدیث: 27338]

حضرت ابوہریرہ فرماتے ہیں کہ ایک آدمی مسجد میں داخل ہوا اس حال میں کہ رسول اللہ صلی اللہ علیہ وآلہ وسلم مسجد کے کونے میں بیٹھے ہوئے تھے، اس آدمی نے نماز پڑھی پھر آپ صلی اللہ علیہ وآلہ وسلم کو سلام کیا تو آپ صلی اللہ علیہ وآلہ وسلم نے فرمایا: وعلیک السلام، تجھ پر بھی سلام ہو۔ [مصنف ابن ابي شيبه/ كتاب الأدب/حدیث: 27339]

حضرت مالک بن اوس بن حمد ثان فرماتے ہیں کہ حضرت ابو ذر شام سے واپس آئے اور مسجد میں داخل ہوگئے۔ اس حال میں کہ حضرت عثمان بھی مسجد میں تھے۔ آپ نے فرمایا: السلام علیکم، انہوں نے جواب دیا: وعلیکم السلام، اے ابو ذر، کیسے ہو تم؟ انہوں نے فرمایا: خیریت سے ہوں، تم کیسے ہو؟ اے عثمان! آپ نے جواب میں کہا، میں بھی خیریت سے ہوں۔ [مصنف ابن ابي شيبه/ كتاب الأدب/حدیث: 27340]

حضرت میمون فرماتے ہیں کہ ایک آدمی نے حضرت سلمان فارسی کو سلام کیا اور کہا: السلام علیک و رحمۃ اللہ وبرکاتہ، حضرت سلمان نے کہا، کافی ہے کافی ہے، پھر آپ نے ویسے ہی اس کو جواب دیا جیسا کہ اس شخص نے سلام کیا تھا، پھر چند اور کلمات کا اضافہ فرمایا: اس پر اس شخص نے آپ سے پوچھا: اے ابو عبد اللہ! کیا آپ مجھے جانتے ہیں؟ آپ نے فرمایا: میری روح تمہاری روح کو جانتی ہے۔ [مصنف ابن ابي شيبه/ كتاب الأدب/حدیث: 27341]

حضرت نافع فرماتے ہیں کہ حضرت ابن عمر رضی اللہ عنہما ویسے ہی سلام کا جواب دیتے تھے جیسے ان کو سلام کہا جاتا تھا، مثلاً السلام علیکم۔ [مصنف ابن ابي شيبه/ كتاب الأدب/حدیث: 27342]

حضرت معاویہ بن قرہ فرماتے ہیں کہ میرے والد نے مجھے وصیت فرمائی کہ جب تمہیں سلام کیا جائے تو جواب میں وعلیک مت کہہ۔ بلکہ وعلیکم۔ کہو۔ اس لیے کہ اس شخص کے ساتھ فرشتے بھی ہوتے ہیں۔ [مصنف ابن ابي شيبه/ كتاب الأدب/حدیث: 27343]

حضرت عبد الرحمن الرحال فرماتے ہیں کہ حضرت ربیع بن خثیم جب سلام کا جواب دیتے تو یوں کہتے: وعلیکم اور سلام کرنے والے پر جواب کی نیت کرلیتے۔ [مصنف ابن ابي شيبه/ كتاب الأدب/حدیث: 27344]

حضرت ابو اسحاق فرماتے ہیں کہ حضرت شریح جب سلام کا جوا ب دیتے تو یوں کہتے: وعلیکم: یعنی تم پر بھی ہو۔ [مصنف ابن ابي شيبه/ كتاب الأدب/حدیث: 27345]